جاقىندا عانا اقپارات قۇرالدارى الماتىدا جەدەل جاردەم قىزمەتىنىڭ ەكى دارىگەرىنە ءبىر ەر ادامنىڭ شابۋىل جاساپ, دەنە جاراقاتىن سالعانىن جارىسا جازدى. شىنىندا, ەل بولعاننان كەيىن اراسىندا تەرىس پيعىلدى جاندار دا بولادى. اق حالاتتى جاندار جەدەل قىزمەت ەتەتىندىكتەن كومەككە شاقىرعان ادامداردىڭ قانداي كۇيدە, قانداي ورتادا وتىرعانىن باعامداۋعا مۇرشاسى جوق.
جاسىراتىنى جوق, جۇرت كوبىنەسە جەدەل جاردەم قىزمەتىنە كوڭىلى تولمايتىنىن اشىق ايتىپ جاتادى. راس, كەي كەزدەرى اق حالاتتى جانداردىڭ شاقىرۋعا كەشىگىپ بارۋى, ناۋقاس ءتۇرى بويىنشا بريگادانىڭ سايكەس كەلمەۋى ورىن الادى. ويتكەنى, «جەدەل جاردەم» – اسا شۇعىل قىزمەت. سوندىقتان, بريگادانىڭ دەر كەزىندە جەتىپ, مەديتسينالىق كومەكتى ۋاقتىلى كورسەتۋى ءۇشىن تۇرعىندار دا ءبىراز ەرەجەلەردى ەسكەرۋى قاجەت.
تاراز قالالىق مەديتسينالىق جەدەل جاردەم ستانساسىندا 56 سانيتارلىق اۆتوكولىك بار. ءىس ۇستىندەگى بريگادالاردىڭ ورتاشا تاۋلىكتىك سانى – 42. ونىڭ ىشىندە 1 جانساقتاۋ بريگاداسى, 3 قارقىندى تەراپيا بريگاداسى, 4 بالالار بريگاداسى, 1 پسيحوتريالىق بريگادا جانە باسقا دا بريگادالار بار. جىل باسىنان بەرى ەمحانالاردىڭ جۇمىس ۋاقىتى كەزىندە نەگىزسىز شاقىرۋلار سانى 53316-نى قۇراپتى. ال, جالعان شاقىرۋلار سانى 2015 جىلدىڭ 10 ايىندا – 8718 بولىپ وتىر.
سوندىقتان, جەدەل جاردەم بريگاداسىن ساۋاتتى تۇردە شاقىرۋدىڭ ءوزى ناۋقاستىڭ ومىرىنە اراشا بولاتىن العاشقى قادام ەكەنىن ءتۇسىنۋ قاجەت. قىسقا ءارى نۇسقا ايتۋعا تىرىسىڭىز. جەدەل جاردەم ستانساسىندا ارنايى باعدارلاما ورناتىلعان كومپيۋتەرلەر بار. شاقىرۋدى قابىلداعان ديسپەتچەر باعدارلامانىڭ بارلىق تەرەزەلەرىن تۇگەل تولتىرمايىنشا, اقپارات, ياعني, شاقىرۋ ستانساعا تۇسپەگەن بولىپ سانالادى. ءسىزدىڭ ءاربىر دۇرىس جاۋابىڭىز اۋرۋ سيپاتىن ايقىنداي تۇسەدى. جەدەل جاردەم كەلۋدەن باس تارتپاسىن دەگەن ويمەن كەي جاعدايدا جالعان ءۋاج ايتاتىن جاندار دا كەزدەسەدى. مىسالى, ءىشى نەمەسە باسى اۋىرىپ تۇرسا دا ويلانباستان «جۇرەك اۋرۋى» نەمەسە «ءولىپ بارادى» دەپ ايتا سالادى. مۇنداي جاعدايلار مەديتسينالىق كومەكتىڭ شۇعىل كورسەتىلۋىنە كەدەرگى كەلتىرەدى.
ۇيالعانى ما, قورىققانى ما, ايتەۋىر كەيبىر ادامدار ءىشىمدىك ىشكەنىن جاسىرعىسى كەلەدى. بىراق بۇل دۇرىس ەمەس. ناۋقاستىڭ ىشىمدىك قابىلداۋى – جەدەل جاردەم كورسەتۋدەن باس تارتۋعا سەبەپ ەمەس. الكوگول جانسىزداندىرعىش قاسيەتكە يە. ول مولشەردەن تىس قابىلدانعان جاعدايدا, اۋرۋ بەلگىلەرى ناقتى ەمەس. ال ەگەر ناۋقاس الكوگولدى كوپ مولشەردە قابىلداعانمەن, ونى جاسىرىپ, جالعان ايتسا, ونىڭ اۋىرلىق جاعدايى ءتيىستى دەڭگەيدە باعالانبايدى. بۇل كەزدە ناۋقاستىڭ جالعان سويلەگەنى ءۇشىن دارىگەر اشۋلانسا, ال ءبىلىمسىز بولىپ كورىنگەن دارىگەردىڭ جايباراقاتتىعىنا ناۋقاس ىزالانا ءتۇسەدى.
تاراز قالاسىندا مەديتسينالىق جەدەل جاردەم قىزمەتى حالىققا تەگىن قىزمەت كورسەتەدى. ستانسادا بىلىكتى دارىگەرلەر مەن كاسىبي ماماندار, مامان سەرتيفيكاتتارى بار فەلدشەرلەر جۇمىس ىستەيدى. ولاردىڭ كوبى حالىقتىڭ العىسىنا بولەنگەن جاندار.
كۇلزاحيرا قىزعاراەۆا,
تاراز قالالىق مەديتسينالىق جەدەل جاردەم ستانساسى باس دارىگەرىنىڭ ورىنباسارى.
جامبىل وبلىسى.