ورتالىق كوممۋنيكاتسيالار قىزمەتىنىڭ تالدىقورعانداعى فيليالىندا «سايلاۋ تۋرالى» زاڭنىڭ باق-تاردا ساقتالۋى بويىنشا ءباسپاسوز ءماسليحاتى بولىپ ءوتتى. وندا الماتى وبلىسى اكىمىنىڭ ورىنباسارى باقتيار ونەرباەۆ جۋرناليستەرگە «سايلاۋ تۋرالى» زاڭدى جان-جاقتى ءتۇسىندىرىپ بەردى.
بۇگىنگى تاڭدا وسى زاڭناما شەڭبەرىندە جۇرگىزىلىپ جاتقان جۇمىس بارىسىندا سايلاۋ زاڭدىلىقتارىن ساقتاۋ اسا ماڭىزدى. راس, ءار ۇمىتكەر ءوزىنىڭ ساياسي باعدارلاماسىن گازەت ارقىلى جان-جاقتى جەتكىزۋگە, تەلەديداردان اشىق اڭگىمە وربىتۋگە تالپىنادى. سونىڭ بارلىعىندا سايلاۋ تۋرالى زاڭنامانىڭ بۇزىلماۋى تالاپ ەتىلەدى.
ءوز كەزەگىندە ءسوز العان الماتى وبلىستىق ىشكى ساياسات باسقارماسىنىڭ باسشىسى عالياسقار سارىباەۆ سايلاۋالدى ۇگىت-ناسيحات جۇمىستارىندا ۇمىتكەرلەردىڭ بۇقارالىق اقپارات قۇرالدارىندا قۇقىقتارى ساقتالىپ, بارلىعىنا ءبىر رەتتى مۇمكىندىك بەرىلەتىندىگىنە كەپىلدىك بولاتىنىن جەتكىزدى. ەفيرگە شىعۋ, باسىلىمداردا جاريالاۋ اقىلى نەگىزدە كەلىسىمشارت ارقىلى جۇرگىزىلەدى. جالعان اقپارات تاراتۋعا, ار-نامىسقا تيۋگە قاتاڭ تىيىم سالىنادى.
پارلامەنت ءماجىلىسىنىڭ كەزەكتەن تىس سايلاۋى قازاقستان رەسپۋبليكاسى ورتالىق سايلاۋ كوميسسياسى بەكىتكەن كەستەگە سايكەس جۇرگىزىلەتىنىن اكىمدىك حاباردار ەتتى. وسىلايشا دەپۋتاتتىققا ۇمىتكەرلەردىڭ سايلاۋالدى جۇمىسى باستالدى. بارلىق ۇمىتكەر, زاڭناما تالابى بويىنشا, سايلاۋ كوميسسيالارىندا تىركەلۋى ءتيىس. وبلىستا دەپۋتاتتىقتان ۇمىتكەرلەردى سايلاۋدىڭ 44 وكرۋگىنىڭ شەكاراسى انىقتالدى. جالپى, جەتىسۋدا 918 اۋماقتىق سايلاۋ كوميسسياسى بار. سايلاۋ ناۋقانى اشىق تۇردە ءجۇرگىزىلەتىنى بەلگىلى. ال جۋرناليستەر سول جۇمىستىڭ جاريالىلىعىن قامتاماسىز ەتۋى ءتيىس.
نۇربول الدىباەۆ,
«ەگەمەن قازاقستان».
الماتى وبلىسى.