قازاقستان ۇلتتىق جاراتىلىستانۋ عىلىمدارى اكادەمياسىنىڭ پرەزيدەنتى نۇرتاي ابىقاەۆتىڭ توراعالىعىمەن وتكەن كەزەكتى تورالقا ماجىلىسىندە اكادەميا مۇشەلەرى ەلباسى نۇرسۇلتان نازارباەۆتىڭ وكىلەتتىگىن 2020 جىلعا دەيىن ۇزارتۋ بويىنشا رەفەرەندۋم وتكىزۋ باستاماسىن قولداۋ ماقساتىندا قۇرىلعان «نۇر وتان» حالىقتىق-دەموكراتيالىق پارتياسىنىڭ «قازاقستان-2020» اتتى دەموكراتيالىق كۇشتەردىڭ جالپىۇلتتىق كواليتسياسىنا كىرەتىندىگىن مالىمدەدى.
ماجىلىستە ءسوز العان تورالقا مۇشەلەرى قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ وكىلەتتىگىن ۇزارتۋ تۋرالى رەفەرەندۋم وتكىزۋگە قولداۋ ءبىلدىرگەندەردىڭ سانى 5 ميلليوننان اسۋى ەلدىڭ ەلباسىنا ەرەكشە قۇرمەتىن ءارى وعان دەگەن سەنىمىن كورسەتەتىنىن اتاپ ءوتتى.
ەلباسى قازاقستاندى باسقارعان العاشقى جىلدان باستاپ ءوزىنىڭ كورەگەن باسشىلىعى مەن سارابدال ساياساتى ارقاسىندا الەمدىك دەرجاۆالاردى مويىنداتقان تۇلعا رەتىندە, ەلدىڭ الەۋمەتتىك-ەكونوميكالىق جانە رۋحاني-ءمادەني دامۋىنا پايىم-پاراساتىن, كۇش-جىگەرىن اياماي جۇمساپ كەلەدى. وتانىمىزدىڭ ءبىلىمى مەن عىلىمىنا دەگەن كورەگەندىك كوزقاراسى تىم ەرەكشە. ۇستىمىزدەگى جىلدىڭ 1 قاڭتارىنان باستاپ قازاقستان رەسپۋبليكاسىندا ءبىلىمدى دامىتۋدىڭ 2011-2020 جىلدارعا ارنالعان مەملەكەتتىك باعدارلاماسى ەلباسى جارلىعىمەن جۇزەگە اسا باستادى. ەلىمىزدىڭ ونجىلدىقتا الار اسۋى ايقىندالعان باعدارلامادا وتانىمىزدا ءبىلىمدى ۇرپاقتى وقىتىپ, تاربيەلەپ ءوسىرۋ ماسەلەلەرى ايقىندالعان. اسىرەسە, دارىندى جاستاردى الەمدىك اتى شىققان ۋنيۆەرسيتەتتەردە وقىتۋ يدەياسىنىڭ اۆتورى دا نۇرسۇلتان ءابىش ۇلى ەكەنىن ءاربىر قازاقستاندىق ەرەكشە ماقتانىشپەن ايتادى. عىلىم مەن يننوۆاتسيانى كەڭىنەن دامىتۋ كۇن تالابى ەكەنىن ءدوپ باسقان ەلباسى, عىلىمدى دامىتۋدى ورىستەتۋ ماقساتىندا قارجىلاندىرۋدىڭ بىرنەشە تەتىكتەرىن ۇسىنىپ, عىلىمي جوبالاردى ىسكە اسىرۋ ءۇشىن تىكەلەي عالىمداردىڭ وزىنە بەرىلەتىن گرانتتىق قارجىلاندىرۋدى ۇسىندى. مۇنى عىلىمي كوپشىلىك كوپتەن كۇتكەن ەدى. ۇزاق مەرزىمگە باعدارلامالار جاساۋدا پرەزيدەنتتىڭ كورەگەندىگىن بىردەن بايقاۋعا بولادى. ەلىمىزدىڭ عىلىمي-يننوۆاتسيالىق وركەندەۋىنە باعىتتالعان ۇدەمەلى يندۋستريالىق-يننوۆاتسيالىق دامۋ مەملەكەتتىك باعدارلاماسىندا ادامي كاپيتالدى دامىتۋعا مىقتاپ دەن قويۋى ەلىمىزدىڭ ەرتەڭىن ويلاعان باسشىنىڭ عانا قولىنان كەلەتىن شارۋا. پارلامەنت ماجىلىسىندە ماقۇلدانعان «عىلىم تۋرالى» زاڭ جوباسىندا ەلدىڭ بولاشاعى ءۇشىن ايانباي ەڭبەك ەتىپ جاتقان عالىمداردىڭ ءمارتەبەسىن ارتتىرۋعا باپتاردىڭ ەنگىزىلۋى تىكەلەي ەلباسىنىڭ تاپسىرماسىمەن ورىندالعانىن وتاندىق وقىمىستىلار ورىندى ماقتان ەتەدى. بىزدەر, عالىمدار, ەلباسىنىڭ 2030 جىلدارعا دەيىنگى كەزەڭگە ارنالعان ستراتەگيالىق جوسپارلارىن ىسكە اسىرۋعا ءمۇمكىندىك بەرۋىمىز كەرەك دەپ ەسەپتەيمىن. سوندىقتان, ۇلتتىق جاراتىلىستانۋ عىلىمدارى اكادەمياسىنىڭ رەفەرەندۋم وتكىزۋ ماقساتىندا قۇرىلعان كواليتسياعا كىرۋىن قولداۋلارىڭىزدى سۇرايمىن, دەدى وسى اكادەميانىڭ ۆيتسە-پرەزيدەنتى, اكادەميك كارىمبەك قۇرماناليەۆ.
ماجىلىستە شىعىپ سويلەگەن تورالقا مۇشەلەرى ب.ءابدىراسىلوۆ, ن.بەكتۇرعانوۆ, ە.وماروۆ, س.ماۋسىمباەۆ جانە باسقالار ەلباسى نۇرسۇلتان نازارباەۆتىڭ پرەزيدەنتتىك وكىلەتتىگىن 2020 جىلعا دەيىن ۇزارتۋ بويىنشا رەفەرەندۋم وتكىزۋ باستاماسىن قولداۋ ماقساتىندا «نۇر وتان» حالىقتىق-دەموكراتيالىق پارتياسىنىڭ باستاماسىمەن قۇرىلعان كواليتسياعا اكادەميانىڭ كىرگەنىن ءجون كورەتىندىگىن جانە قولدايتىندىعىن تىلگە تيەك ەتتى.
ۇسىنىس ءبىراۋىزدان قابىلداندى.
«ەگەمەن-اقپارات».