مەيىرىمدى, راقىمدى اللانىڭ اتىمەن باستايمىن!
مەنىڭ ماڭدايىما ەلباسى نۇرسۇلتان نازارباەۆپەن بىرنەشە رەت كەزدەسىپ, اۋىزبا-اۋىز سويلەسۋ باقىتى بۇيىردى. العاش رەت 1991 جىلى ول جەزقازعان وبلىسىنا الداعى بولاتىن پرەزيدەنت سايلاۋىنا تۇسەتىن كانديدات رەتىندە كەلگەندە كەزدەستىك. مەن ول كەزدە وبلىستىڭ باس يمامى ەدىم. اۋەجايدان قارسى الۋ كەزىندە قاسىمدا وبلىستىڭ بەلگىلى اقساقالدارى ورداباي يساەۆ پەن ءمۇسىلىم دوسمىرزاەۆ بولعان ەدى. نۇرەكەڭ بىزدەرگە كەلىپ, ءبارىمىزگە قول بەردى. مەن سوندا اقساقالدارعا جۇزىندەگى نۇرىن كوردىڭىزدەر مە, اللا تاعالا پاتشا بولاتىن ادامدارعا وسىنداي ەرەكشە نۇر بەرەدى دەگەن ءسوزدىڭ كىتاپتا بارىن ايتتىم. اقساقالدار باس يزەپ, تاڭعالىپ جاتتى. مىنە, سودان بەرى 20 جىل ۋاقىت ءوتىپتى. ودان كەيىن دە مەن ەلباسىمەن قاراعاندى, سولتۇستىك قازاقستان وبلىستارىندا, استانا مەن الماتى قالالارىندا ءدىن وكىلى رەتىندە دە, قازاقستان حالقى اسسامبلەياسىنىڭ مۇشەسى رەتىندە دە بىرنەشە رەت كەزدەسىپ, قول الىستىم. سول كەزدەردىڭ بارىندە دە ونىڭ جۇزىنەن اللانىڭ بەرگەن نۇرى تايماعانىن, كەرىسىنشە, بۇرىنعىدان دا ايشىقتالا ءتۇسكەنىن بارلايمىن.
ءدىن وكىلى رەتىندە كەزدەسكەندە ەلباسى يسلامنىڭ جاستاردى دۇرىس جولعا ءتاربيەلەۋگە, ۇلتارالىق ءتۇسىنىستىك پەن ءتوزىمدىلىككە شاقىراتىن ىزگى قاسيەتتەرىن كوبىرەك ۋاعىزداۋدى تاپسىراتىن. ءوزىنىڭ دە دىننەن بىلىگى مول ەكەنى اڭعارىلىپ تۇرادى.
2005 جىلدىڭ 19 ساۋىرىندە قازاقستان مۇسىلماندارى ءدىني باسقارماسىنىڭ ءتوراعاسى, باس ءمۇفتي ءابساتتار قاجى دەربىسالى حازىرەتتىڭ ۇيىمداستىرۋىمەن ەلباسىنىڭ قمدب-نىڭ وبلىستارداعى وكىل يمامدارىمەن كەزدەسۋى بولدى. ءبىر ساعاتقا بەلگىلەنگەن كەزدەسۋ ەكى جارىم ساعاتقا سوزىلعاندىعىنىڭ ءوزى كەزدەسۋدىڭ قىزىقتى, ەكى جاققا دا ۇنامدى ءوتكەنىنىڭ بەلگىسى بولسا كەرەك. سونداعى ءسوزى مەن جاۋاپتارى ءبىزدى تاڭعالدىرعان ەدى. ويتكەنى, ەلباسى ءدىني ساۋاتى تەرەڭ ءدىنباسىلاردىڭ اراسىندا عانا قولدانىلاتىن كوپتەگەن ءدىني ۇعىمدار مەن تىركەستەردى ورىندى قولدانىپ وتىردى جانە ءدىننىڭ قاسيەتىن وتە تەرەڭنەن تانيتىنىن ءبىلدىردى. سونىمەن بىرگە ءوزىنىڭ مۇسىلمانداردىڭ ساناۋلىلارىنا عانا اللانىڭ قۇدىرەتىمەن بۇيىراتىن باقىتتى باستان كەشىپ, ساۋد ارابياسىنىڭ پاتشاسى فاحدتىڭ رۇحساتىمەن قاسيەتتى قاعبانىڭ ىشىنە كىرگەنىن ايتىپ ەدى. «قاعبانىڭ ىشىنە ەنگەندە اسپان مەن جەردىڭ اراسىندا قالقىپ بارا جاتقانداي بولدىم», ال قانداي تىلەك تىلەيسىز دەگەندە, ەلگە تىنىشتىق, حالقىما, قازاعىما شاپاعاتىڭدى بەر دەپ تىلەدىم, دەگەن ەدى نۇرەكەڭ.
