مەملەكەت باسشىسى نۇرسۇلتان نازارباەۆ حالىقارالىق كورمەلەر بيۋروسىنىڭ باس حاتشىسى ۆيسەنتە لوسسەرتالەسپەن كەزدەستى, دەپ حابارلادى پرەزيدەنتتىڭ ءباسپاسوز قىزمەتى.
كەزدەسۋ بارىسىندا حالىقارالىق ەكسپو-2017 كورمەسىن وتكىزۋگە دايىندىق بارىسى تالقىلاندى.
قازاقستان پرەزيدەنتى ۆ.لوسسەرتالەسكە الداعى ءىس-شارانى ۇيىمداستىرۋ ماسەلەلەرىنە ۇدايى كوڭىل ءبولىپ وتىرعانى ءۇشىن العىس ايتتى.
– ءسىزدىڭ كەلۋىڭىزدىڭ جانە جۇمىسىمىزعا باعا بەرۋىڭىزدىڭ ءبىز ءۇشىن ماڭىزى زور. مەن قۇرىلىس پەن دايىندىق بارىسىن ۇنەمى قاداعالاپ وتىرمىن, جۇمىس كەستەسىنەن كەشەۋىلدەۋ جوق. قازىر كورمە نىساندارىن مازمۇندىق تۇرعىدان جابدىقتاۋ الدىڭعى ورىنعا شىقتى. قۇرىلىس جۇمىستارىن جىل اياعىنا دەيىن ءبىتىرىپ, تىكەلەي ەكسپو-2017 كورمەسىن وتكىزۋگە دايىندىقتى باستاۋ ءمىندەتى قويىلىپ وتىر, – دەدى مەملەكەت باسشىسى.
ۆ.لوسسەرتالەس دايىندىق جۇمىستارى بارىسىمەن تانىسىپ, ەكسپو-2017 كورمەسىنىڭ حالىقارالىق قاتىسۋشىلارىنىڭ جينالىسىنا قاتىسۋ ءۇشىن كەلگەنىن ايتتى.
– قۇرىلىس الاڭىن كورگەننەن كەيىنگى كەرەمەت اسەرىمدى سىزگە جەتكىزگەنىمە قۋانىشتىمىن. ارحيتەكتۋرالىق كوزقاراس تۇرعىسىنان بارلىق عيماراتتار ۇيلەسىمدى, ال فۋنكتسيالىق تۇرعىدان ءبارى ويلاستىرىلعان ءارى ىڭعايلى سالىنۋدا. قۇرىلىس كىدىرىسسىز, ءتىپتى, كەستەدەن وزا جۇرگىزىلىپ جاتىر. نەگىزگى مازمۇندىق جابدىقتاۋ باعدارلاماسى وتە ساليقالى ءارى ايقىن, ەندى پاۆيلونداردىڭ ىشكى ساپالىق مازمۇنى وعان جاۋاپتى كومپانيالارعا بايلانىستى, – دەدى حالىقارالىق كورمەلەر بيۋروسىنىڭ باس حاتشىسى ۆيسەنتە لوسسەرتالەس.
سۋرەتتەردى تۇسىرگەندەر
س.بوندارەنكو, ب.وتارباەۆ.