باسشىلىق وزگەرمەك
كحدر اقپارات اگەنتتىگى 28 قىركۇيەكتە ەلدىڭ بيلىگىندەگى ەڭبەك پارتياسى باسشىلىعىنىڭ ماجىلىسىندە پارتيانىڭ جاڭا باسشىلىعى سايلاناتىنىن حابارلادى. قيسىنعا قاراعاندا, كيم چەن ير كەتەتىنگە ۇقسايدى. ايتپەسە بۇلاي حابارلاپ جاتپاس ەدى. ورنىن كىم باسادى دەگەندە, ءارتۇرلى بولجام ايتىلادى. باسىم پىكىر – كورەيلەر كوسەمىنىڭ كىشى ۇلى 26 جاسار كيم چەن ۋن. بىراق كيم چەن ءيردىڭ جاقىندا قىتايعا ساپارى كەزىندە مۇنى باتىستىڭ وسەگى دەگەنى بار. كىم بىلەدى, بۇل جاي الدارقاتقان ءسوز شىعار.
پارلامەنت تاراتىلادى
مولداۆيانىڭ كونستيتۋتسيالىق سوتى ەل پارلامەنتىن تاراتۋعا تولىق نەگىز بار دەپ شەشتى. 2008 جىلدان بەرى پارلامەنت ەل پرەزيدەنتىن سايلاي الماي الەك. ول ءۇشىن دەپۋتاتتاردىڭ بەستەن ۇشىنەن ارتىعى ۇسىنىلعان كانديداتتى قولداۋى كەرەك. وعان قول جەتپەدى. سوندا ەل باسشىسىنىڭ مىندەتىن اتقارۋشى ميحاي گيمپۋ پرەزيدەنتتى قانداي جولمەن سايلاۋ جونىندە رەفەرەندۋم وتكىزىپ ەدى, داۋىس بەرۋگە حالىق از قاتىسقاندىقتان, ول وكىلەتتىك الا المادى. ەندى جاڭا پارلامەنت سايلاۋى وتەدى. سوندا ءبىر پارتيا نە بلوك باسىم كوپشىلىك مانداتقا يە بولماسا, بيلىك داعدارىسى ءارى قاراي سوزىلا بەرمەك.
لۋكاشەنكونىڭ باسەكەلەستەرى
بەلورۋسسياداعى پرەزيدەنت سايلاۋىنىڭ سۇلباسى ايقىندالىپ كەلەدى. ورتالىق سايلاۋ كوميسسياسىنا ۇمىتكەرلەردەن ءوتىنىش تۇسە باستادى. كاسىپكەر ۆلاديمير پروبالسكي, اقىن ۆلاديمير نەكلياەۆ, سانيتاركا ناتاليا ستاريكوۆا جانە ەكونوميست ۆيكتور تەرەششەنكو ەل باسشىسى بولۋعا ءۇمىت ەتەدى. سونداي-اق ءبىراز پارتيالاردىڭ باسشىلارى دا ءوز كانديداتۋرالارىن ۇسىنباق ويلارىن ءبىلدىردى. ساراپشىلاردىڭ پىكىرىنشە, جەكە شاۋىپ وسىلاردىڭ ەشقايسىسى پرەزيدەنت الەكساندر لۋكاشەنكوعا ناعىز باسەكەلەس بولا المايدى.
