شىمكەنت. 25 اقپان. الداعى ۋاقىتتا تۇركىستان قالاسىنا تۋريستەردىڭ قىزىعۋشىلىعى ارتاتىن بولادى. سەبەبى, وڭتۇستىك قازاقستان وبلىسىنىڭ اكىمى بەيبىت اتامقۇلوۆ قاسيەتتى قالاعا ەرەكشە ءمان بەرىپ وتىر. بۇل تۋرالى egemen.kz ءتىلشىسى حابارلادى.
بولاشاقتا قوجا احمەت ياسساۋي كەشەنى ماڭىنداعى ۇيلەر بۇزىلىپ, باسقا جەرگە كوشىرىلەدى. ولاردىڭ ورنىنا ورتاعاسىرلىق ءداۋىردى ەسكە تۇسىرەتىن قالاشىقتار سالىنادى. ساۋران سارى سازىنان كەرۋەن ساراي بوي كوتەرەدى. مادەني ورتالىقتار سالىنادى.
وبلىس باسشىسى تۇركى ناسىلدەس ۇلتتار مەن ۇلىستارعا كوشە ءبولىپ بەرىپ, ءوز ەتنومادەني قالاشىعىن سالۋعا باسىمدىق بەرمەك.
بۇل – ءتۇبىر ءبىر تۇركى جۇرتىن ودان سايىن جاقىنداستىراتىن جوبا.
باقتيار تايجان.
دەرەك, سۋرەت: egemen.kz.