«ءبىز ءوزىمىزدىڭ قازاقستاندىق ارمانىمىزدىڭ ورىندالۋىنا جانە قازاقستاننىڭ وركەندەۋىنە سەنىمدى تۇردە قول جەتكىزەتىن بولامىز!» دەگەن ەلباسىمىز ن.نازارباەۆ ۇلت جوسپارى باعدارلاماسىندا قازاقستاندىق ارمانعا باستايتىن جولدى ناقتى كورسەتىپ, سارالاپ بەردى.
ادامدا ارمان كوپ. ارمانداپ قانا قويماي, سوعان ۇمتىلىپ, جول تابا بىلگەن ادام ارمانىنا قول جەتكىزەدى. كەز كەلگەن ۇلتتىڭ, ەلدىڭ, قوعامنىڭ باستى ارمانى – ەركىن ەل, تاۋەلسىز ۇلت, ەگەمەن مەملەكەت بولۋ بولسا كەرەك. اتا-بابامىز ازات ەل بولۋدى ءومىر بويى اڭساپ ءوتتى. اسقاق ارمان ورىندالدى. قازاقستانداي تاۋەلسىز ەلدىڭ جاس بىلىمگەرى بولعانىما ءوزىمدى باقىتتى سانايمىن. جانە بويىمداعى اقىل, كۇش-جىگەرىمدى وسى ەلىمنىڭ قارىشتاپ دامۋىنا جۇمسايمىن.
مەكتەپ قابىرعاسىندا جۇرگەندە ءال-فارابي اتىنداعى قازاق ۇلتتىق ۋنيۆەرسيتەتىندە ءبىلىم الۋ ارمانىما اينالعان ەدى. جامبىل وبلىسى, بايزاق اۋدانى, ديحان-2 اۋىلىنداعى 60 جىلدىق تاريحى بار شاعىن مەكتەبىنەن ارمان قۋىپ, الماتىعا كەلىپ, تالاپكەر اتانىپ, جۇدىرىقتاي جۇرەگىمنىڭ ءلۇپ-ءلۇپ سوققانىن ءومىر بويى ۇمىتا قويماسپىن. مەنىڭ جاقسى ءبىلىم الۋىما, ارمان-قيالدارىمنىڭ ورىندالۋىنا ارينە, ەڭ الدىمەن اتا-انامنىڭ, ماعان تاربيە-ءبىلىم بەرگەن ۇستازدارىمنىڭ قوسقان ۇلەسى زور. سوندىقتان, بۇل اسىل جاندارعا دەگەن العىسىم مول. ءومىر بويى باسىمدى ءيىپ وتەمىن. ۋنيۆەرسيتەتتىڭ ەسىگىن ايقارا اشقان كۇننەن باستاپ مەنى جاڭا الەم, جاڭا ورتا, جاڭا دوستار كۇتىپ تۇردى. اسقاق ارماننىڭ اسقارىنداي بولعان اسەم قالاشىق مەنىڭ جۇرەگىمدى بىردەن جاۋلاپ الدى. قازۇۋ-دى ەلىمىزدىڭ بارلىق جوعارى ءبىلىم بەرۋ جۇيەسىنىڭ تىرەگى, بىلىكتى ماماندار ورداسى دەۋگە بولادى. ءوز ءبىلىمى مەن دارىنىنا سەنەتىن كوڭىلدى دە ىزدەنىمپاز جاستاردىڭ ورتالىعى ەكەنى كوزگە كورىنىپ-اق تۇر. بۇل مەنىڭ ۋنيۆەرسيتەتىمدى اسىرا ماقتاعانىم ەمەس, مەن مۇنى شىنايىلىقپەن, شىن جۇرەگىممەن ايتىپ وتىرمىن. كوك بايراقتى جەلبىرەتە كوتەرىپ, اتا-بابامىزدىڭ ارمانىن ورىنداپ, اماناتىن ارقالاعان ەلباسىمىز نۇرسۇلتان نازارباەۆ تاۋەلسىز قازاقستان مەملەكەتىن ازعانا جىلداردىڭ ىشىندە الەمگە تانىتتى. ەندەشە, ارماندار ورىندالادى. تەك سوعان جەتكىزەتىن دۇرىس جولدى تاڭداپ, ايانباي ەڭبەك ەتىپ, كۇرەسۋ قاجەت.
بايدوس بەكادىلوۆ,
ءال-فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتى.
الماتى.