ينتەرنەت-ترافيكپەن الماسۋ نۇكتەلەرىن قۇرۋ تۋرالى ماسەلە ينۆەستيتسيالار جانە دامۋ مينيسترلىگىنىڭ بايلانىس, اقپاراتتاندىرۋ جانە اقپارات كوميتەتىندە وتكەن باسقوسۋدا تالقىلاندى. جيىنعا ۆيتسە-مينيستر ساكەن سارسەنوۆ توراعالىق ەتتى. وعان «كسەلل», «كار-تەل», «موبايل تەلەكوم-سەرۆيس», «قازاقتەلەكوم», «ترانستەلەكوم», «قازترانسكوم», Astel جانە «مەملەكەتتىك تەحنيكالىق قىزمەت» رمك, TNS plus سياقتى كومپانيالاردىڭ جەتەكشىلەرى قاتىستى.
جيىندا بايلانىس وپەراتورلارىنىڭ جۇمىسىنا قاتىستى بىرقاتار ماسەلە تالقىلانىپ, الداعى ەكسپو-2017 كورمەسىنە وراي ەلدەگى بايلانىس جۇيەسىن بارىنشا جاقسارتۋ جايى قارالدى. كورمەنىڭ وتەر ۋاقىتى جاقىنداپ قالعانى بەلگىلى. وسىعان بايلانىستى ونداعى بارلىق بازالىق ستانسالاردى قۇرىپ, ورناتۋ جۇمىستارىن 2016 جىلدىڭ قازان ايىنا دەيىن اياقتاۋ جونىندە تاپسىرما بەرىلدى. بۇل رەتتە ەلىمىزدە پيرينگتىك ورتالىق قۇرۋدىڭ ماڭىزدىلىعى ايتىلدى. وعان ارنايى جۇمىس توبىن قۇرۋ تۋرالى شەشىم قابىلداندى. جوبانى جۇزەگە اسىرۋ پروۆايدەرلەردىڭ شىعىندارىن وڭتايلاندىرۋ جانە تۇپكى پايدالانۋشىلارعا ينتەرنەت-قىزمەتتەرىن كورسەتۋ تاريفتەرىن تومەندەتۋگە مۇمكىندىك بەرەدى. ترافيكپەن الماسۋدىڭ مۇنداي نۇكتەسىن قۇرۋ جالپى العاندا ينتەرنەت نارىعىنىڭ قازاقستاندىق سەگمەنتىن دامىتۋعا تۇرتكى بولۋعا مۇمكىندىك بەرمەك. وپەراتورلار اراسىندا ترافيكتىڭ ءوتۋ مارشرۋتتارىن وڭتايلاندىرۋ, جەلىلىك مالىمەتتەر پاكەتىن جىبەرۋ ۋاقىتىن قىسقارتۋ, قىمباتقا تۇسەتىن حالىقارالىق بايلانىس ارنالاردىڭ جۇكتەمەلەرىن ازايتۋ سياقتى ماسەلەلەردى ەندى وسىنداي ورتالىق رەتكە كەلتىرەدى دەپ كۇتىلەدى. مۇنداي ءوزارا ءىس-ارەكەتتەر ينتەرنەت-ترافيكتىڭ ءوتۋ مارشرۋتتارىن وڭتايلاندىرۋعا ىقپال جاسايدى, سونىڭ ناتيجەسىندە قىمباتقا تۇسەتىن حالىقارالىق ينتەرنەت-ارنالارىنىڭ جۇكتەمەلەرىن تومەندەتۋگە كومەكتەسەدى, ناتيجەسىندە ينتەرنەت قىزمەتتەرى نارىعىندا قازاقستاندىق سەگمەنتتىڭ دامۋ ديناميكاسىنا وڭتايلى ىقپال جاسايدى دەپ بولجانۋدا.
«ەگەمەن اقپارات»