قازاقستاندىق مەملەكەتتىك قىزمەتكەرلەر نازارىنا ۇسىنىلدى
استاناداعى مەملەكەتتىك قىزمەت سالاسىنداعى وڭىرلىك حاب بۇۇ-نىڭ دامۋ باعدارلاماسىمەن بىرلەسە وتىرىپ, جاۋاپتى مەملەكەتتىك قىزمەتشىلەرىنە ارنالعان «يننوۆاتسيالىق ورتانى ىلگەرىلەتۋ» تاقىرىبىندا سەمينار وتكىزدى. وعان ينۆەستيتسيالار جانە دامۋ مينيسترلىگى, ۇلتتىق ەكونوميكا مينيسترلىگى, ءبىلىم جانە عىلىم مينيسترلىگىنىڭ يننوۆاتسيالىق دامۋ ماسەلەلەرىنەن ماماندار قاتىستى.
استاناداعى مەملەكەتتىك قىزمەت سالاسىنداعى وڭىرلىك حاب باسقارۋشى كوميتەتىنىڭ توراعاسى ءاليحان بايمەنوۆ پەن قازاقستانداعى بۇۇ دامۋ باعدارلاماسىنىڭ تۇراقتى وكىلىنىڭ ورىنباسارى مۋنحتۋيا التانگەرەل سەميناردى اشىپ, جىلى لەبىزدەرىن ءبىلدىردى.
سەميناردا دامۋ باعدارلاماسىنىڭ ەۋروپا جانە تمد ەلدەرى بويىنشا ىستامبۇلداعى وڭىرلىك ورتالىعىنىڭ يننوۆاتسيالار بويىنشا مامانى ميليتسا بەگوۆيچ رادوەۆيچ پەن حالىقارالىق Nesta اعا مەنەدجەرى دجۋليو كۋادجيوتتو يننوۆاتسيالىق ورتانى قۇرۋ جانە ونى ىلگەرىلەتۋ تاسىلدەرىن, وسى سالاداعى عالامدىق زاماناۋي ۇدەرىستەر تۋرالى باياندادى. بۇلاردىڭ سوڭعىسى الەمنىڭ كوپتەگەن مەملەكەتتەرىنە, ونىڭ ىشىندە ۇلىبريتانيانىڭ ۇيىمدارى مەن مەملەكەتتىك مەكەمەلەرىنە يننوۆاتسيا بويىنشا كەڭەس بەرەتىن كومپانيا بولىپ تابىلادى.
سەميناردا يننوۆاتسيالىق تەندەنتسيالار, ولاردى انىقتاۋ جولدارى مەن دامۋ ماقساتىندا ولاردى قولدانۋ, ءتۇرلى بيزنەس-مودەلدەردى ءتۇسىنۋ, يننوۆاتسيالىق قىزمەت ءتۇرى رەتىندە گرانتتار بەرۋ مەحانيزمدەرى, باعدارلاما جانە جوبا قىزمەتىندە يننوۆاتسيالىق قۇرالداردى قولدانۋ تاسىلدەرى تالقىلاندى.
رۋسلان يگىلىك.