الەمدەگى ەڭ شايقور ەل وزبەكستان بولىپ شىقتى

استانا. 23 مامىر. Euromonitor International جۇرگىزگەن زەرتتەۋلەرگە سايكەس الەمدەگى ەڭ كوپ شاي ىشەتىن ەلدەردىڭ كوشىنىڭ باسىن وزبەكستاننىڭ باستاپ تۇرعانى بەلگىلى بولدى. بۇل تۋرالى The Independent گازەتىنىڭ اقپارىنا سۇيەنگەن egemen.kz ءتىلشىسى حابارلادى. باسىلىمنىڭ جازۋىنشا, وزبەكستان تۇرعىندارىنىڭ وتە-موتە باسىم بولىگى شاي ىشكەندى قالايدى ەكەن. زەرتتەۋ بۇل ەل تۇرعىندارىنىڭ 99,6 پايىزىنىڭ شايسىز جۇرە المايتىنىن كورسەتتى. ال ەكى امەريكانىڭ قيىلىسىنداعى گۆاتەمالا مەملەكەتى جۇرتىنىڭ 99,6 پايىزى كەرىسىنشە كوفەنى قالايتىن بولىپ شىقتى. الەمدىك زەرتتەۋ ۇيىمى مۇنى جەر جۇزىندە «ءسىز شايدى قالايسىز با, كوفەنى ءجون سانايسىز با؟» دەگەن ساۋالداما جۇرگىزۋ ارقىلى انىقتاعان. وسى سۇراۋ سالۋدىڭ قورىتىندىسىندا شايقور ەلدەر دە, كوفەقۇمار حالىقتار دا انىقتالىپ شىعا كەلگەن. ايتالىق, شاي ىشكىشتەردىڭ ءتىزىمىن وزبەكستان باستاسا, ودان كەيىنگى قاتارلاردى كەنيا (99,2%), ازەربايجان (99,1%), پاكىستان (99%), قىتاي (98,9%) جانە مىسىر (98,5%) ەلدەرى الادى. ال كوفە ىشكىشتەردىڭ كوشىندە گۆاتەمالادان كەيىن دومينيكان رەسپۋبليكاسى (99%), برازيليا, ەكۆادور (97,4%), گرەكيا (96,8%) جانە دانيا (92,2%) تۇر. قازاقستان بۇل ەكى ءتىزىمنىڭ دە كەۋدە قاتارىندا جوق. بىزگە قاراعاندا, ۇلىبريتانيا مەن رەسەيدىڭ ءوزى جوعارى. بۇلاردىڭ الدىڭعىسىندا شايقۇمارلار 78,4% بولسا, كەلەسىسىندە 77,5% كورسەتكىشىندە. ال ەستونيا مەن پولشادا كوفە مەن شايدىڭ ارا سالماقتارى ءبىر-بىرىنە وتە جاقىن. بۇلاردا تيىسىنشە ولار 49% جانە 51% مولشەرلەرىن قۇرايدى. تالعات رايىمبەك. دەرەك, فوتو: The Independent.