كىتاپ – ادام ومىرىندەگى باعا جەتپەيتىن قۇندى سەرىك. ول – ءبىلىمنىڭ, رۋح پەن كورەگەندىكتىڭ, مەيىر شۋاعىنىڭ قاينار كوزى. ۇلتتىق مادەنيەت پەن ءىلىم-تانىمنىڭ نەگىزىن قالايتىن كىتاپ الەمى وسكەلەڭ ۋاقىت ادامىن قالىپتاستىرىپ, كوڭىل سارايىن كەڭىتەدى. ول – بارشاعا بىردەي قاجەت تىرشىلىك ءنارى. ال, تاعدىر تالكەگىمەن شالىس باسقانداردىڭ جانسارايىن كەڭىتەر ءۇمىت سىيلىعى.
«نۇر وتان» حدپ اقمولا وبلىستىق فيليالى وسىناۋ ىزگى نيەتتى باسشىلىققا الىپ, تۇزەۋ مەكەمەلەرىندەگى كىتاپحانالار قورىن تولىقتىرۋ ماقساتىندا ارنايى اكتسيا جاريالاعان بولاتىن. وعان جۇزدەگەن اقمولالىق ءۇن قوسىپ, ءىس-شارانىڭ ماڭىزىن ارتتىرا ءتۇستى. اينالدىرعان ءتورت ايدا 2,5 مىڭنان استام كوركەم ادەبيەتتەر, وقۋ قۇرالدارى كەلىپ ءتۇستى. كوكشەتاۋ قالاسىنىڭ تۇرعىنى ليديا كوروتينا جەكە كىتاپحاناسىنان 300-دەن استام ادەبيەتتى تارتۋ ەتتى. ولاردىڭ اراسىندا ا.چەحوۆ, ل.تولستوي, ا.پۋشكين, د. مامين-سيبيرياك, الەم ادەبيەتىنىڭ تاعى باسقا كلاسسيكتەرى جاۋھار توككەن كىتاپتار بار. ەڭبەك سىڭىرگەن مادەنيەت قايراتكەرى, زەينەتكەر سيفات تاسوۆانىڭ تارتۋلارى دا قوماقتى بولدى.
اكتسيا شەڭبەرىندە پارتيانىڭ اۋداندىق فيليالدارى كوپتەگەن يگى شارالاردىڭ ۇيىتقىسى بولا ءبىلدى. ماسەلەن, ەسىل اۋدانىنداعى ماكارەنكو اتىنداعى بالالار ۇيىندە وتكەن «كىتاپ مەرەكەسىندە» كاسىپورىندار مەن ۇيىم وكىلدەرى, مەكتەپ باسشىلارى ەرتەگى جيناقتارىن, فانتاستيكالىق كىتاپتاردى, وقۋلىقتار مەن كورنەكى قۇرالداردى سىيلادى. ال, اۋداندىق بالالار كىتاپحاناسىنىڭ ۇجىمى 30 اتاۋدان تۇراتىن ەنتسيكلوپەديالىق ادەبيەتتى تارتۋ ەتتى.
باقبەرگەن امالبەك.
اقمولا وبلىسى.