اقتوبە – جەر استى قازبا بايلىقتارىنا باي ءوڭىر. جەرى كەڭ, مال وسىرۋگە قولايلى, مال ازىعىندىق جانە ءداندى داقىلدار وندىرۋگە دە جاعداي بار. مۇندا ەكونوميكانىڭ ەگىز سالاسى – ونەركاسىپ پەن اۋىل شارۋاشىلىعىن تەڭ دامىتۋدىڭ مۇمكىندىگى مول. سونداي-اق, وبلىستا ينۆەستيتسيا تارتۋعا قولايلى احۋال قالىپتاسقان. سوندىقتان بولار, جاڭا جوبالاردى جۇزەگە اسىرۋعا وتاندىق ينۆەستورلاردى بىلاي قويعاندا, شەتەلدىكتەردىڭ ءوزى نازار اۋدارۋدا. بۇعان جەرگىلىكتى بيلىكتىڭ وسى باعىتتاعى جۇيەلى جۇمىسى دا العىشارت جاساپ وتىرعانىن اتاپ وتكەن ءجون.
جاقىندا تۇرىك رەسپۋبليكاسىنىڭ بيزنەس قاۋىمداستىعىنىڭ وكىلدەرى ءوڭىردە بىرنەشە ءىرى جوبالاردى جۇزەگە اسىرۋعا دەگەن ويمەن كەلدى. وبلىس اكىمى بەردىبەك ساپارباەۆ تۇرىك كاسىپكەرلەرىن قابىلداپ, وسى باعىتتا ءوزارا وي ءبولىستى.
– وبلىستا ينۆەستورلار ءۇشىن بارلىق جاعداي جاسالعان. ءارتۇرلى پرەفەرەنتسيالار قاراستىرىلعان, قاجەت بولعاندا مەملەكەتتىك باعدارلامالاردى پايدالانۋ مۇمكىندىگى بار. ءبىزدىڭ وبلىس – اۆتوموبيل جولدارى, تەمىرجول جانە اۋە قاتىناسى جاقسى دامىعان اگرارلى-يندۋستريالىق ءوڭىر بولىپ تابىلادى. بارلىق ينفراقۇرىلىمى جۇرگىزىلگەن يندۋستريالىق ايماق جۇمىس ىستەيدى, – دەپ اتاپ ءوتتى ول.
كەزدەسۋ بارىسىندا بۇدان ارعى ىنتىماقتاستىق ماسەلەلەرى تالقىلاندى, تۇرىك بيزنەس وكىلدەرى وزدەرى جۇزەگە اسىرماقشى بەس ءىرى جوبامەن تانىستىردى. ونىڭ ىشىندە اقتوبە قالاسىنىڭ اگرارلىق-يندۋستريالىق ايماعىندا جىلدىق قۋاتى 7500 توننا بيولوگيالىق قۇراماجەم وندىرەتىن زاۋىت, 5,2 گەكتارعا شامپينون, قىزاناق وسىرەتىن جىلىجاي سالىناتىن بولادى. يندۋستريالىق ايماقتا سىيىمدىلىعى 2200 توننا باتىستىق تەحنولوگياعا نەگىزدەلگەن كوكونىس قويماسى ىسكە قوسىلماق.
«Tades» كومپانياسىنىڭ باسقارما توراعاسى ەردينچ سەلۆي ازىق-ت ۇلىك تاعامدارى مەن توقىما بۇيىمدارىن وندىرەتىن ءىرى ءتورت كاسىپورىننىڭ قوجاسى بولىپ تابىلادى. ءىرى كاسىپكەر اينالدىرعان بەس ايدىڭ ىشىندە وبلىستا ءتورت ءوندىرىس اشۋدى كوزدەۋدە. ونىڭ ءبىرى ەرلەر كويلەكتەرىن تولىق تسيكلدى تىگەتىن توقىما زاۋىتىن تۇرىك كاسىپكەرى ءۇش ايدا پايدالانۋعا بەرۋدى جوسپارلاۋدا.
ونىڭ ايتۋىنشا, جوعارى ساپالى دايىن ونىمدەر ىشكى جانە سىرتقى نارىققا قولجەتىمدى باعامەن وتكىزىلەدى. بۇدان باسقا, ول ازىق-ت ۇلىك تاعامدارىن وندىرەتىن زاۋىت سالماقشى. ناتيجەسىندە, 1000 جاڭا جۇمىس ورنى اشىلادى دەپ كۇتىلۋدە. وسى ەكى جوبانىڭ ءوزىنىڭ قۇنى 50 ميلليون اقش دوللارىن قۇايدى.
سونداي-اق, ەردينچ سەلۆي اقتوبەدە جىلىنا 2 ميلليون توننا بيداي, 500 مىڭ توننا ارپا, 500 مىڭ توننا جۇگەرى وڭدەپ, ماكارون, جارما, تاۋىقتارعا, مالعا بەرىلەتىن جەم تۇرىندەگى دايىن ونىمدەر ءوندىرەتىن ءىرى فابريكا سالۋدى قولعا ااتىن بولادى.
ءوڭىر باشىسى ءوز كەزەگىندە ينۆەستورلارعا جەر تەلىمىن بولۋگە, قاجەت جاعدايدا ءوندىرىستى ىسكە قوسۋعا مەملەكەتتىك قولداۋ كورسەتىلەتىنىن اتاپ وتە كەلىپ, بۇل جوبالاردىڭ بارلىعىن قولدايتىنىن جەتكىزدى.
شەتەلدىك ينۆەستورلار ساپار اياسىندا «اقتوبە» يندۋستريالىق ايماعىندا بولىپ, ءوڭىردىڭ ينۆەستيالىق مۇمكىندىگىمەن جانە الەۋەتىمەن تانىستى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.