«ۋلىبكا» قايىرىمدىلىق قورىنىڭ اتاۋىنا قاراپ كەيبىرەۋلەر ىزگىلىك شارالارمەن عانا اينالىساتىن شىعار دەپ ويلاپ قالۋى مۇمكىن. ولاي دەسە قاتەلەسەدى. ءيا, باستاپقىدا تۇرمىسى تومەن وتباسىلاردىڭ كىشكەنتاي بۇلدىرشىندەرىنە ىزگىلىك كومەك قولىن سوزۋ ماقساتىمەن قۇرىلعانى راس. كەيىن كەلە جۇمىس اۋقىمى كەڭەيىپ, سان-سالالى باعىتتا ءوربىدى. ول جونىندە قوردىڭ پرەزيدەنتى گالينا بوندارەنكو بىلاي دەپ ەسكە الادى:
– وبلىستىق تەلەارنادا قىزمەت اتقارىپ جۇرگەندە تاعدىرى قيلى بالالارمەن, از قامتىلعان وتباسىلارمەن ءجيى جۇزدەسەتىنمىن. ءار كەزدەسكەن سايىن جۇرەگىم سىزدايتىن. اسىرەسە, ءتۋابىتتى ناۋقاسقا شالدىققان ءبۇلدىرشىندەردى كورگەندە جانىمدى قويارعا جەر تاپپايتىنمىن. بىردە ءۇبىرلى-ءشۇبىرلى شاڭىراققا بارعانىمدا الدىمنان ءتورت جاستاعى ءسابي جۇگىرە شىعىپ, «تاتە, ماعان ۆەلوسيپەد اكەلدى», دەپ شاتتانا ايعاي سالعانى. قاتتى قىسىلدىم. قولىمدا تەلەۆيدەنيەنىڭ جابدىعىنان باسقا ەشتەڭە جوق بولاتىن. ءسويتسە, الدەبىرەۋلەر وعان ۋادە بەرىپ, ەسىك قوڭىراۋلاتقان سايىن ەلەگىزەدى ەكەن. ويلانا-تولعانا كەلىپ, دارمەنسىز جاندارعا قولىمنان كەلگەنشە نەگە قورعان بولماسقا دەگەن شەشىمگە كەلىپ, قىر-سىرى بەيمالىم كاسىپپەن اينالىسۋعا تاۋەكەل ەتتىم. ءىسىم ءا دەگەننەن دوڭگەلەنىپ كەتتى دەسەم, شىندىققا جاناسپاس. كوپ قيىندىقتاردى باستان وتكەردىم. قوعامدىق نەگىزدە جاردەم جاساۋ مەن كۇتكەننەن دە كۇردەلى بولىپ شىقتى. اسىرەسە, دەمەۋشىلەر تابۋ وتە قيىنعا سوقتى. جالعا العان مەكەمە ءۇشىن ايىنا 200 مىڭ تەڭگەگە دەيىن تولەپ جۇردىك. قارىزدانىپ-قاۋعالانىپ, ءبىر تانىسىمنىڭ قارجىلىق قولداۋى, بانكتەن نەسيە الىپ, نە كەرەك, العا قويعان ماقساتىمىز ورىندالىپ, «ۋلىبكا» قايىرىمدىلىق قورى قۇرىلدى. كەيىن كوپشىلىكتىڭ سۇراۋى بويىنشا قالادان شەتكەرىلەۋ ورنالاسقان 20-شى شاعىن اۋداندا «فەيا» دەگەن اتپەن ينكليۋزيۆتى ءبىلىم بەرۋ-ساۋىقتىرۋ-كوڭىل كوتەرۋ ورتالىعى ۇيىمداستىرىلدى. مۇندا ساۋ جانە دىمكاس ءبۇلدىرشىندەردىڭ بويىنىڭ دا, ويىنىڭ دا, كۇش-قۋاتىنىڭ دا ويداعىداي قالىپتاسۋىنا بارلىق مۇمكىندىكتەر قاراستىرىلعان. ءورىسىمىز كەڭەيگەننەن كەيىن كەسەلى اۋىر بالالارعا ماتەريالدىق قولداۋ دا كورسەتىپ كەلەمىز.
بۇگىنگى تاڭدا قوس ورتالىققا 1 جاستان 7 جاسقا دەيىنگى 100-گە جۋىق بالاقاي قاتىنايدى. ارالارىندا ءتۋابىتتى مۇگەدەكتەر, جازىلمايتىن دەرتكە ۇرىنعاندار از ەمەس. بالالاردىڭ شىعارماشىلىق قارىم-قابىلەتىن وياتىپ, كەسەلدەن ەمدەلۋگە ەڭ وزىق ادىستەر مەن بىلىكتى ماماندار جۇمىلدىرىلعان. تاجىريبەلى پسيحولوگ, لوگوپەد, ماسساجشى, انيماتور, حورەوگراف سەكىلدى 15 ادام جۇمىس ىستەيدى. ءيا, يسراەليان اعىلشىن ءتىلىن وقىتسا, اندرەي سەليۆانوۆ شىعىس جەكپە-جەگىنە جاتتىقتىرادى. ەندى قازاقتىڭ ونەرىن تاراتۋ, ونىڭ ىشىندە, دومبىرا تارتۋعا ۇيرەتۋ سەكىلدى مىندەت تۇر. باعدارلامادا العا تارتىلعان نەگىزگى الەۋمەتتىك يدەياسى – مۇگەدەك, جەتىم جانە اتا-انانىڭ قاراۋىنسىز قالعان بالالاردى بارىنشا تارتا وتىرىپ, جىلىلىق شۋاعىن سىيلاۋ.
