ەلىمىزدى ارالاپ, اقتوبەدەن ارقاعا قاراي بەتتەگەن ازيادا الاۋىن قوستانايدا قىسقى ءشىلدەنىڭ شىمشىلاعان سارىشۇناق ايازى قارسى الدى. سىناپ باعاناسى 30 گرادۋستان تۇسپەي تۇر. ساقىلداعان سارى ايازدى از دەگەندەي, ەكپىندەي سوققان جەلدىڭ ءوزى تيگەن جەرىن جالاپ وتەدى. الايدا الەم كوز تىگىپ, قۇلاق ءتۇرىپ وتىرعان ءVىى قىسقى ازيا ويىندارى الاۋىنىڭ جولىنا قىستىڭ قانداي سۋىعى دا كولدەنەڭ تۇرا المايتىنداي. كوككە تالپىنعان قۇستىڭ قاناتىنداي قۋانىشتى كوڭىل-كۇيدىڭ قاماۋىنداعى قوستانايلىقتار دا جىلى ۇيدە بايىز تاۋىپ وتىرا المادى. جۇرتشىلىق دوستىق پەن بەيبىتشىلىكتىڭ, ەڭبەك پەن تالانتتىڭ, جۇرەكتى تازارتار جاقسىلىقتاردىڭ تابارىگىندەي شىراعدان-وتتى قارسى الۋ ءۇشىن قالا ورتالىعىنا اعىلدى.
مەرەكەلىك بەزەندىرىلگەن ورتالىققا اكەلىنگەن ءVىى قىسقى ازيا ويىندارى الاۋى وبلىس اكىمى سەرگەي كۋلاگينگە تابىس ەتىلدى. ايماق باسشىسى الاۋدى ءال-فارابي كوشەسىمەن العا جىلجىتتى. الاۋ ەستافەتاسى قالانىڭ ورتالىق كوشەلەرىمەن ءجۇرىپ ءوتتى. مۇنان كەيىن الاۋ ءتۇس مەزگىلىندە قوستاناي قالاسىنىڭ قاق ورتاسىندا ءۇش ساعاتتان ارتىق تۇردى. تۇرعىندار ونىڭ جانىنا كەلىپ ەسكەرتكىش سۋرەتكە ءتۇستى, قىزىقتاپ كوردى.
تۇستەن كەيىن ازيادا الاۋىنىڭ ەكىنشى ساتىسى باستالدى. قوستاناي قالاسىنداعى گاگارين كوشەسىنىڭ بويىمەن الاۋدى الىپ ءوتكەندەردىڭ اراسىندا سپورتشىلارمەن قاتار, ارداگەرلەر, جۇمىسشىلار, ونەر ادامدارى دا بار. ولاردىڭ بارلىعى دا قوستانايلىقتار ءۇشىن تانىمال تۇلعالار. الاۋگەرلەردىڭ ءبىرى ۆالەري ءبوريسوۆتىڭ ەسىمى وبلىس جۇرتشىلىعىنا جاقسى تانىس. ول جەڭىل اتلەتيكادان ءۇش وليمپيا ويىندارىنا قاتىستى, ازيا چەمپيونى.
الاۋگەرلەردىڭ اراسىنداعى ارداگەر, شاڭعىدان ەڭبەك سىڭىرگەن سپورت شەبەرى, وليمپيادا جۇلدەگەرى, قازاقستاننىڭ ەڭبەك سىڭىرگەن جاتتىقتىرۋشىسى يۆان گارانيننىڭ قازاقستاندىق شاڭعىشىلاردىڭ ەلىمىز قورجىنىنا التىن سالارىنا ەشقانداي كۇمانى جوق.
– ءVىى قىسقى ازيا ويىندارى سياقتى ۇلكەن شارانىڭ قازاقستاندا ءوتۋى, بۇل ەڭ الدىمەن, جاۋاپكەرشىلىك, – دەيدى سپورت ارداگەرى يۆان يۆانوۆيچ. – بيىك دەڭگەيدەگى سپورت دوداسى تەك قازاقستاندىق ەمەس, تۇگەل ازيا حالىقتارىنىڭ دوستىعىن پاش ەتەدى. مەن وسى شاراعا ەلىمىزدىڭ شىعىسىنان قاتىساتىن شاڭعىشىلارعا سەنەمىن. ويتكەنى, جىگىتتەردىڭ جاتتىقتىرۋشىلارى بىلىكتى ماماندار. قازاقستاندىق نامىس ءبىر بولعاندىقتان, قوستانايدا جاتىپ, وسكەمەندىك شاڭعىشىلارعا جانكۇيەر بولامىن.
جانكۇيەر دەمەكشى, قوستانايدان ءVىى قىسقى ازيا ويىندارىنا توعىز كونكيشى قىسقى سپورتتىڭ ەكى تۇرىنەن قاتىسادى. قوستانايلىقتار تىلەگى ولاردى دا قاناتتاندىراتىن بولادى. قالانىڭ قاق ورتاسىمەن ءجۇرىپ وتكەن الاۋدى ۇستاعانداردىڭ اراسىندا سپورت ويىندارى مەن سپورتشىلاردىڭ جەڭىسىن جانكۇيەرگە جەتكىزىپ وتىراتىن ءوزىمىزدىڭ قالامداستاردىڭ دا بولۋى زاڭدىلىق ەدى. شاڭعى تەبۋدەن سپورت شەبەرى جانە وبلىستىق «قازاقستان-قوستاناي» تەلەارناسىنىڭ سپورت شولۋشىسى اناتولي گاۆريلوۆ, س.بەردىقۇلوۆ اتىنداعى رەسپۋبليكالىق بايقاۋدىڭ لاۋرەاتى سەرگەي بيركلەمەن قاتار, «ەگەمەن قازاقستان» گازەتىنىڭ ءتىلشىسى, رەسپۋبليكالىق جۋرناليستەر بايقاۋىنىڭ جەڭىمپازى داستان كەنجالين دە الاۋدى 19-شى بولىپ الىپ ءوتتى.
الاۋ قالا ءىشىن ارالاعاننان كەيىن مەرەكەلىك شارا مۇز ايدىنى بار سپورت سارايىنداعى گالا-كونتسەرتكە ۇلاستى. كەشكە قوستانايلىقتار ازيادا الاۋىن سالتاناتتى تۇردە پەتروپاۆل قالاسىنا شىعارىپ سالدى.
ءنازيرا جارىمبەتوۆا.
قوستاناي.