شانحاي ىنتىماقتاستىق ۇيىمىنىڭ باس حاتشىسى م.يماناليەۆ كەشە پەكين قالاسىنان ماسكەۋدىڭ دومودەدوۆو اۋەجايىنداعى لاڭكەستىك ارەكەتكە بايلانىستى مالىمدەمە جاسادى.
ماسكەۋدىڭ دومودەدوۆو حالىقارالىق اۋەجايىنداعى لاڭكەستىك ارەكەت تۋرالى حاباردى اسا تەرەڭ اشىنۋمەن قابىلداي وتىرىپ, ەشقانداي جاعدايدا اقتاۋى جوق وسى جابايى قىلمىستى كەسىمدى تۇردە ايىپتايمىن. قازا بولعان جانە جاراقات العان ادامداردىڭ وتباسىلارى مەن ولاردىڭ جاقىندارىنا, رەسەي فەدەراتسياسىنىڭ حالقى مەن باسشىلىعىنا شىنايى اياۋشىلىعىمىز بەن كوڭىلىمىزدى بىلدىرەمىز, دەلىنگەن باس حاتشىنىڭ مالىمدەمەسىندە.
م.يماناليەۆ سونداي-اق شانحاي ىنتىماقتاستىق ۇيىمىنا مۇشە مەملەكەتتەر لاڭكەستىكتىڭ كەز كەلگەن ءتۇرى مەن كورىنىستەرىنە ءبىرىنشى كەزەكتە ماڭىز بەرىپ, الداعى كەزەڭدەردە دە وڭىردەگى قاۋىپسىزدىك پەن تۇراقتىلىقتى قامتاماسىز ەتۋ ماسەلەلەرىندە ءوزىنىڭ ءىس-قيمىلىن جان-جاقتى نىعايتاتىنىن جانە كەڭەيتەتىنىن اتاپ كورسەتەدى.