گالينا بالالارعا قاتىستى كوپتەگەن شارالارعا ۇيىتقى بولىپ كەلەدى. قازاقستان حالقى اسسامبلەياسىنىڭ وبلىستىق ءبولىمشەسىمەن بىرىگىپ وتكىزگەن «جاقسىلىق جاسا!» اتتى اكتسيا وزگەلەر تاراپىنان كەڭ قولداۋ تاپتى. بۇل باستاماعا ءبىلىم وشاقتارى دا قىزۋ ءۇن قوسىپ, شوۋ-ويىندار, قايىرىمدىلىق كونتسەرتتەر, جارمەڭكەلەر ۇيىمداستىرىلدى. ونىڭ سوڭى قالالىق مادەنيەت ۇيىندەگى وتكەن تاعىلىمدى شارامەن ءتۇيىندەلدى. مۇنداي يگى ىستەردەن «كانتسماركەت», «اپەلسين», «رادۋجنىي» سياقتى شاعىن جانە ورتا بيزنەس سۋبەكتىلەرى شەت قالعان ەمەس. ال, «راحمەت», «مەدەۋ», «اپورت», تاعى باسقا ساۋدا ورتالىقتارىندا كيىم-كەشەكتەر مەن قارجى جيناۋعا ارنالعان ارنايى جاشىكتەر قويىلىپ, ءبىرىنشى كەزەكتە از قامتىلعان وتباسىلارعا تابىس ەتىلەدى. جۋىردا قوماقتى قاراجات ناستيا شاراپوۆاعا بەرىلدى. ەكى جاستاعى ءسابي سۇيەك تۋبەركۋلەزىنە شالدىققان. كەلەسى كەزەكتە ءۇش جاستاعى ميلەنا تەمريك تۇر. شەتەلدە مەديتسينالىق تەكسەرۋدەن وتكەن ونىڭ بۇيرەگىن اۋىستىرۋ قاجەت. ءۇش جىلدىڭ بەدەرىندە 9 بالاعا ەم-دوم كورسەتىلىپ, وتا جاسالۋىنىڭ ءوزى توگىلگەن تەردىڭ, جۇمسالعان ەڭبەكتىڭ زايا كەتپەگەنىن اڭعارتسا كەرەك. سولاردىڭ ءبىرى ءتۋابىتتى جۇرەك اۋرۋىنا ۇشىراعان 6 جاستاعى كيريلل سۋحوملينوۆ سانكت-پەتەربۋرگ قالاسىندا جاسالعان وتادان سوڭ كەسەلدەن قۇلانتازا ايىعىپ كەتكەن.
– قايىرىمدىلىق قورىنا ءتۇسكەن قاراجات تەك ءوز ماقساتىمەن جۇمسالۋى ءتيىس. سوندىقتان, مەكەمەنى جالعا الۋدا ءالى دە ءبىرشاما قيىندىقتار بار. ماسەلەگە قالالىق اكىمدىك ءتۇسىنىستىكپەن قاراپ, وڭ شەشىلۋىنە ىقپال جاسايدى دەگەن سەنىمدەمىن. ازىرگە دەمەۋشىلەردىڭ كومەگىنە جۇگىنىپ ءجۇرمىز. سولاردىڭ بىرىنە «كازگرادستروي» جشس-ءنىڭ باسشىسى الەكساندر اۆدەەۆتى ەرەكشە سۇيىسپەنشىلىكپەن اتار ەدىم. ول «مەچتا» تۇرعىن ءۇي كەشەنىنەن بالالار ورتالىعى ءۇشىن 170 شارشى مەتر ورىن بولەتىن بولدى.
مەنى اۋتيزم سياقتى اۋىر كەسەلگە شالدىققان بالالار سانىنىڭ كوبەيىپ كەلە جاتقانى قاتتى الاڭداتادى. بۇل اۋرۋ نەعۇرلىم تەزىرەك انىقتالسا, ەم-دوم دا سوعۇرلىم ءتيىمدى بولماق. وندايلار كوبىنە تۇرمىسى تومەن وتباسىلاردان شىققاندىقتان, اتا-انالارىنىڭ مۇمكىندىگى كەلە بەرمەيدى. ۇيدە وتىرىپ قالسا, قاتارلاستارىمەن ارالاسپاسا, بالا ەشقاشان دامىمايدى. سوندىقتان, وسى ساناتتاعى بۇلدىرشىندەردى قامقورلىققا الىپ, تاعى ءبىر ورتالىق اشۋدى جوسپارلاپ وتىرمىن, – دەيدى گالينا اناتولەۆنا وزىنە ءتان باتىلدىق مىنەزبەن.
بۇل ورايدا, ول رەسپۋبليكالىق «اسىل بالا» اسسوتسياتسياسىنا ۇلكەن سەنىم ارتىپ وتىر. ەلىمىزدەگى بەلسەندى كاسىپكەر ايەلدەردىڭ باستاماسىمەن بالالارعا مورالدىق, ماتەريالدىق جانە مەديتسينالىق كومەك كورسەتۋ ماقساتىمەن قۇرىلعان قۇرىلىمنىڭ وبلىستاعى بولىمشەسىن باسقارۋ گاليناعا جۇكتەلدى. دەمەك, بۇلدىرشىندەرگە جاقسىلىق جاساۋدى ارمان ەتكەن قايىرىمدى جاننىڭ ءۇمىتى ۇزىلمەيدى دەگەن ءسوز.
ومىر ەسقالي,
«ەگەمەن قازاقستان».
سولتۇستىك قازاقستان وبلىسى.
سۋرەتتەردى تۇسىرگەن تالعات تانىباەۆ.