ساحارا سۇلۋى – ساحا ساڭلاعى

اتاعى ساحا ەلىنە كەڭىنەن تانىلعان قازاق قىزى يانا بايعوجاەۆانى ەكىنىڭ ءبىرى بىلە بەرمەس. ول – ياكۋتيانىڭ كينو الەمىنە وزىندىك قولتاڭباسىن قالدىرعان تانىمال پروديۋسەر, اقىن, جۋرناليست جانە قوعام قايراتكەرى. يانا الماتى وبلىسى, قاپ­شاعاي قالاسىندا 1977 جىلى تۋعان ەكەن. ونىڭ بالالىق شاعى ساحا رەسپۋبليكاسىنىڭ بەيدينگە اۋى­لىندا وتكەن. جاستايىنان قارا ءسوزدىڭ قادىرىن ۇعىپ, ايتار ءسوزىن جىرمەن جەتكىزە بىلگەن اقىننىڭ 1995 جىلى العاشقى جىر جيناعى, ال 2003 جىلى «مەنىڭ وتكەنىمنىڭ ۇزاق جاڭعىرىعى» دەگەن اتاۋمەن تاعى ءبىر كىتابى باسىلىپ شىققان. بۇگىنگى تاڭدا قانداسىمىز ساحا جانە ورىس تىلدەرىندە ەركىن جازاتىن اقىن. ول – رەسەيدىڭ جازۋشىلار جانە جۋرناليستەر وداقتارىنىڭ مۇشەسى, ءتۇرلى جاس جا­زۋشىلار بايقاۋىنىڭ جەڭىم­پازى. تاياۋدا يانا ەربولاتقىزىنىڭ «مۋممۋتتار» («اداسقاندار») اتتى كوركەم ءفيلمىنىڭ پرەمە­راسى قازاقستانداعى بارلىق كينوتەاترلاردا بولىپ ءوتتى. ونىڭ پروديۋسەرلىگىمەن تۇسىرىلگەن كينوتۋىندى ومىردەن الىنعان وقيعا جەلىسىنەن وربىگەن. ەكى جىگىتتىڭ تايگا ورمانىندا اداسىپ, ءتىرى قالۋ جولىنداعى تىرشىلىگى سۋرەتتەلگەن. شىنايىلىعى باسىم. يت تۇمسىعى باتپايتىن ورماننىڭ يرەلەڭ جولىنان وزدەرى اداسقان ءىز كەسۋشىلەر جىگىتتەردى اقىرىندا «ولدىگە» سانايدى. الايدا, اراعا اي سالىپ بارىپ ەكەۋى ەلگە جەتەدى... مىنە, وسىنداي شىم-شىتى­رىققا تولى فيلم ءاپ-ساتتە يانا­نىڭ اتاعىن التى قىردان اسىرىپ, تانىمال ەتتى. بۇل تۋىندى حالىقارالىق كينو بايقاۋىندا قازىلاردىڭ كوڭىلىنەن شىعىپ, جۇلدەگەر اتاندى. بۇگىندە ساحا ەلىنىڭ ساڭلاعى اتانعان قازاقتىڭ ارۋىن كوپشىلى­گىمىز بىلە بەرمەيمىز. سوندىقتان دا, الىستاعى اعايىندى سىزدەرگە تانىستىرۋ, جەتىستىگىن القالاپ جەتكىزۋ – نەگىزگى ماقساتىمىز. ولاي بولسا, كىندىك قانى قاپشاعايدا تامعان قىزدارىڭىزدىڭ تىلەكشىسى بولىڭىزدار! تالعات رايىمبەك, «ەگەمەن قازاقستان»