وسكەمەن اۋەجايى مەرەكەدەگىدەي بەزەندىرىلگەن. اسپاننان اقشا قار قىلاۋلاپ, ادام جانىن شاتتىققا تەربەگەندەي. ونسىز دا جينالعان مىڭداعان وسكەمەندىكتەر پاۆلوداردان كەلەتىن ۇشاقتى اسىعا كۇتىپ, اسپانعا تەلمىرەدى. اقىرى ۇشاق 24-ءشى قاڭتاردا كەشكى 21.00-گە تامان وسكەمەنگە كەلىپ قوندى.
مۋزىكا اۋەنى قالىقتايدى. سالدەن كەيىن تراپتان تۇسكەن VII قىسقى ازيا ويىندارى الاۋ ەستافەتاسى ديرەكتسياسى جەتەكشىسىنىڭ ورىنباسارى سارسەن قۇرانبەك باستاعان دەلەگاتسيانى وبلىس اكىمى بەردىبەك ساپارباەۆ, قازاقستاننىڭ حالىق جازۋشىسى, جاسى 90-عا تاياپ قالسا دا باۋىر باسقان الماتىسىندا جاتا الماي, التايعا كەلگەن, قاسيەتتى الاۋدى ءوز قولىمەن ۇستاۋدى ارمانداعان ءازىلحان نۇرشايىقوۆ, قازاقستاننىڭ حالىق ءارتىسى روزا رىمباەۆا مەن باسقا دا ءانشى, اقىن-جازۋشىلار, قالانىڭ ارداگەرلەرى مەن وقۋشىلارى, ستۋدەنتتەرى قارسى الدى.
كەلەسى كۇنى بەردىبەك ماشبەك ۇلى ازيادا الاۋىن اتاقتى حوككەيشى, ناگانودا وتكەن قىسقى وليمپيا ويىندارىندا ەلىمىزدىڭ قۇراما كومانداسىنىڭ كاپيتانى بولعان ەرلان ساعىمباەۆقا ۇسىندى. ەرلان ەرلەس ۇلى ەكى ءجۇز مەتر جۇگىرگەن سوڭ ەرلان قايىرباەۆقا ۇسىندى. ال ايدار ءوز كەزەگىندە الاۋلاعان الاۋدى شىرايلى شىعىستا مىڭداعان بەلگىلى سپورتشىلاردى باۋلىپ وسىرگەن شىعىس قازاقستان مەملەكەتتىك ۋنيۆەرسيتەتىنىڭ رەكتورى, پروفەسسور بەيبىت مامىراەۆقا ۇسىندى. اتاپ ءوتۋ كەرەك, وسى جوعارى وقۋ ورنىن اياقتاعان 20-دان استام قىسقى سپورت شەبەرلەرى ەل نامىسىن قورعاعالى وتىر.
بۇدان كەيىن اكتەر دوسقان جولجاقسىنوۆ, اقىن-جازۋشىلار ۇلىقبەك ەسداۋلەت, ديداحمەت ءاشىمحان, سادىبەك ءتۇگەل, ءانشى توقتار سەرىك تە وزدەرىنە تيەسىلى 200 مەتردى جۇگىرىپ ءوتتى. اتاقتى دزيۋدوشى, الەم كۋبوگىنىڭ يەگەرى, ەكى وليمپيا ويىندارىنا قاتىسقان رۋسلان سەيىلحانوۆ, استانالىق جۋرناليست بەرىك ءۋالي, تۇيە بالۋان مۇسىلمانبەك قاجىمۇقانوۆ, ارداگەر سپورتشى, الەم چەمپيونى قالي يمانباەۆ, سۋرەتشى ەركىن نۇرازحان ءۇشىن دە الاۋ ۇستاعان ءسات ماڭگى ەستە قالارى ءسوزسىز.
كيكبوكستان الەمنىڭ بەس دۇركىن چەمپيونى, وبلىستىق سپورت جانە دەنە شىنىقتىرۋ باسقارماسىنىڭ باستىعى اسقار موجانوۆ جازۋشى ءازىلحان نۇرشايىقوۆپەن بىرگە رەسپۋبليكا الاڭىنداعى بيىك مىنبەگە كوتەرىلگەن كەزدە قالىڭ جۇرت دۋ ەتە قالدى. ازاعاڭ اسقار ەكەۋى ورتالىق الاڭداعى الاۋدى جاقتى. تۇستەن كەيىن ەستافەتانىڭ ەكىنشى كەزەڭى باستالىپ, الاۋدى ءبىرىنشى بولىپ روزا رىمباەۆا الىپ جۇگىردى. ءار اۋدانداردان كەلگەن ن. شاۋحين, ۆەلوسيپەدشى ت. قاسىموۆ, ءا. دوسقاجانوۆ, س. كارتوەۆ, بوكسشى د. سۋجانوۆ, بەلگىلى كاسىپكەر, سپورت مەتسەناتى, اۋعان سوعىسىنىڭ ارداگەرى قايرات مۋسين, ت.ب. الاۋمەن بىرگە جۇگىردى. اتاپ ءوتۋ كەرەك, الاۋمەن جۇگىرۋ كەزىندە ءسايگ ۇلىك اتقا مىنگەن بەلگىلى سپورتشىلار جەرلەستەرىن قولداپ وتىردى, ءتىپتى سۋ ءۇستىمەن دە الاۋدى الىپ ءوتتى. سوڭىنان جەلاياق قىزىمىز ولگا رىپاكوۆا الاۋدى تۇتاتتى.
وڭداسىن ەلۋباي, وسكەمەن.