تاۋەلسىزدىك تابىسى
___________________
ورال قالاسىنداعى «اگرورەمماش» اق تاۋەلسىزدىكتىڭ 20 جىلدىعى قۇرمەتىنە جاڭا ءىرى جوبالاردى ىسكە اسىرۋعا كىرىستى. ءوز اتاۋىنان كورىنىپ تۇرعانىنداي, اتالعان وتاندىق كاسىپورىن ماشينە جاساۋمەن اينالىسادى. بۇعان دەيىن كاسىپورىن كونۆەيەرىنەن كوممۋنالدىق قىزمەتكە, ءورت ءسوندىرۋ مەن قۇرىلىسقا قاجەتتى كولىكتەر شىعارىلىپ كەلدى. ونىڭ ساپاسى مەن باسەكەلەستىككە قابىلەتتىلىگىنە بۇعان دەيىن سىن-ەسكەرتپە ايتقان سۇرانىس يەلەرىن ازىرگە كورمەپپىز دە, ەستىمەپپىز دە. لايىم سولاي بولا بەرگەي.
ال بيىلعى جاڭا جىلدا اگرورەمماشتىقتار بەلورۋسسياداعى الەمگە ايگىلى مينسك اۆتوموبيل زاۋىتىمەن (ماز) ارنايى تەحنيكا شىعارۋ ءجونىندەگى ۇزاق مەرزىمدى كەلىسىمگە قول قويدى. بۇگىندە زاۋىت ۇجىمى وسى قاناتقاقتى جوبانى ىسكە اسىرۋعا كىرىسىپ تە كەتتى. العاشقى كەزەكتە ماز-بەن رەسپۋبليكا قالالارى مەن اۋداندارىنداعى كوممۋنالدىق قىزمەتكە قاجەتتى ارنايى كولىكتەر شىعارۋدىڭ ءجون-جوباسى بەلگىلەندى. سونىڭ ىشىندە, رەسپۋبليكاداعى جول ينفراقۇرىلىمى ناشار دامىعان وڭىرلەر ءۇشىن ارنايى كولىك ۇلگىلەرى تاڭداپ الىندى. بۇل كولىكتەر ويلى-شۇڭقىرلى جانە كەدىر-بۇدىرلى جولدارعا لايىقتالىپ جاسالماق. سوندىقتان دا بەلورۋسسيا مەن قازاقستاندىق ماشينە جاساۋشىلار ءونىمدەرىنە تەك جوعارى ساپا جانە توزىمدىلىك پەن بەرىكتىك ءتان بولماق.
– بۇل ءۇشىن بيىلعى جىلدان باستاپ كاسىپورىندى تولىق جاڭعىرتۋ تالابىن قويىپ وتىرمىز. مۇنىڭ باستى جولى يننوۆاتسيالىق ساتىعا قول جەتكىزەتىن جاڭا تەحنولوگيالار بولماق. بۇل ورايدا ءبىز بەلورۋسسيالىق ارىپتەستەرىمىزدىڭ كومەگىنە ارقا سۇيەيتىن بولامىز. قازىردىڭ ءوزىندە تەحنيكالىق تۇرعىدان قايتا جاراقتاندىرۋ جۇمىستارى قولعا الىندى. بۇعان 2 ميلليون اقش دوللارى كولەمىندە قاراجات قاراستىرىلماق, – دەدى گازەت تىلشىسىنە «ورالاگرورەمماش» اق پرەزيدەنتى عيمران بيسەنوۆ.
بۇعان قوسارىمىز قازاقستان, رەسەي جانە بەلارۋس مەملەكەتتەرى اراسىنداعى كەدەن وداعى كولىكتەر شىعارۋعا قاجەتتى بولشەكتەر تاسىمالداۋ ءۇردىسىن بارىنشا جەڭىلدەتە ءتۇسپەك. اتالعان وداق اياسىندا قۇجات راسىمدەۋدەگى كەدەرگىلەر جويىلعانى بەلگىلى. سوندىقتان دا بۇگىنگى كۇنى ەكى تاراپ نەگىزگى كۇشتى ارىپتەستىك قارىم-قاتىناستاردى ودان ءارى تەرەڭدەتۋگە باعىتتاپ وتىر. باستى ماقسات – قازاقستانعا جەتكىزىلەتىن ءبولشەكتەر سانىن كوبەيتۋ ارقىلى تەڭ تۇرعىداعى ارىپتەستىك ءوندىرىستى كەڭەيتۋ.
ورتاق ءونىمنىڭ العاشقى پارتياسىن جاساپ شىعارۋ ءۇشىن ءوزارا كەلىسىمگە سايكەس اۆتوموبيل شاسسيلەرىنىڭ العاشقى لەگى كوپ كەشىكپەي مينسكىدەن ورالعا جەتكىزىلمەك. ال قازاقستاندىق زاۋىت ءوز كەزەگىندە ەكى-ءۇش ايدىڭ ىشىندە ارنايى كولىكتەردىڭ العاشقى ۇلگىلەرىن جاساپ شىعارماق. وعان «ماز» بەن «ورالاگرورەمماش» زاۋىتتارىنىڭ لوگوتيپتەرى قاتار قويىلماق.
تەمىر قۇسايىن.
باتىس قازاقستان وبلىسى.