وتكەن جەكسەنبى, 27 ناۋرىز كۇنى تاڭەرتەڭ استانا اەروپورتىندا توتەنشە جاعداي ورىن الدى. قىزىلوردادان ۇشىپ كەلگەن Bek Air اۆياكومپانياسى Fokker 100 ۇشاعىنىڭ الدىڭعى شاسسيلەرى ەلوردا اۋە الاڭىنا قونۋ كەزىندە شىقپاي قالدى. وسىعان بايلانىستى ەكيپاجعا تاۋەكەلگە بەل بۋىپ, لاينەردى الدىڭعى دوڭعالاقتارسىز قوندىرۋعا تۋرا كەلدى.
بورت كومانديرى اپاتتى جاعدايدا جەرگە قونۋ جونىندە شەشىم قابىلداعانعا دەيىن اۋە كەمەسى اەروپورتتىڭ ۇستىندە 40-45 مينۋتتاي ۋاقىت ۇشىپ ءجۇردى. وسى ەكى ورتادا جەردەگى قىزمەت تۇرلەرى ماشينانىڭ جەرگە قونعان كەزىندە قىزىپ, جانىپ كەتپەۋى ءۇشىن قونۋ-ۇشۋ الاڭىن كوبىكپەن تولتىرىپ ۇلگەردى. كەيىن جەرگىلىكتى تەلەارنالارعا بەرگەن سۇحباتى بارىسىندا ەكيپاج كومانديرى دميتري رودين ءوزىنىڭ 35 جىلدىق ۇشۋ ءتاجىريبەسىندە مۇنداي جاعدايدىڭ ءبىرىنشى رەت كەزدەسىپ تۇرعانىن ايتتى. ول ۇشاقتى قوندىرۋ ءجونىندە شەشىم قابىلداي وتىرىپ, بارلىعىن نۇسقاۋعا سايكەس جاساۋعا كۇش سالدى. مۇنداعى باستى مىندەت نەگىزگى دوڭعالاقتاردىڭ تاباندارى جەرگە تيگەن كەزدە «جەرگە بىردەن قۇلاپ كەتپەس ءۇشىن كابينانى ۇستاپ قالۋ» بولعان. ۇشاق كوبىك توگىلىپ تاستالعان بەلدەۋگە قونعاننان كەيىن 25-30 مەتردەي جەردى «تۇمسىعىمەن» ءسۇزىپ وتە شىققان.
اۆياكومپانيا وكىلدەرىنىڭ ايتۋلارىنشا, اۋە لاينەرى قونار كەزىندە «بارىنشا از زاقىمعا ۇشىراعان», سونىڭ ارقاسىندا بورتتاعى 116 جولاۋشى مەن 5 ەكيپاج مۇشەسىنىڭ ەشقايسىسى زارداپ شەكپەگەن.
سودان كەيىن استانا اەروپورتى ورىن العان توتەنشە وقيعاعا بايلانىستى بىرنەشە ساعات جۇمىسىن توقتاتۋعا ءماجبۇر بولىپ, اۆياكومپانيانىڭ بىرقاتار رەيستەرى كىدىرتىلگەن.
ەلوردانىڭ اۋە الاڭىندا ءتوتەنشە جاعداي ورىن العانى تۋرالى دابىل كوتەرىلگەن بويدا ينۆەستيتسيالار جانە دامۋ مينيسترى اسەت يسەكەشەۆ سوندا جەتىپ, سوڭىنان ەكيپاج مۇشەلەرىمەن كەزدەسىپ, جاعدايعا قانىقتى. ول ءوزىنىڭ سوزىندە وسىنداي قيىن شاقتا ۇرەيگە بوي الدىرماي, ءبارىن ۇلكەن شەبەرلىك پەن شىدامدىلىق دەڭگەيىندە اتقارىپ شىققان, ءسويتىپ, اۋە كەمەسىن جەرگە امان-ەسەن قوندىرعان ەكيپاجدىڭ ەرلىگىنە جوعارى باعا بەردى. قازىر وسىنداي ۇزدىك پيلوتاج ۇلگىسىن كورسەتىپ, ۇلكەن شەبەرلىك تانىتقان ەكيپاج مۇشەلەرىن, اسىرەسە, ونىڭ كومانديرىن مەملەكەتتىك جانە ۆەدومستۆولىق ناگرادالارعا ۇسىنۋ جونىندە ءسوز قوزعالىپ جاتىر.
سونىمەن بىرگە, باس پروكۋراتۋرا ۇشاقتىڭ اپاتتى جاعدايدا قونۋعا ءماجبۇر بولۋىنا بايلانىستى قىلمىستىق ءىس قوزعادى. ول «اۋە كولىگى قوزعالىسى جانە ونى پايدالانۋ قاۋىپسىزدىگى ەرەجەلەرىنىڭ بۇزىلۋى» بابى بويىنشا تەكسەرۋ جۇمىستارىن جۇرگىزەدى. سونداي-اق, ينۆەستيتسيالار جانە دامۋ مينيسترلىگىنىڭ ارنايى كوميسسياسى Bek Air اۆياكومپانياسى ۇشاعىنىڭ استانا اەروپورتىنا اپاتتى جاعدايدا قونۋىنىڭ سەبەپتەرىن انىقتايتىن بولادى.
مۇرات ايتقوجا.