پەنوپلاست بلوكتارىنان سالىناتىن بولدى
قوستاناي قالاسىندا «بايتەرەك» ۇلتتىق باسقارۋشى حولدينگىنىڭ قولداۋىمەن 2016-2017 جىلدارى ءتۇرلى قارجىلاندىرۋ ينستيتۋتتارىن پايدالانا وتىرىپ, 13 ميلليارد تەڭگەگە 112 مىڭ شارشى مەتر قول جەتىمدى الەۋمەتتىك تۇرعىن ءۇي سالۋ جوسپارلانۋدا.
وسى ەكى جىلدىڭ ىشىندە 1800-دەن استام وتباسى باسپانالى بولادى. ال قۇرىلىسشى فيرمالار تۇرعىن ءۇيدى ساپالى, تەز ارادا سالۋ ءۇشىن قارجىمەن قاتار جاڭا تەحنولوگيالاردى, جاڭا قۇرىلىس ماتەريالدارىن قولدانادى. مىسالى, وبلىس ورتالىعىنىڭ «اەروپورت» شاعىن اۋدانىنان ءتورت بىردەي كوپ قاباتتى ءۇي تۇسپەك. مەردىگەر «يرينا ي ك» فيرماسى ونىڭ ءبىرىنىڭ ىرگەتاسىن قالاۋعا كىرىسكەن. ءتورت سەكتسيادان تۇراتىن ۇيدە 144 پاتەر بولادى. جىلدىڭ ورتاسىنا قاراي ءۇيدىڭ ىرگەتاسىن ەندى قۇيىپ جاتقان قۇرىلىس كومپانياسى جەلتوقسان ايىندا تۇرعىندارعا پاتەر كىلتىن دە تاپسىرماق. مۇنىڭ بارلىعى دا جاڭا تەحنولوگيامەن جاسالعان قۇرىلىس ماتەريالىنا بايلانىستى ەكەن. ءۇي تۇتاستاي پەنوپلاستان جاسالعان قابىرعا بلوكتارمەن سالىنادى.
– پەنوپلاستى ءححى عاسىردىڭ قۇرىلىس ماتەريالى دەپ اتايدى. ونىڭ ەنى 30 سانتيمەتر, كىرپىشتەن سالىنعان ءۇيدىڭ قابىرعاسىنداي بولادى. پەنوپلاست جىلىتقىش ماتەريالدىڭ ورنىن اۋىستىرادى. سالىنعان ءۇي جىلىلىعىمەن, تازالىعىمەن ەرەكشەلەنەدى. كانادا مەن رەسەيدىڭ كوپتەگەن قالالارىندا تۇرعىن ۇيلەردىڭ قانداي ءتۇرى بولسا دا وسىندايدان تۇرعىزىلادى, – دەيدى «يرينا ي ك» سەرىكتەستىگىنىڭ جەتەكشىسى الەكساندر كورچينسكي.
الەكساندر ۆاسيلەۆيچتىڭ ايتۋىنشا, پەنوپلاستان سالىنعان ءۇي كىرپىشتەن ورىلگەن ۇيگە قاراعاندا 25 پايىز ارزانعا تۇسەدى. كۇن ءوتكىزبەگەندىكتەن جازدا سالقىن, ال قىستا جىلۋدى سىرتقا شاشىراتپاعاندىقتان جىلى بولادى.
ءنازيرا جارىمبەتوۆا,
«ەگەمەن قازاقستان»