مەملەكەت باسشىسى نۇرسۇلتان نازارباەۆ پرەمەر-مينيستر كارىم ءماسىموۆتى قابىلدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
ك.ءماسىموۆ پرەزيدەنتتى ۇكىمەتتىڭ اعىمداعى جۇمىسى جانە ەلىمىزدىڭ الەۋمەتتىك-ەكونوميكالىق دامۋىنىڭ قورىتىندىلارى تۋرالى حاباردار ەتتى.
پرەمەر-مينيستر استىق جيناۋ ناۋقانى ءىس جۇزىندە اياقتالعانىن باياندادى. ون ءۇش ميلليون توننادان استام استىق جينالدى. بۇل ازىق-ت ۇلىك قاۋىپسىزدىگىنىڭ بارلىق ماسەلەسىن شەشۋگە مۇمكىندىك بەرەدى. قازاقستانداعى استىقتىڭ قورى 2011 جىلدىڭ 1 قازانىنا دەيىن جەتكىلىكتى.
– ەگەر كەلەسى جىلى استىق ءتۇسىمى تومەن بولعان جاعدايدا دا بىزدە بارلىق وبلىستاردى قازىرگى بار باعا بويىنشا استىقپەن قامتاماسىز ەتۋ ءۇشىن قاجەتتى قور بولادى, – دەپ اتاپ ءوتتى ك.ءماسىموۆ.
پرەزيدەنت ۇكىمەتتىڭ الدىنا قازاقستاننىڭ بارلىق وڭىرلەرىن استىقپەن قامتاماسىز ەتۋ جانە استىق جيناۋ ناۋقانىن وڭتايلى مەرزىمدە اياقتاۋ مىندەتىن قويدى.
– قالىپتاسقان جاعدايدان قورىتىندى شىعارۋ ماڭىزدى. وسى رەتتە, قۋاڭشىلىقتا وسىنداي استىق جيناۋ مەملەكەتتىڭ اۋىل شارۋاشىلىعىنا زور كومەك بەرگەندىگىنىڭ ارقاسىندا مۇمكىن بولدى. جاڭا تەحنولوگيانى كەڭىنەن قولدانۋ كەرەك. اۋىل شارۋاشىلىعىن جاڭا تەحنيكامەن جاراقتاندىرۋ, ىلعالدى ساقتاۋ تەحنولوگياسىن قولدانۋ ولاردىڭ كەلەشەگى زور ەكەنىن كورسەتتى, – دەدى پرەزيدەنت.
پرەمەر-مينيستر استىق ەكسپورتىن رەتتەۋ تۋرالى بايان ەتتى. ۇكىمەت قازاقستاندىق استىقتى وتكىزۋگە بايلانىستى بارلىق ماسەلەنى پىسىقتاپ شىقتى.
ك.ءماسىموۆ مەملەكەت باسشىسىن قازاقستاننىڭ ۇدەمەلى يندۋستريالىق-يننوۆاتسيالىق دامۋىنىڭ مەملەكەتتىك باعدارلاماسىن ىسكە اسىرۋ بارىسى تۋرالى دا حاباردار ەتتى. اتاپ وتىلگەندەي, اعىمداعى جىلى باعدارلاما اياسىندا قازىردىڭ وزىندە 72 ءىرى جوبا تابىستى جۇمىس ىستەۋدە, ال جىلدىڭ اياعىنا دەيىن تاعى 72 جوبا ىسكە اساتىن بولادى.
– بارلىق 72 نىسان تاۋەلسىزدىك كۇنى قارساڭىندا پايدالانۋعا بەرىلەتىنىنە سەندىرگىم كەلەدى, – دەپ اتاپ كورسەتتى پرەمەر-مينيستر.
كەزدەسۋ بارىسىندا شاعىن جانە ورتا بيزنەستى دامىتۋ جونىندەگى ءىس-شارالار تۋرالى, قۇقىق قورعاۋ ورگاندارىنداعى رەفورمالار بارىسى دا, سونداي-اق الداعى ۋاقىتتا مەملەكەتتىك قىزمەتتەگى اپپاراتتى قىسقارتۋ تۋرالى ءسوز بولدى.
