استانا. 22 مامىر. بۇگىن – رەسەيدە ءوتىپ جاتقان حوككەيدەن الەم چەمپيوناتىنىڭ سوڭعى جارىس كۇنى. جاڭا عانا ءۇشىنشى ورىن ءۇشىن بولعان ويىن اياقتالىپ, اقش-تان 7:2 ەسەبىمەن باسىم تۇسكەن رەسەي قۇراماسى تاريحىندا 3-رەت الەمدىك دودانىڭ قولا جۇلدەسىنە قول جەتكىزدى. بۇل تۋرالى egemen.kz ءتىلشىسى حابارلادى.
بىلىكتى مامان ولەگ زناروك جاتتىقتىراتىن رەسەي قۇراماسى بۇل كەزدەسۋگە ەرەكشە دايىندىقپەن شىقتى. ويىننىڭ 7-مينۋتىندا ۆياچەسلاۆ ۆوينوۆ ەسەپ اشىپ, كومانداسىن العا شىعارعان بولاتىن. ارادا تاعى 7 مينۋت وتكەندە, رەسەيلىكتەر ويىنشى باسىمدىعىن جۇزەگە اسىرىپ, سەرگەي موزياكيننىڭ كومەگىمەن ەسەپتى ەسەلەدى.
ەكىنشى كەزەڭدە قارقىنىن كۇشەيتكەن ايدىن يەلەرى قارسىلاستارىنىڭ قاقپاسىنا تاعى دا ءۇش شايبا سوقتى. الدىمەن, 30-مينۋتتا يۆان تەلەگين مەرگەندىگىمەن كوزگە تۇسسە, 33-مينۋتتا ەۆگەني دادونوۆ ەسەپتى 4:0-گە جەتكىزدى. وسىعان دەيىن قانشا شابۋىلداسا دا ساتتىلىك جەتىسپەگەن امەريكالىقتار 35-مينۋتتا عانا رەسەيدىڭ قورعانىسىن بۇزىپ ءوتىپ, سەرگەي بوبروۆسكي قورعاعان قاقپادان ساڭىلاۋ تاپتى. كومانداسىنىڭ ويىنىنا قان جۇگىرتىپ, ناتيجەلى سوققىسىمەن كوزگە تۇسكەن فرەنك ۆاترانو بولاتىن. وسى رەتتە اقش حوككەيشىلەرى ءبىر ويىنشىلارى كەم بولعانىنا قاراماستان, گول سوعىپ كەتكەنىن ايتا كەتكەن ءجون.
دەسەك تە, امەريكالىقتاردىڭ بۇل گولىنا رەسەي ويىنشىلارى لەزدە جاۋاپ قايتاردى. اتاپ ايتقاندا, 36-مينۋتتا ارتەمي پانارين رەسەيلىكتەردىڭ وسى كەزەڭدەگى ءۇشىنشى شايبالارىن سوقتى.
العاشقى ەكى كەزەڭدە قاقپاسىنا بەس بىردەي شايبا جىبەرگەن اقش قاقپاشىسى كەيت كينكەيدتى ءۇشىنشى كەزەڭدە مايك كوندون الماستىردى. دەگەنمەن, قۇرامانىڭ باس جاتتىقتىرۋشىسى دجون حاينستىڭ بۇل ارەكەتى ويىن بارىسىنا ەشقانداي وزگەرىس اكەلمەدى. 44-مينۋتتا فرەنك ۆاترانو ءدۋبلدىڭ اۆتورى اتانىپ, امەريكالىقتار جينالعانداي اسەر تانىتقان. الايدا, ويىن سوڭىنا دەيىن قارقىنىن باسەڭدەتپەگەن رەسەي قۇراماسى كوندوندى دا ەكى رەت ءوز قاقپاسىنان شايبا الىپ شىعۋعا ءماجبۇر ەتتى. ناقتى ايتساق, 54-مينۋتتا سەرگەي موزياكين ەكىنشى رەت مەرگەندىگىمەن تانىلسا, 60-مينۋتتا ۆاديم شيپاچەۆتىڭ مەرەيى ۇستەم بولدى.
وسىلايشا, ءوز جەرىندە وتكەن الەم چەمپيوناتىن رەسەي قۇراماسى ءۇشىنشى ورىنمەن اياقتادى. بۇعان دەيىن بەس مارتە الەمدىك دودانىڭ قولا جۇلدەسىنە تالاسقان سولتۇستىكتەگى كورشىمىز سونىڭ ەكەۋىندە, ياعني 2005 جانە 2007 جىلدارى ۇزدىكتەر قاتارىنان كورىنگەن بولاتىن. ال اقش قۇراماسى وسىمەن 8-رەت جۇبانىش فينالدا باق سىناپ, سونىڭ تورتەۋىندە قارسىلاسىنا جول بەردى.
ايتا كەتەيىك, ءدال قازىر رەسەي استاناسى – ماسكەۋ قالاسىنداعى ۆتب مۇز ايدىنىندا الەم چەمپيوناتىنىڭ فينالدىق كەزدەسۋى وتۋدە. وندا فينليانديا قۇراماسى مەن كانادا «التىنعا» تالاسۋدا. فينندەر جارتىلاي فينالدا رەسەيدەن 3:1 ەسەبىمەن باسىم تۇسسە, ۇيەڭكى جاپىراقتى ەلدىڭ وكىلدەرى اتالعان سىندا 4:3 ەسەبىمەن اقش-تى ارتتا قالدىرعان بولاتىن.
بۇل سايىسقا قازاقستان قۇراماسىنىڭ دا قاتىسقانىن بۇعان دەيىن حابارلاعان ەدىك. «ا» توبىندا سىنعا تۇسكەن ءبىزدىڭ جىگىتتەر بەتاشار ويىندا بۋلليت ارقىلى شۆەيتساريانى جەڭىپ, سەنساتسيا جاسادى. دەگەنمەن, قالعان التى ويىننىڭ بارىندە جەڭىلگەن اندرەي نازاروۆتىڭ شاكىرتتەرى الەم چەمپيوناتىنىڭ ەليتالىق ديۆيزيونىمەن قوش ايتىستى.
ەلامان قوڭىر.
دەرەك: egemen.kz.
فوتو: championat.com.
