قاڭتاردىڭ ساقىلداعان سارى ايازىندا جۇرتتى ابىگەرگە سالعان شارىن وزەنى بۇگىن ءوز ارناسىنا ءتۇسىپ, جايلانا اعىپ جاتىر. ارينە, اۋىل تۇرعىندارى جاپا شەكتى, «ءوز ءۇيى, ولەڭ توسەگىن» تاستاۋعا ءماجبۇر بولدى. دەسەك تە شارىندىقتارعا كومەك دەر كەزىندە كورسەتىلىپ, قۇتقارۋ شارالارى جۇمىلدىرىلدى.
شارىن اۋىلىنا 21 قاڭتار كۇنى پرەمەر-ءمينيستردىڭ ءبىرىنشى ورىنباسارى ومىرزاق شوكەەۆ كەلىپ, اپاتتىڭ ورىن الۋىنا سەبەپكەر بولعان شارىن وزەنىندەگى تەمىر جول كوپىرى قۇرىلىسى ءجۇرگىزىلگەن قوسالقى ارنا جۇمىسىمەن تانىستى. ەلدى مەكەندى مۇزدان تازارتۋ, جاعانى بەكىتۋگە وبلىس بيۋدجەتىنەن بولىنگەن 30 ملن. تەڭگەگە قوسىمشا اۋداننان 60 ملن. تەڭگە قارجى قاراستىرىلعان. ۇكىمەت باسشىسىنىڭ ورىنباسارى جاسالىپ جاتقان دامبانى كورىپ, اپاتتىڭ سەبەپ-سالدارىن تارازىلادى.
سۋ شايعان تۇرعىن ۇيلەردى ارالاپ, حالىقپەن پىكىرلەسكەن ومىرزاق شوكەەۆ, رەسپۋبليكالىق كوميسسيا مۇشەلەرى, وبلىس اكىمى سەرىك ءۇمبەتوۆ, جەرگىلىكتى تۇرعىنداردىڭ قاتىسۋىمەن كەڭەس وتكىزىپ, وقيعا ەگجەي-تەگجەيلى تەكسەرىلىپ, ايىپتىلار جازالاناتىنىن, باسقا دا ءوتىنىش-تىلەكتەر ءوڭىر باسشىسىمەن بىرلەسە شەشىلەتىنىنە سەندىردى.
جيىندا وسى وقيعانىڭ باسىندا جۇرگەن وبلىس اكىمىنىڭ ءبىرىنشى ورىنباسارى اماندىق باتالوۆ 7 ءۇي اعىمداعى, 1 ۇيگە كۇردەلى جوندەۋ جۇمىستارى جۇرگىزىلەتىنىن جەتكىزدى. سۋ كىرگەن شەتكى كوشەلەردەگى 243 ءۇيدىڭ اۋلاسى مەن كوشەلەرى مۇزدان تولىق تازارتىلسا, تۇرعىندارعا 104 توننا كومىر, 40 تەكشە مەتر وتىن, 118 قاپ ۇن, 400-گە جۋىق ەتىك, كۇرتەشە, 2 توننا قۇس ەتى مەن تاعى باسقا قاجەتتىلىكتەر بەرىلگەن.
بۇدان كەيىن ءو.شوكەەۆ بالقاش اۋدانىنداعى «دينارا-رانچو» جشس-دەگى اسىل تۇقىمدى مال شارۋاشىلىعىنىڭ ەتتى باعىتتاعى گەرەفورد تۇقىمى مەن قازاقتىڭ اقباس سيىرىن وسىرۋدەگى ءتيىمدى جوبانىڭ ىسكە اسىرىلۋىمەن تانىستى.
مۇنداعى ءبىر بۇقانىڭ سالماعى 1 توننا 200 كيلو. وندىرىستىك كووپەراتيۆ اۋىل حالقىن جۇمىسپەن قامتۋمەن قاتار قۇس ءوسىرۋدى دە قولعا العان. «دينارا رانچو» كووپەراتيۆىن ارالاعان جۇمىس توبى ءىرى قارا ەتىنىڭ ەكسپورتتىق الەۋەتىن ارتتىرۋ تاقىرىبىندا ايماقتىق سەمينار وتكىزىپ, اسىل تۇقىمدى مال ءوسىرۋ, ەتتى ەكسپورتتاۋ, قارجىلاندىرۋ جونىندەگى ءتۇيىندى ماسەلەلەردى ورتاعا سالدى.
كۇمىسجان بايجان, الماتى وبلىسى.