سارىاعاش اۋدانىندا جاڭا نان تسەحى ىسكە قوسىلدى. كاسىپكەرلىككە كەڭ ءورىس اشىلعان بۇگىنگىدەي زاماندا بۇل الاقان سوعىپ ءسۇيىنشى سۇرايتىنداي وقيعا دا ەمەس شىعار.
ءبىر قىزىق كەپتىڭ ەسكە ءتۇسىپ تۇرعانى. «ەگەمەن قازاقستان» رەسپۋبليكالىق گازەتى» اق پرەزيدەنتى سارىاعاشپەن ىرگەلەس كەلەس اۋىلىنىڭ ازاماتى. توقاش بەردياروۆتاي اقتاڭگەر اقىن پوەزياسىنىڭ تورىنەن ءاردايىم ورىن بەرگەن كەلەس كەزىندە بولەك اۋدان بولعان. كەڭەس وكىمەتىنەن ءال كەتكەن كەز. اۋدان ورتالىعىنداعى ماڭدايعا باسقان جالعىز ناۋبايحانا جابىلىپ قالىپ, تاباعا نان جابۋدى ۇمىتىڭقىراپ قالعان جۇرت شۋ كوتەرەدى. ەرەۋىلگە دە ۇلاسىپ كەتە جازداعان با قالاي. ايتەۋىر, ۋ-شۋ. اڭگىمە پارتيا بيۋروسىنا دەيىن جەتىپ, ناۋبايحانانىڭ باسشىسى سوگىس الىپ تىنادى.
كوپ كەشىكپەي نارىق تا جەتىپ, ءار ءۇيدىڭ ەسىگىن قاعادى. سول كەزدە ەتى ءتىرى ايەلدەر تاندىرعا, تاباعا نان جاۋىپ, كەلەس اۋدانىنىڭ ورتالىعى ابايدى قارىق قىلىپ تاستايدى. «سەن جە, مەن جە» – ناننىڭ ءتۇرى كوپ. باعاسى دا ارزان. سوندا ءابىل دەگەن ءتىلىنىڭ تىكەنى بار جىگىت اعاسى «ويپىر-اي, باياعىدا ناۋبايحانا جابىلىپ, ەل ۇلارداي شۋلاعان نان جەتىسپەۋشىلىك وقيعاسىن ءبۇگىندەرى ابايدىڭ التى قاتىنى شەشىپ تاستادى عوي», دەپتى.
«نان بولسا ءان دە بولادى». وبلىس اكىمى بەيبىت اتامقۇلوۆ ءتۇركىستانعا بارعان ساپارىندا قالاداعى «اقجول» سەرىكتەستىگىنىڭ ناۋبايحاناسىندا بولعان. جۇزدەگەن ادامعا تۇراقتى جۇمىس بەرىپ, جىلىنا 450 ملن. تەڭگەنىڭ ونىمدەرىن شىعارىپ وتىرعان تسەحتىڭ جۇمىسىنا ريزاشىلىق ءبىلدىرىپ, باسقا اۋدان, قالالاردان دا فيليالىن اشۋدى ۇسىنعان.
كاسىپكەر دەگەن حالىق ۋادەگە بەرىك قوي. «اقجول» سەرىكتەستىگى سارىاعاشقا نان زاۋىتىن سالۋعا كىرىسىپ كەتكەن ەدى. ەندى مىنە, ءتاۋلىگىنە ون, ەلۋ تونناعا دەيىن دايىن ءونىم بەرە باستادى.
نان زاۋىتىنىڭ باسشىسى ءناسيبا سابىرجانوۆانىڭ قازان اۋزى جوعارى دەپ وتىرعان جاعدايى بار. ەلباسىمىزدىڭ ءوزى شاعىن جانە ورتا كاسىپكە قولداۋ كورسەتىپ, جەڭىل نەسيەمەن جۇمىس جاساۋعا جاعداي تۋعىزىپ وتىر, دەيدى ول. وبلىس اكىمى بەيبىت اتامقۇلوۆ پەن سارىاعاش اۋدانىنىڭ اكىمى بۇحارباي پارمانوۆقا العىسىمىز شەكسىز. بيزنەسىمىزدى وركەندەتۋگە كەرەك جاعدايدىڭ ءبارىن جاساپ وتىر. «ياسسى» دەگەن فيرما اشىپ, وعان جەرگىلىكتى حالىقتى جۇمىسقا تارتتىق. ەندى اۋدانداعى جيىرما بەس اۋىل وكرۋگىنەن فيليال اشپاق ويدامىز. ءتاتتى توقاش, پىسىرىلگەن نان ونىمدەرىن ىستىعى باسىلماي ساتىپ الادى. كونديتەرلىك تسەحتىڭ دا قۇرىلىسى جۇرۋدە. سوندا ءبىز تاتتىلەردىڭ بەس جۇزدەن ەكى مىڭ تونناعا دەيىن جۇزدەگەن ءتۇرىن شىعارا الامىز.
باعاسى قولجەتىمدى ءارى ءدامدى نان ونىمدەرىنە كورشىلەس ماقتاارال, شاردارا اۋداندارىنان دا تاپسىرىس ءتۇسىپ جاتىر ەكەن.
ءۇش اۋدان حالقىن قوسقاندا ءبىر ميلليون ادامعا جۋىقتايدى. ءتۇركىستاندىق كاسىپكەر وسىنىڭ ءبارىن شوتقا سالىپ, تابىسىن ەسەپتەپ وتىر. «اقجولدىڭ» وسىلايشا نانى كوتەرىلىپ تۇر.
باقتيار تايجان,
«ەگەمەن قازاقستان».