وبلىس اكىمدىگىندە ءوڭىردىڭ ءىرى كاسىپورىندارى اراسىندا ءوندىرىس ۇردىستەرىن تۇراقتاندىرۋ, جۇمىسپەن قامتۋدى ءۇيلەستىرۋ جانە جۇمىسشىلاردىڭ ەڭبەك قۇقىقتارى ماسەلەلەرى بويىنشا ءوزارا ىنتىماقتاستىق تۋرالى مەموراندۋمدارعا قول قويىلدى. قۇجاتقا قول قويعان كاسىپورىنداردىڭ قاتارىندا «قازاقستان ءاليۋمينيى» اق, «قازاقستان ەلەكتروليز زاۋىتى» اق, «ەۋرازيالىق ەنەرگەتيكالىق كورپوراتسيا» اق, «قازحروم» تۇك اق فيليالى اقسۋ فەرروقورىتپا زاۋىتى, «پاۆلودار مۇناي-حيميا زاۋىتى» اق, ەكىباستۇزداعى گرەس-1, گرەس-2 جشس-لار, «بوگاتىر كومىر» جشس سەكىلدى الىپ وندىرىستەر بار.
– ءبىزدىڭ نەگىزگى مىندەتىمىز – ەكونوميكانىڭ قازىرگى كەزدەگى دامۋ دەڭگەيى مەن جۇمىس ورىندارىن ساقتاي وتىرىپ, شاعىن جانە ورتا بيزنەستى قولداۋعا باعىتتالعان شارالاردى جۇزەگە اسىرۋ, – دەپ اتاپ ءوتتى وبلىس اكىمى قانات بوزىمباەۆ.
ايتسا ايتقانداي, بۇل وندىرىستىك الىپ كاسىپورىنداردىڭ بارىندە دە مىڭداعان ادام ەڭبەك ەتۋدە. قازىر كاسىپورىندار نەگىزىنەن ءوندىرىس ورىندارىندا جاڭارتۋ, جاڭعىرتۋ جۇمىستارىمەن اينالىسۋدا. جاڭا تەحنولوگيالار ەنگىزىلدى, بۇل وندىرىستە ەڭبەك ونىمدىلىگىنىڭ ارتۋىنا اسەر ەتەدى. سونىمەن بىرگە, ەكولوگيالىق, قورشاعان ورتانى قورعاۋ جاعدايلارىندا ەلەكتر ءسۇزگىلەر ورناتىپ, كوگالداندىرۋ جۇمىستارى جالعاسۋدا. ءوندىرىس ورىندارىنا جاستار كوپتەپ كەلۋدە. كاسىپورىنداردا دۋالدى وقۋىتۋ جۇيەسى بويىنشا كوپتەگەن كاسىپتىك-تەحنيكالىق كوللەدج ءتۇلەكتەرى ءارى ءبىلىم الىپ, ءارى ءوندىرىستىك ءتاجىريبەدەن زاۋىتتارعا كەلىپ وتۋدە. بۇل دا جاستار ءۇشىن جۇمىس ورىندارىنىڭ كەپىلدىگى. سوندىقتان, قول قويىلعان ەكىجاقتى مەموراندۋمدار بارىسىندا جۇمىس ورىندارىن ساقتاۋ قاجەتتىلىگىنە باسا نازار اۋدارىلدى.
ياعني, وبلىس اكىمدىگى كاسىپورىنداردىڭ وندىرىستىك كۇردەلى ماسەلەلەرىن شەشۋ, ينۆەستيتسيالار تارتۋ مەن يننوۆاتسيالاردى ەنگىزۋ شارالارىن قاراستىرادى. سونىمەن قاتار, جۇمىس بەرۋشى مەن كاسىپوداقتىڭ قاتىسۋىمەن الەۋمەتتىك ارەكەتتەستىك پەن ەڭبەك قاتىناستارىن رەتتەۋگە, جۇمىسشىلاردى وڭىرلىك ەڭبەك نارىعىندا سۇرانىسقا يە ماماندىقتار بويىنشا قايتا دايارلاۋ مەن كاسىبي وقىتۋدى جۇرگىزۋگە ءجاردەمدەسەدى. مەموراندۋمدا ايتىلعانداردى ورىنداۋ, ونى جۇزەگە اسىرۋ بويىنشا جۇمىستار جۇرگىزەدى. بۇل كۇندەرى وبلىستا ءوندىرىس ۇردىستەرىن تۇراقتاندىرۋ, جۇمىس ورىندارىن ساقتاۋ جانە جۇمىسشىلاردى جۇمىسپەن قامتۋ بويىنشا 1546 مەموراندۋمعا قول قويىلدى.
فاريدا بىقاي,
«ەگەمەن قازاقستان».
پاۆلودار.