* * *
مەملەكەت باسشىسى نۇرسۇلتان نازارباەۆ مەملەكەتتىك حاتشى – سىرتقى ىستەر ءمينيسترى قانات ساۋداباەۆتى قابىلدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
ق.ساۋداباەۆ پرەزيدەنتتى بۇۇ باس اسسامبلەياسىنىڭ جۇمىسىنا قاتىسۋىنىڭ قورىتىندىلارى تۋرالى حاباردار ەتتى. ول بۇۇ باس حاتشىسى پان گي مۋن بۇۇ باس اسسامبلەياسىنىڭ اياسىنداعى ەكى ءىرى شارادا نۇرسۇلتان نازارباەۆقا جاھاندىق قاۋىپسىزدىكتى قامتاماسىز ەتۋگە, الەمدە يادرولىق قاۋىپ-قاتەردى تومەندەتۋگە قوسقان زور ۇلەسى ءۇشىن ۇلكەن العىسى مەن ريزاشىلىعىن ءبىلدىرگەنىن اتاپ ءوتتى. بۇۇ باس حاتشىسى جاپپاي قىرىپ-جوياتىن قارۋ-جاراقتى ازىرلەۋمەن اينالىساتىن يادرولىق مەملەكەتتەر مەن ەلدەردى قازاقستاننان ۇلگى الۋعا شاقىردى.
سونىمەن قاتار مەن پرەزيدەنتتىڭ تاپسىرماسى بويىنشا ءبىرقاتار مەملەكەتتەردىڭ كوشباسشىلارىنا ون ءبىر جىلدىق ۇزىلىستەن كەيىن استانادا 1-2 جەلتوقساندا وتەتىن ەقىۇ-عا مۇشە مەملەكەتتەر باسشىلارىنىڭ سامميتىنە شاقىرۋدى تاپسىردىم. شاقىرۋ العىس سەزىممەن قابىلداندى, ەۋروپالىق ەلدەر كوشباسشىلارىنىڭ كوپشىلىگى وسى جوعارى حالىقارالىق فورۋمعا وزدەرىنىڭ قاتىساتىندىقتارىن قۋاتتادى. اقش پرەزيدەنتى باراك وباما ءبىزدىڭ مەملەكەتىمىزدىڭ باسشىسىنا ءوزىنىڭ يگى تىلەگىن ءبىلدىرىپ, ءبىزدىڭ ەلدەرىمىز اراسىنداعى ستراتەگيالىق ارىپتەستىكتى ودان ءارى نىعايتۋ جانە كەڭەيتۋ جولىن بەرىك ۇستاناتىنىن جەتكىزدى, – دەدى ق.ساۋداباەۆ.
* * *
مەملەكەت باسشىسى نۇرسۇلتان نازارباەۆ “ار-نامىس” (قىرعىز رەسپۋبليكاسى) ساياسي پارتياسىنىڭ توراعاسى فەليكس كۋلوۆتى قابىلدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
كەزدەسۋ كەزىندە قىرعىزستانداعى جاعدايدى تۇراقتاندىرۋ ماسەلەسى جانە ەقىۇ-نىڭ قاۋىپسىزدىكتى نىعايتۋ سالاسىنداعى ءرولى تالقىلاندى.
كەزدەسۋ اياقتالعاننان كەيىن جۋرناليستەرگە ارنالعان بريفينگتە ف.كۋلوۆ ەقىۇ-نىڭ ءىس باسىنداعى ءتوراعاسىنىڭ قىرعىزستانداعى جاعدايدى رەتتەۋگە قوسقان ماڭىزدى ۇلەسىن ايتا كەلىپ, قازاقستان پرەزيدەنتىنىڭ تۋىستاس رەسپۋبليكاعا گۋمانيتارلىق جانە ەكونوميكالىق كومەك كورسەتۋدەگى ءرولىن ەرەكشە اتاپ كورسەتتى.