سەنات توراعاسى قاسىم-جومارت توقاەۆ سينگاپۋر رەسپۋبليكاسىنىڭ قازاقستان رەسپۋبليكاسىنداعى ەلشىسى زۋلكيفلي بين ءباحارۋديندى ونىڭ ءوتىنىشى بويىنشا قابىلدادى, دەپ حابارلادى وسى پالاتانىڭ ءباسپاسوز قىزمەتى.
اڭگىمە بارىسىندا ەكىجاقتى ىنتىماقتاستىقتىڭ وزەكتى ماسەلەلەرى, سونداي-اق, سينگاپۋر پارلامەنتى توراعاسىنىڭ شاقىرۋى بويىنشا سەنات توراعاسىنىڭ الداعى (31 ناۋرىز – 2 ءساۋىر) سينگاپۋرعا ساپارىنا ازىرلىك جايى تالقىلاندى. ق.توقاەۆ اتاپ وتكەندەي, قازاقستان سينگاپۋرمەن ەكونوميكا سالاسىنداعى ىنتىماقتاستىقتى نىعايتۋعا, سونداي-اق, پارلامەنتارالىق ۇنقاتىسۋدى دامىتۋعا ءۇمىت ارتادى.
ەلشىنىڭ ايتۋىنشا, سينگاپۋردا قازاقستان پارلامەنتى سەناتى توراعاسىنىڭ ساپارىن جانە ونىڭ جىل سايىنعى سينگاپۋر فورۋمىنا قاتىسۋىن, ازيا قۇرلىعىنداعى ىنتىماقتاستىقتىڭ وزەكتى ماسەلەلەرى بويىنشا نەگىزگى بايانداماسىن زور ىقىلاسپەن كۇتۋدە.