كەشە تاجىكستاندا 6,1 باللدىق جەر سىلكىنىسى بولدى. ونىڭ ەپيتسەنترى ەلدىڭ قىتاي شەكاراسىنا جاقىن ورنالاسقان قاراقول قالاسىنان 106 شاقىرىم جەردە تىركەلدى.
ال جەر سىلكىنىسىنىڭ كۇشى رەسپۋبليكا استاناسى دۋشانبە قالاسىندا 3 باللدى كورسەتكەن. ازىرشە ەشقانداي قيراعان, ب ۇلىنگەن قۇرىلىستار تۋرالى مالىمەت جوق. قازا بولعاندار تۋرالى دا ەشتەڭە ايتىلمايدى. جەر سىلكىنىسىنىڭ زارداپتارى ەل ەس جيعان سوڭ ناقتىلاناتىن سياقتى. دەگەنمەن, تابيعات اپاتى حالىق از قونىستانعان ايماقتا ورىن العاندىقتان, ونىڭ سالدارى سونشالىقتى اۋىر بولماۋى دا مۇمكىن.
سودىرلار پرەزيدەنتتى جولىنان قالدىردى
ۋكراينانىڭ دونەتسك وبلىسىنداعى ماكەەۆكا قالاسىندا قۇلاق ەستىمەگەن سودىرلىق جاسالدى. بەلگىسىز بىرەۋلەر تاڭ الدىندا قالانىڭ ءتۇرلى اۋداندارىندا ەكى جارىلىس جاساعان. ايتەۋىر ەشكىم زارداپ شەككەن جوق.
قالانىڭ اكىمشىلىك عيماراتىنا جاپسىرىپ كەتكەن حاتتا ولار 4 ملن. ەۋرو تاۋىپ بەرمەسەڭدەر, ءالى بەس جارىلىس جاسايمىز دەپ قوقان-لوققى جاساعان. سودان اتا-انالار بالالارىن مەكتەپكە جىبەرۋگە قورقىپ وتىر. ال ەلدىڭ پرەزيدەنتى ۆيكتور يانۋكوۆيچ ءوزىنىڭ جاپونياعا باراتىن ساپارىنان باس تارتۋعا ءماجبۇر بولدى. قازىر قىلمىسكەرلەر ءجىتى ىزدەستىرىلىپ جاتىر.
يەرۋساليمسىز ەگەمەن پالەستينا جوق
«ءال-جازيرا» اقپارات اگەنتتىگى پالەستينا مەن يزرايل اراسىندا 2008 جىلى بولعان كەلىسسوزدەردىڭ قۇپيا قۇجاتتارىن قولعا تۇسىردىك دەپ جاريالادى. وندا پالەستينا دەلەگاتسياسى وزدەرىنىڭ شىعىس يەرۋساليمنەن تۇبەگەيلى باس تارتۋعا دايىن ەكەندىگىن مالىمدەگەن دەيدى اگەنتتىك.
بىراق سول كەزدە پالەستينا دەلەگاتسياسىنا باسشىلىق ەتكەن احمەد كۋرەي بۇل مالىمدەمەنىڭ شىندىققا ءۇش قايناسا سورپاسى قوسىلمايتىن مۇلدەم جالعان مالىمدەمە ەكەنىن كولدەنەڭ تارتىپ وتىر. ونىڭ سوزىنە قاراعاندا, بۇل پالەستينا باسشىلىعىنىڭ بەدەلىن ءتۇسىرۋ ءۇشىن قولدان جاسالعان قۇجات. كەلىسسوزدەر بارىسىندا ءتىپتى بۇل تۋرالى اڭگىمە دە قوزعالعان جوق, دەيدى ول.
گاز قۇيۋ ستانساسىنداعى الاپات جارىلىس
رەسەي اۆتونوميالارىنىڭ ءبىرى – بۋرياتياداعى ءترانسسىبىر تەمىر جولىنا تاياۋ ماڭداعى گاز قۇيۋ ستانسالارىنىڭ بىرىندە كۇشتى جارىلىس بولىپ, ءبىر ادام قازا تاپتى جانە ەكەۋى اۋىر جارالاندى.
جارىلىس ونوحوي كەنتىندە بولعان. كوز كورگەندەردىڭ ايتۋىنا قاراعاندا, بارلىعى 3 تسيستەرنا گاز جارىلىپ, سونىڭ كەسىرىنەن 150 شارشى مەتردەي جەردى ۇلكەن ءورت الىپ كەتكەن. ءورتتى سوندىرۋگە 50-دەن ارتىق ادام كۇشى مەن بىرقاتار تەحنيكا تارتىلعان. قازىر جارىلىستىڭ سەبەبىن انىقتاۋ ءۇشىن جەرگىلىكتى وكىمەت ارنايى كوميسسيا قۇردى.
ەكىنشى قايتارا پرەزيدەنت بولدى
پورتۋگالياداعى پرەزيدەنت سايلاۋى ءبىرىنشى تۋردا-اق ءناتيجە بەرىپ, ەلدىڭ قازىرگى پرەزيدەنتى 71 جاستاعى انيبال كاۆاكۋ سيلۆا سايلاۋشىلار داۋىسىنىڭ 53,1 پايىزىن الىپ, بيلىككە ەكىنشى مارتە قول جەتكىزدى.
داۋىس بەرۋگە سايلاۋ قۇقى بار ازاماتتاردىڭ 46,7 پايىزى كەلگەن. بۇل دا ەۋروپا ءۇشىن ۇلكەن كورسەتكىش. قازىرگى پرەزيدەنت ءوزىنىڭ نەگىزگى قارسىلاسى, 74 جاستاعى مانۋەل الەگرەگە قاراعاندا 33,2 پايىز ارتىق داۋىس جيناعان. ال ول بار بولعانى 19,7 پايىز داۋىس العان.
ينتەرنەت ماتەريالدارى نەگىزىندە ازىرلەندى.