سول كەزدەسۋدە ماعان دا سويلەۋ باقىتى بۇيىرىپ, ءوزىنىڭ قولداۋى ارقاسىندا سولتۇستىك قازاقستان وبلىسىنىڭ تاريحىندا قىزىلجار قالاسىندا تۇڭعىش رەت وتە ۇلكەن مەشىتتىڭ قۇرىلىسى اياقتالعالى تۇرعانىن ايتىپ, قازىر قالا حالقى ونىڭ ءساۋلەتىنە تاڭىرقاي قىزىعىپ, قۇرىلىستىڭ تەزىرەك اياقتالعانىن اسىعا كۇتىپ ءجانە ونى ءوزىڭىزدىڭ اشىپ بەرگەنىڭىزدى قالاپ ءجۇر دەگەن ەدىم. سول ءسوزىم اياقسىز قالماي, اقىرى مەملەكەت باسشىسى وبلىسقا جۇمىس ساپارىمەن كەلگەندە قىزىلجار مەشىتىن ءوزى اشىپ, ەل-جۇرتتىڭ العىسىن العان ەدى.
مەن ءوزىم تاجىك بالاسىمىن, وتباسىمىزداعى 12 بالانىڭ ءبارى دە ءدىن جولىندا. ءوزىمنىڭ بەس بالام بار, ولاردىڭ ءبارى دە قازاق مەكتەپتەرىندە وقيدى. 2005 جىلى اتالمىش كەزدەسۋدىڭ قارساڭىندا «ەگەمەنگە» شىققان ماقالامدا ءوزىمنىڭ قازاقستاندا تۋىپ, قازاقستان ازاماتى بولعانىمدى ماقتانىش ەتەمىن دەگەن ەدىم. ەلباسى جوعارىدا اتالعان كەزدەسۋدە سول ماقالانى وقىعانىن اتاپ ءوتىپ, مەنىڭ پىكىرلەرىمە ريزاشىلىعىن ءبىلدىردى. مىنە, وسىنداي كەزدەسۋلەر ادامنىڭ ەسىندە ماڭگى-باقي قالاتىن اسەرلەر بەرەدى ەكەن.
مەن ەلباسىنىڭ دىندەر اراسىنداعى تۇسىنىستىككە, ءوزارا توزىمدىلىككە شاقىرعان ساياساتىن جان-تانىممەن قولدايمىن. ريم پاپاسى يوانن پاۆەل ءىى-ءنىڭ قازاقستانعا ساپارى كونفەسسياارالىق تۇسىنىستىكتىڭ ارتۋىنا ۇلكەن ۇلەسىن قوستى. قۇربان ايت پەن روجدەستۆونىڭ مەرەكەلىك كۇندەر بولىپ جاريالانعانى دا مۇسىلماندار مەن حريستيانداردى ءوزارا جاقىنداستىرا ءتۇستى. قازىر حريستيانداردىڭ ءبارى دە مۇسىلمانداردى قۇربان ايتپەن, ال مۇسىلماندار پراۆوسلاۆيەلىكتەردى روجدەستۆومەن جاپپاي قۇتتىقتاپ جاتاتىنىن كوزىمىز كورىپ ءجۇر. اللادان كىتاپ تۇسكەن يۋدايزم, حريستيان جانە يسلام دىندەرىنىڭ بارىندە دە «جاقىن ادامىڭدى وزىڭدەي جاقسى كور» نەمەسە «ءبىر سەنىمدى ۋاعىزدايتىن بارلىق پايعامبارلاردىڭ ۇمبەتتەرى – ءبىزدىڭ باۋىرلارىمىز» دەگەن سوزدەر بار. دەمەك, ءبىزدىڭ الەمدىك جانە ءداستۇرلى دىندەرىمىز ادامدى تەك جاقسىلىققا شاقىراتىنىن ەلباسى تەرەڭنەن تانىپ, ءوزارا جاقىنداستىقتى ءوزىنىڭ ساياساتىندا باسشىلىققا الۋدا.
مەن ەلباسىمىزدىڭ پرەزيدەنتتىك وكىلەتتىگىن 2020 جىلعا دەيىن ۇزارتۋدى جان-تانىممەن قولدايمىن. ءويتكەنى, ول اللانىڭ ءوزى قالاپ, تاققا وتىرعىزعان سۇيىكتى ق ۇلى. احماد جەتكىزگەن ءبىر حاديستە «اللا تاققا وتىرعىزعان ءامىردى كىم قۇرمەت تۇتسا, اللا ونى قۇرمەت تۇتادى» دەيدى. سوندىقتان, اللادان قۇرمەت كۇتسەك, ونىڭ قالاعان ق ۇلىن دا قۇرمەتتەۋىمىز كەرەك.
اللا تاعالا ەلىمىزدى امان, جۇرتىمىزدى تىنىش قىلىپ, ەلباسىمىزدىڭ ىزگى امالدارىنا, قايىرلى جۇمىستارىنا رازى بولىپ, ارقاشاندا ءبىر ءوزى جار بولسىن. ءاۋمين!
جاقيا قاجى ىسمايل, ءدىن قايراتكەرى, قازاقستان حالقى اسسامبلەياسىنىڭ مۇشەسى.