اتىراۋ جۇرتشىلىعى دا ءار جىلدارى ءوڭىردى باسقارعان اكىمدەردىڭ جۇمىسىن ىسكەرلىك تۇرعىسىنان باعالايدى. وتكەن سەنبىدە ەلباسى جارلىعىمەن اتىراۋ وبلىسىنىڭ اكىمى بولىپ تاعايىندالعان نۇرلان نوعاەۆتىڭ دا ىسكەرلىك تانىتاتىنىنا بەك سەنەدى.
پرەمەر-مينيستر كارىم ءماسىموۆ وبلىس اكتيۆىنە تانىستىرعان ايماقتىڭ جاڭا باسشىسىنىڭ وسى قىرىنا توقتالىپ ءوتتى. جيىنعا پرەزيدەنت اكىمشىلىگىنىڭ باسشىسى نۇرلان نىعماتۋلين قاتىستى.
ال ك.ءماسىموۆ وبلىستى 4 جىلعا جۋىق باسقارعان باقتىقوجا ىزمۇحامبەتوۆتىڭ جاڭادان جۇمىسىن باستاعان VI شاقىرىلىمداعى پارلامەنت ءماجىلىسىنىڭ توراعاسى بولىپ سايلانعانىن حاباردار ەتىپ, ول جەتەكشىلىك ەتكەن جىلدارى ءوڭىردىڭ الەۋمەتتىك-ەكونوميكالىق وركەندەۋىنە ءوز ۇلەسىن قوسقانىنا توقتالدى. وسىعان بايلانىستى ەلباسىنىڭ وتاندىق ەكونوميكا ءۇشىن ستراتەگيالىق ماڭىزى ايرىقشا زور وبلىستى باسقارۋ جونىندەگى تاڭداۋى نۇرلان نوعاەۆقا ءتۇسىپ وتىر.
مۇنداي تاڭداۋ جاساۋدىڭ بىرنەشە سەبەبى بار. بىرىنشىدەن, نۇرلان نوعاەۆ – بىرنەشە ماماندىقتى مەڭگەرگەن, بىرنەشە ءتىلدى بىلەدى. ونىڭ نەگىزگى ماماندىعى – مۇنايشى, دەمەك, اتىراۋ سەكىلدى ءبىر عاسىر مەرزىمنەن بەرى «قارا التىن» وندىرىلەتىن ءوڭىر ەكونوميكاسىنىڭ جەتەكشى سالاسىمەن جەتە تانىس.
ولاي دەيتىنىمىز, ون جىلداي, ياعني 1996-2006 جىلدارى وسى سالاداعى وتاندىق جانە شەتەلدىك ينۆەستورلارمەن بىرلەسە قۇرىلعان كاسىپورىنداردا دا, ءتىپتى, ەنەرگەتيكا جانە مينەرالدى رەسۋرستار مينيسترلىگىندە دە جۇمىس ىستەپ, تابيعي بايلىقتى ەل يگىلىگىنە جاراتۋدىڭ قىر-سىرىنا قانىققان دەۋگە بولادى.
ەكىنشىدەن, مەملەكەتتىك باسقارۋدا دا تولىمدى تاجىريبە جيناعان. ناقتىلاي ايتقاندا, 2007 جىلدان بەرى باتىس قازاقستان وبلىسىنىڭ باسقارۋ سالاسىندا اۋەلى وبلىس اكىمىنىڭ ورىنباسارى, كەيىن ءبىرىنشى ورىنباسارى لاۋازىمىندا بولعان. ال سوڭعى 4 جىلدان بەرى اقجايىق ەلى اتانعان ءوڭىردى ابىرويلى باسقاردى.
وسى تۇرعىدان ايتقاندا, ەلباسى تاراپىنان اتىراۋ ءوڭىرىنىڭ باسقارۋ تىزگىنىن قولعا العان جاڭا اكىمگە ارتىلاتىن سەنىم دە, جۇكتەلەتىن جاۋاپكەرشىلىك تە جوعارى ەكەنى اڭعارىلادى. ءويتكەنى, وزگە وڭىرلەر سەكىلدى اتىراۋدىڭ دا ەكونوميكاسىن ءارتاراپتاندىرۋ ماسەلەسى ءوزىنىڭ ماڭىزىن جويمايدى. سونىمەن بىرگە, ءوڭىردە ءالى شەشىمىن كۇتكەن كۇردەلى ءماسەلەلەر جەتكىلىكتى.
ۇكىمەت باسشىسى جاڭا باسشىنىڭ قويناۋى «قارا التىنعا» تولى اتىراۋ ەكونوميكاسىن وركەندەتۋدە, ەلباسى تاپسىرمالارىن جەرگىلىكتى جەردە تابىستى ءىسكە اسىرۋدا تاجىريبەسىنىڭ جەتكىلىكتىلىگىنە توقتالدى.
جولداسبەك شوپەعۇل,
«ەگەمەن قازاقستان».
اتىراۋ.