قازاقستان پارلامەنتى ءماجىلىسىنىڭ توراعاسى ورال مۇحامەدجانوۆ تۇركيانىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى لالە ۇلكەر حانىممەن كەزدەستى. ايتا كەتۋ كەرەك, بۇل جۇزدەسۋ تۇركيا ەلشىسىنىڭ قازاقستانداعى قىزمەتىنىڭ باستالۋىنا بايلانىستى ءوتىپ وتىر. ءماجىلىس توراعاسى ەلشىنى جاڭا قىزمەتىمەن قۇتتىقتاپ, قازاقستان مەن تۇركيا اراسىنداعى تاريحى تەرەڭدە جاتقان دوستىق بايلانىستارعا توقتالدى, دەپ حابارلادى وسى پالاتانىڭ ءباسپاسوز قىزمەتى.
ەكى ەلدىڭ ءبىر-بىرىنە دەگەن قۇرمەتى ەرەكشە. سونىڭ ايعاعى رەتىندە استانا قالاسىندا وتكەن جىلى تۇرىك ەلىنىڭ كوسەمى, تۇڭعىش پرەزيدەنتى مۇستافا كەمال اتاتۇرىكتىڭ ەسكەرتكىشى بوي كوتەردى. ال بيىل تۇركيا استاناسى انكارا قالاسىنىڭ تورىندە قازاقستان پرەزيدەنتى نۇرسۇلتان نازارباەۆتىڭ ەسكەرتكىشى اشىلدى. بۇل ءبىزدىڭ ەلباسىمىزعا, حالقىمىزعا دەگەن شىنايى قۇرمەت ەكەنى انىق. سونداي-اق الماتى قالاسىنداعى ءبىر كوشەگە تۇرعىت ءوزالدىڭ ەسىمى بەرىلگەن. تاراپتار جەلتوقسان ايىندا استانادا بولاتىن ەقىۇ ءسامميتى تۋرالى, تۇركى پا-نىڭ ءرولى جونىندەگى ويلارىن ورتاعا سالدى.
كەزدەسۋ سوڭىندا ءماجىلىس توراعاسى ءوز ارىپتەستەرى اتىنان ەلشىنىڭ قازاقستانداعى مارتەبەلى قىزمەتىنە تابىس تىلەدى.