اقوردادا قازاقستان رەسپۋبليكاسىنىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆتىڭ توراعالىعىمەن پرەزيدەنت جانىنداعى ازاماتتىق ماسەلەلەر جونىندەگى كوميسسيانىڭ كەزەكتى ءماجىلىسى بولىپ ءوتتى.
كوميسسيا وتىرىسىندا قازاقستان ازاماتتىعىن الۋعا ۇمتىلعان 15 مىڭنان اسا ادامنىڭ, سولاردىڭ ىشىندە تاريحي وتانىنا تابان تىرەۋگە تالپىنعان باۋىرلارىمىز بەن تمد, الىس شەت ەلدەردەن تىلەك بىلدىرگەن باسقا ۇلت وكىلدەرىنىڭ قۇجاتتارى قارالدى.
مەملەكەتتىك حاتشى – سىرتقى ىستەر ءمينيسترى اتاپ وتكەندەي, ەلباسى ءتيىستى جارلىققا قول قويعاننان كەيىن, ءوتىنىش بەرگەن ادامدار ءبىزدىڭ وتانداستارىمىز بولىپ سانالادى. تاۋەلسىز قازاقستان ازاماتىنىڭ كوگىلدىر ءتول قۇجاتىن الۋ قۇقىعىنا يە بولعان ءار وتباسى ءۇشىن بۇل ناعىز اتاۋلى كۇن بولىپ سانالادى. جىل سايىن ءبىزدىڭ جاڭا وتانداستارىمىزدىڭ سانى شامامەن 100 مىڭ ادامعا كوبەيىپ وتىر. بۇل حالىقتىڭ تابيعي وسۋىنە عانا ەمەس, قازاق ەلىنىڭ وزگە دە ازاماتتارمەن ەداۋىر تولىعاتىنىن كورسەتەدى. وسىنداي يگىلىكتى ءىس ءبىزدىڭ وتانىمىزعا, تۇڭعىش پرەزيدەنتىمىز نۇرسۇلتان نازارباەۆقا دەگەن زور سەنىمنىڭ ناتيجەسى دەپ بىلەمىز, – دەدى.
ول بۇدان ءارى, قازاقستان ازاماتتىعىن الۋشىلار ءبىزدىڭ مەملەكەتىمىزدەن وزدەرىنە ومىرلىك كەپىلدىكتى جانە بالالارىنىڭ ايقىن بولاشاعىن كورەدى. كوميسسيا ۇسىنىسىن پرەزيدەنت بەكىتكەننەن كەيىن كۇشىنە ەنەدى. ال ولارعا مەملەكەتتىك ورگاندار بارلىق جاعدايدى جاساۋلارى ءتيىس, دەپ اتاپ ءوتتى قانات ساۋداباەۆ.
سۇلەيمەن مامەت.