ءوز ءونىمىڭدى شىعار, ءوز ءونىمىڭدى تۇتىن. سوندا جاتقا قاراپ جالتاڭدامايسىڭ, وزگەدەن كۇتىپ ەلەڭدەمەيسىڭ. بۇگىنگى نارىقتىق كەزەڭنىڭ تالابى وسى, داعدارىسقا قارسى تۇرۋدىڭ قالقانى دا وسى. سوندىقتان, مەملەكەت باسشىسى وتاندىق ءونىم ماسەلەسىنە ايرىقشا نازار اۋدارىپ, قولداۋ كورسەتىپ كەلەدى. وسى تۇرعىدا اۋىز سۋ تاپشىلىعى بار ماڭعىستاۋ وڭىرىندە جاڭالىقتى جايتتىڭ حابارى بار, ول – ماڭعىستاۋ وبلىسىنىڭ ماڭعىستاۋ اۋدانىندا مينەرالدى سۋ شىعاراتىن جاڭا نىسان اشىلۋعا جاقىن.
يندۋستريالىق-يننوۆاتسيالىق دامۋ مەملەكەتتىك باعدارلاماسى شەڭبەرىندە ماڭعىستاۋ وبلىسىنىڭ ەكىنشى بەسجىلدىعىنا ارنالعان يندۋستريالاندىرۋ كارتاسىن جاساقتاۋ جانە جاڭا جوبالاردى ەنگىزۋ جۇمىستارىنا سايكەس, «شەتپە سۋلارى LTD» جاۋاپكەرشىلىگى شەكتەۋلى سەرىكتەستىگىنىڭ جالپى قۇنى 225 ملن. تەڭگەنى قۇرايتىن مينەرالدى سۋ شىعاراتىن زاۋىتى ينۆەستيتسيالىق جوباسى تاياۋ كۇندەرى ىسكە قوسىلماق. بۇل جوبا ماڭعىستاۋ وبلىسىنىڭ ايماقتىق ۇيلەستىرۋ كەڭەسىنىڭ 2015 جىلدىڭ ماۋسىمىندا قارالىپ, ايماقتىق يندۋستريالاندىرۋ كارتاسىنا ەنگەن بولاتىن.
زاۋىتتا مينەرالدى سۋ شىعارۋ تەحنولوگياسىنىڭ جانە سۋدى قۇياتىن پلاستيك شولمەكتەردى دايىنداۋ قۇرىلعىلارىن رەتتەۋ جۇمىستارى قارقىندى جۇرگىزىلۋدە.
قۇرىلىس جۇمىستارى 2014 جىلى باستاۋ العان زاۋىتتىڭ جەر كولەمى 0,7 گا قۇرايدى. قازىرگى تاڭدا ءوندىرىستى ىسكە قوسۋ ماقساتىندا تولىققاندى جۇمىستار جۇرگىزىلۋدە. زاۋىتتا مينەرالدى سۋدىڭ گازدالعان جانە گازدالماعان تۇردە شىعارىلۋى قاراستىرىلعان. ءونىم ءارتۇرلى سىيىمدىلىقتاعى 0,5 ليتر, 1 ليتر, 1,5 ليتر, 5 ليتر, 6 ليتر جانە 19 ليتر ىدىستاردا شىعارىلادى. بارلىق پلاستيك ىدىستار دا وسى زاۋىتتا دايىندالادى. دايىن ءونىم «شايىر سۋى» جانە «ءمولدىر سۋ شايىردان» اتتى ەكى ماركادا شىعاتىن بولادى. كونۆەيەر ساعاتىنا 0,5 ليتر – 2200 دانا, 1 ليتر – 2000 دانا, 1,5 ليتر – 1800 دانا, 5 ليتر – 120 دانا, 6 ليتر – 110 دانا جانە 19 ليتر 100 دانا ءونىم شىعارۋعا قاۋقارلى. بۇگىنگى تاڭدا زاۋىتقا اۋدانداعى الەۋمەتتىك جاعدايى تومەن وتباسىلاردان 14 ادام جۇمىسقا تارتىلعان. الداعى ۋاقىتتا زاۋىت ىسكە قوسىلعان سوڭ, اۋداننان قوسىمشا 15 ادام جۇمىسقا قابىلدانباق, دەيدى زاۋىتتا اتقارىلىپ جاتقان جۇمىستارمەن تانىستىرعان ءوندىرىس باسشىسىنىڭ ورىنباسارى رافحات قوراباەۆ.
زاۋىت جۇمىسىنا كاسىپكەرلەر پالاتاسى تاراپىنان, زاۋىت باسشىسىنا سۋ ونىمىنە قازاقستان رەسپۋبليكاسىنىڭ مەملەكەتتىك ستاندارت سەرتيفيكاتىن الۋ جونىندە, جۇمىسقا اۋدان تۇرعىندارىن «جۇمىسپەن قامتۋدىڭ جول كارتاسى-2020» باعدارلاماسى بويىنشا قابىلداۋ تۋرالى جانە تاعى سونداي باسقا دا ماسەلەلەردى شەشۋ جونىندە كەڭەستەر بەرىلدى.
شايىر اۋىلىنا بارىپ, زاۋىتتىڭ قۇرىلىس-جابدىقتاۋ جۇمىستارىمەن تانىسىپ شىققان وڭىرلىك كاسىپكەرلەر پالاتاسىنىڭ ديرەكتورى جاڭبىرباي دوسپاەۆ, شالعاي اۋىلدارداعى كاسىپكەرلەردىڭ باسقا وبلىستارعا, الىس-جاقىن شەتەلدەرگە تانىلۋىنا كۇش سالۋعا دايىن ەكەندىگىن جەتكىزدى.
– ەڭ باستىسى, وسىنداي قولىنان ءىس كەلەتىن ازاماتتارعا ست-KZ سەرتيفيكاتىن الۋ ماسەلەسىن تەز ارادا شەشىپ بەرۋگە دايىنبىز. اتالمىش سەرتيفيكات ارقىلى ولار ارنايى ەكونوميكالىق ايماقتاردا ارەكەت ەتۋىنە بولادى, سونداي-اق, ءوز تاۋارلارىن وزگە ەلدەردە تاراتىپ, مەملەكەتتىك ساتىپ الۋ كەزىندە ارتىقشىلىققا يە بولۋ مۇمكىندىكتەرىنە قول جەتكىزەدى. ەكسپورتقا جونەلتىلەتىن تاۋاردىڭ شىعۋ تەگىن انىقتاپ, حالىقارالىق نارىق جاعدايىنا بەيىمدەلۋگە بەت بۇرۋىنا ىقپال ەتۋگە دايىنبىز, – دەدى ج.دوسپاەۆ.
ماڭعىستاۋدىڭ شالعاي اۋىلىندا شارۋاسىن باستاعان جىگىتتەر ءوز كاسىپتەرى ەلدىڭ ناسىبىنە اينالادى دەپ كۇتۋدە.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى.