قازاقستان پرەزيدەنتىنىڭ ءباسپاسوز قىزمەتى مەملەكەت باسشىسى نۇرسۇلتان نازارباەۆتىڭ قاتىسۋىمەن وتەتىن الداعى ءىس-شارالار اڭداتپاسى تۋرالى حابارلادى.
25 اقپاندا مەملەكەت باسشىسى ەۋرازيالىق ەكونوميكالىق كوميسسيا القاسىنىڭ توراعاسى تيگران ساركيسيانمەن كەزدەسەدى دەپ جوسپارلانىپ وتىر. كەزدەسۋ بارىسىندا ەاەو-نىڭ قازىرگى قىزمەتىنىڭ ماسەلەلەرى, سونداي-اق, كوميسسيا جۇمىسىنىڭ الداعى كەزەڭدەگى باسىمدىعى بار باعىتتارى تالقىلاناتىن بولادى.
وسى كۇنى نۇرسۇلتان نازارباەۆ حالىقارالىق كورمەلەر بيۋروسىنىڭ باس حاتشىسى ۆيسەنتە لوسسەرتالەسپەن دە كەزدەسەدى دەپ جوسپارلانۋدا. كەزدەسۋدە حالىقارالىق ەكسپو-2017 كورمەسىن وتكىزۋگە دايىندىق بارىسى مەن سالىنىپ جاتقان پاۆيلونداردى مازمۇندىق تۇرعىدان جابدىقتاۋ ماسەلەسىن تالقىلاۋ كوزدەلگەن.
26 اقپاندا مەملەكەت باسشىسى ەگيپەت اراب رەسپۋبليكاسىنىڭ پرەزيدەنتى ابدەل فاتتاح اس-سيسيمەن كەزدەسەدى. مىسىر پرەزيدەنتىنىڭ ەلىمىزگە رەسمي ساپارى ونىڭ ازياعا تۋرنەسى اياسىندا قازاقستان-مىسىر ىنتىماقتاستىعىنا سەرپىن بەرۋگە باعىتتالعان.
ساۋدا-ەكونوميكا, اۋىل شارۋاشىلىعى, فارماتسەۆتيكا, سونداي-اق, ينفراقۇرىلىم ءجانە كولىك-لوگيستيكا سالالارىنداعى ءوزارا ءىس-قيمىل سياقتى باعىتتار بويىنشا شاعىن جانە كەڭەيتىلگەن قۇرامدا كەلىسسوزدەر وتكىزۋ جوسپارلانعان.