قوستانايدا پوليتسەي ۇرىنى اتپەن قۋىپ ۇستادى

قوستاناي. 23 مامىر. قوستاناي اۋدانىندا ءبىر وتار قوي ۇرلاعان ۇرىنى الدىمەن ماشينامەن قۋعان پوليتسيا لەيتەنانتى جولسىز جايىلىمدا ءجۇرۋ مۇمكىن بولماعاندىقتان, باقتاشىنىڭ اتىن سۇراپ ءمىنىپ قۋىپ, ۇستادى. بۇل جونىندە وبلىستىق ىشكى ىستەر دەپارتامەنتى ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. قوستاناي اۋدانى ىشكى ىستەر ءبولىمى قىلمىستىق پوليتسيا ءبولىمىنىڭ قىزمەتكەرى ولجاس نۇرجانوۆ ءوزىنىڭ كەزەكشىلىگىندە قوي ۇرلاعان ۇرىنى تاپ باستىرماي ۇستادى. ول الدىمەن ۇرىنىڭ ىزىمەن جاياۋ جانە ماشينامەن ءجۇرىپ ءوتتى, سوسىن جەرگىلىكتى باقتاشىنىڭ اتىن سۇراپ ءمىنىپ, بەس شاقىرىمنان كەيىن 51 باس قويدى ايداپ كەتىپ بارا جاتقان ۇرىنى ۇستاپ الدى. ولجاس نۇرجانوۆ: «وقيعا بولعان سادوۆىي اۋىلىنا  كەلسەك, قورانىڭ اۋزىن بۇزىپ, تۇرعىننىڭ 51 باس قويىن الىپ كەتىپتى. مەن دەرەۋ قويدىڭ ىزىنە ءتۇستىم», – دەدى. پوليتسيا الدىمەن جاياۋلاپ مال تۇياعىنىڭ ىزىنەن قالماي 20 شاقىرىم جەر ءجۇرىپ, وسينوۆ اۋىلىنا دەيىن كەلگەن. ارتىنان قويدىڭ يەسى ماشيناسىمەن جەتىپ, ەكەۋى ءارى قاراي ىزگە تۇسكەن. ولار اۋدان ورتالىعى زاتوبول پوسەلكەسىنە دەيىن ىزدەپ بارعان. پوسەلكە سىرتىندا مال باعىپ جۇرگەن باقتاشى ءبىر كوك كۇرتەشە كيگەن جىگىتتىڭ كوپ قوي ايداپ بارا جاتقانىن كورگەنىن, ونىڭ كەتكەن باعىتىن دا سىلتەگەن. سوسىن جولسىز جايىلىمدا ماشينامەن ءجۇرۋ مۇمكىن بولمايتىندىقتان پوليتسەي باقتاشىنىڭ اتىن سۇراپ مىنگەن. بەس شاقىرىمداي جۇرگەننەن كەيىن كۇدىكتى مەن قوي وتارى الدىنان شىققان. كۇدىكتى پوليتسەيدى كورىپ, قاشا جونەلگەن. بىراق ول قۇتىلا المادى. ءبىر قىزىعى, ولجاس نۇرجانوۆ اتقا ومىرىندە ءبىرىنشى رەت ءمىنىپتى. ول ۇرىنى اۋداندىق  ىشكى ىستەر بولىمىنە الىپ كەلگەن. كۇدىكتى بۇرىن سوتتالعان, نوۆوسەلوۆ اۋىلىنىڭ تۇرعىنى ەكەن. جۇمىسسىز ۇرلاعان قويىن ساتىپ, اقشا تابۋدى ويلاپتى. قازىر ونىڭ ۇستىنەن قىلمىستىق كودەكسىنىڭ «ۇرلىق» بابى بويىنشا قىلمىستىق ءىس قوزعالدى, سوتقا دەيىنگى تەرگەۋ جۇمىستارى باستالدى. ءنازيرا جارىمبەتوۆا. دەرەك, فوتو: قوستاناي وبلىستىق ىشكى ىستەر دەپارتامەنتىنىڭ ءباسپاسوز قىزمەتى.