كۋلوۆ كرەملگە كىردى
قىرعىزستانداعى پارلامەنت سايلاۋى قارساڭىندا ونداعى جەتەكشى پارتيالاردىڭ باسشىلارى تەك ءوز ەلىندە عانا ەمەس, سىرتتان دا قولداۋ ىزدەپ ءجۇر. “ار-نامىس” پارتياسىنىڭ كوسەمى, ەكس-پرەمەر فەليكس كۋلوۆ ماسكەۋگە بارىپ, وندا “ەدينايا روسسيا” پارتياسىنىڭ باسشىلىعىمەن كەلىسسوز جۇرگىزىپ, كەلىسىمگە قول قويعاننان كەيىن, پرەزيدەنت دميتري مەدۆەدەۆتىڭ قابىلداۋىندا دا بولعان. پرەزيدەنت اكىمشىلىگىندە كۋلوۆ پارتياسى جەڭىسكە جەتسە, قىرعىزستان پرەزيدەنتتىك بيلىككە قايتا ورالادى دەگەن اڭگىمە ايتىلىپ جاتقان كورىنەدى. كەزىندە قىرعىزشا بىلمەيدى دەپ سىنالعان كۋلوۆتىڭ ورىسشىل قايراتكەر ەكەنى بەلگىلى. ونىڭ پارتياسىنىڭ جەڭىسكە جەتۋى دە كۇماندى.
كورشىڭنەن قورىق
پارسى شىعاناعىنداعى ءبىراز ەلدەر اقش-تان قىرۋار قارجىعا قارۋ ساتىپ الىپ جاتقان كورىنەدى. 123 ميلليارد دوللارلىق قارۋ ساۋداسى, ءسىرا, بۇرىن بولا قويماعان شىعار. بۇل ماڭداعى ەلدەردىڭ كوپشىلىگى باي – مۇنايى كوپ. ساۋد ارابياسى 67 ميلليارد دوللارعا ساۋدا جاساپتى. ساراپشىلاردىڭ ايتۋىنشا, بۇل قارۋلانۋ دۇرمەگىنىڭ سىرى يران جاعىنان بولادى دەگەن قاۋىپكە قارسى شارا ەكەن.
يمميگرانتتارعا قارسى
شۆەديا – جوعارى دامىعان ەل. ونى ۇزاق مەرزىمدە بيلىكتە بولعان سوتسيال-دەموكراتيالىق پارتيانىڭ جۇرگىزگەن ساياساتىنىڭ جەمىسى دەگەن پىكىر قالىپتاسقان. بىراق, مىنە, سوڭعى پارلامەنت سايلاۋىندا وڭشىل تسەنتريستىك كواليتسيا جەڭىسكە جەتتى. ونى جۇرت ەلدەگى يمميگراتسيا جاعدايىنا قاتىستىرىپ وتىر. سوتسياليستەر كەلىمسەكتەرگە شەكارانى اشىپ قويسا, تسەنتريستەر شەكتەۋ ءجون دەگەندى ايتادى. قازىر ەلدەگى 9,4 ميلليون حالىقتىڭ 14 پايىزى – يمميگرانتتار, ياعني 1 316 مىڭ. كوبى – كورشى فينليانديادان. قالعاندارى يراكتان, بۇرىنعى يۋگوسلاۆيادان جانە پولشادان كەلگەندەر.
زەينەتكەرلىككە اسىعادى
فرانتسۋزدار زەينەتكەرلىك رەفورماعا قارسى. ۇكىمەتتىڭ زەينەتكەرلىككە 60 جاستىڭ ورنىنا 62 جاستان شىعۋ جونىندەگى شەشىمىنە قارسىلىق ءبىلدىرىپ, شەرۋگە شىققان حالىقتىڭ سانى كاسىپوداقتاردىڭ ايتۋىنشا, 3 ميلليون, ال ۇكىمەتتىڭ مالىمەتى بويىنشا – 1 ميلليون. قالاي بولعاندا دا, ەلگە ودان وراسان زور زيان كەلىپ وتىر. ءىرى قالالاردا كولىك توقتاعان. پويىز, ۇشاقتاردىڭ وزىندە جولاۋشىلار جارتىلاي عانا تولعان. سويتسە دە ۇكىمەتتىڭ قارسىلاردىڭ تالابىن ورىنداي قويۋى قيىن. ءتىپتى, جوعارىلاتىلدى دەگەن 62 جاستىڭ ءوزى ەۋروپادا عانا ەمەس, الەمدەگى ەڭ تومەنگى زەينەتكەرلىككە شىعۋ جاسىنىڭ ءبىرى.
ازىرلەگەن ماماديار جاقىپ.