17 قاڭتاردا قازاقستان رەسپۋبليكاسىنىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆ ەقىۇ-نىڭ ءىس باسىنداعى توراعاسى – ليتۆا رەسپۋبليكاسىنىڭ سىرتقى ىستەر ءمينيسترى اۋدرونيۋس اجۋباليسپەن تەلەفون ارقىلى سويلەستى, دەپ حابارلادى قازاقستان رەسپۋبليكاسى سىرتقى ىستەر مينيسترلىگىنىڭ ءباسپاسوز قىزمەتى.
ليتۆا سىرتقى ساياسات ۆەدومستۆوسىنىڭ باسشىسى قازاقستاننىڭ 2010 جىلعى ەقىۇ-داعى ءتوراعالىعىن جەمىستى اتقارعاندىعى تۋرالى ايتا كەلىپ, قول جەتكىزىلگەن جەتىستىكتەردى جالعاستىرۋ ماقساتىندا قازاقستانمەن تىعىز ىنتىماقتاستىق ورناتۋعا نيەتتى ەكەنىن مالىمدەدى. ول قازاقستاندىق ءتوراعالىقتىڭ بىرقاتار باسىمدىقتارى, اتاپ ايتقاندا, ورتالىق ازياداعى جانە ەڭ باستىسى, قىرعىزستانداعى جاعداي ليتۆالىق توراعالىقتىڭ دا باستى ماسەلەلەرى بولىپ قالا بەرەتىنىن اتاپ كورسەتتى.
ق.ساۋداباەۆ ءوزىنىڭ ارىپتەسىن ەقىۇ ءىس باسىنداعى توراعالىعىنا وتىرۋىنا جانە ليتۆالىق توراعالىقتىڭ يناۋگۋراتسياسىنىڭ وتۋىنە وراي قۇتتىقتاي وتىرىپ, ساباقتاستىق ءپرينتسيپىنىڭ ماڭىزدىلىعىن راستادى جانە ليتۆا تاراپىمەن ەكىجاقتى نەگىزدە دە, ەقىۇ «ۇشتىگىنىڭ» شەڭبەرىندە دە بىرلەسكەن ۇيلەسىمدى جۇمىس جاساۋعا دايىن ەكەندىگىن جەتكىزدى.
سونىمەن قاتار, تاراپتار قازاقستان-ليتۆا قارىم-قاتىناسىنىڭ جاعدايى مەن بولاشاعىن تالقىعا سالدى. تاراپتار ەكىجاقتى ىنتىماقتاستىققا اعىمداعى جىلدىڭ بارىسىندا جوسپارلانىپ وتىرعان قازاقستان پرەزيدەنتى نۇرسۇلتان نازارباەۆ پەن ليتۆا پرەزيدەنتى داليا گريباۋسكايتەنىڭ كەلىسسوزدەرى جاڭا سەرپىلىس بەرەتىنىنە سەنىم ارتتى.