مەملەكەت باسشىسى نۇرسۇلتان نازارباەۆ قازاقستان رەسپۋبليكاسى پارلامەنتى ءماجىلىسىنىڭ توراعاسى ورال مۇحامەدجانوۆتى قابىلدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
و.مۇحامەدجانوۆ پرەزيدەنتتى پارلامەنتتىڭ زاڭ شىعارماشىلىق جۇمىسى, “نۇر وتان” حدپ پارلامەنتتىك فراكتسياسىنىڭ قىزمەتى تۋرالى حاباردار ەتتى. اتاپ ايتقاندا, اعىمداعى جىلعى بيۋدجەتكە وزگەرىستەر ەنگىزۋ جانە الداعى ءۇش جىلدىق بيۋدجەت جوباسىمەن جۇمىس تۋرالى اڭگىمە قوزعالدى.
كەزدەسۋ بارىسىندا سونداي-اق پارلامەنتتىڭ جانە “نۇر وتان” حدپ پارلامەنتتىك فراكتسياسىنىڭ الداعى ۋاقىتتاعى حالىقارالىق ءىس-شارالارى تۋرالى ءسوز بولدى.
* * *
كەشە مەملەكەت باسشىسى نۇرسۇلتان نازارباەۆ قازاقستان رەسپۋبليكاسىنىڭ باس پروكۋرورى قايرات ءماميدى قابىلدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
باس پروكۋرور پرەزيدەنتتى قۇقىق قورعاۋ قىزمەتىن جەتىلدىرۋگە, پروكۋراتۋرا ورگاندارىنىڭ ۇيلەستىرۋشىلىك فۋنكتسياسىن كۇشەيتۋگە, پروكۋرورلىق قاداعالاۋدىڭ ءتيىمدىلىگىن ودان ءارى ارتتىرۋعا باعىتتالعان قۇقىقتىق رەفورما ماسەلەلەرى جونىندەگى پرەزيدەنت جارلىعىنىڭ نەگىزگى قاعيدالارىن جۇزەگە اسىرۋ بويىنشا باس پروكۋراتۋرانىڭ اتقارىپ جاتقان جۇمىستارى جونىندە حاباردار ەتتى.
باس پروكۋراتۋرا قىلمىستىق زاڭنامالاردى ىزگىلەندىرۋ جانە قىلمىستىق پروتسەستەگى زاڭدىلىقتىڭ كەپىلدىگىن كۇشەيتۋ ماسەلەلەرى بويىنشا زاڭ جوباسىنىڭ نەگىزگى ازىرلەۋشىسى بولعاندىقتان, باس پروكۋرور وسى قۇجاتتىڭ دايىندالۋ بارىسى تۋرالى بايانداپ بەردى. ول زاڭ جوباسىنىڭ قىلمىستىق زاڭنامانى ىزگىلەندىرۋگە, اسىرەسە, جەكە كاسىپكەرلىك سۋبەكتىلەرىنە قاتىستى جانە حالىقتىڭ الەۋمەتتىك جاعىنان از قامتىلعان بولىگىنە, قىلمىستىق قۋدالاۋدىڭ رەپرەسسياشىلدىعىن تومەندەتۋگە, سونداي-اق قۇقىق قورعاۋ ورگاندارى قىزمەتىنىڭ تيىمدىلىگىن باعالاۋ جولدارىن جەتىلدىرۋگە باعىتتالعان اسا ماڭىزدى مىندەتتەردىڭ بىرنەشە ءىرى توپتارىن شەشەتىنىن اتاپ ءوتتى.
سونىمەن قاتار ق.ءمامي مەملەكەت باسشىسىن ەلىمىزدەگى زاڭدىلىق پەن قۇقىق ءتارتىبىن ودان ءارى كۇشەيتۋ جونىندە قابىلدانىپ جاتقان شارالار تۋرالى حاباردار ەتتى. اتاپ ايتقاندا, قىلمىستار تۋرالى ارىزدار مەن حابارلاردى ەلەكتروندى تىركەۋدى ەنگىزۋ, قۇقىق قورعاۋ قۇرىلىمدارىنىڭ بىرىڭعاي ءمالىمەتتەر بازاسىن قالىپتاستىرۋ, قىلمىستىق پروتسەستەر بارىسىندا ازاماتتاردىڭ قۇقىقتارىن قورعاۋ بويىنشا پروكۋرورلىق قاداعالاۋدى كۇشەيتۋ جونىندە باياندادى.
* * *
مەملەكەت باسشىسى نۇرسۇلتان نازارباەۆ “اتامەكەن” ساياسي پارتياسىنىڭ توراعاسى ومىربەك تەكەباەۆتى (قىرعىز رەسپۋبليكاسى) قابىلدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
كەزدەسۋ بارىسىندا قىرعىزستانداعى جاعدايدى تۇراقتاندىرۋ ءماسەلەسى, قاۋىپسىزدىكتى نىعايتۋ سالاسىنداعى ەقىۇ-نىڭ ءرولى تالقىلاندى.
جۋرناليستەرگە ارنالعان بريفينگتە ءو.تەكەباەۆ بۇگىندە قىرعىزستاندا ماڭىزدى ساياسي ۇدەرىستەر ءجۇرىپ, جاڭا ساياسي جۇيە قالىپتاسۋدا ەكەنىن اتاپ ءوتتى.
قازاقستان تۋىستاس رەسپۋبليكا جانە ەقىۇ-نىڭ توراعاسى رەتىندە قىرعىزستانداعى جاعدايدى تۇراقتاندىرۋعا ناقتى كومەكتەر كورسەتۋدە. ءبىز قازاقستان مەن قىرعىزستان كەلەشەكتە دە ەكى جاقتى ىنتىماقتاستىقتى تابىستى دامىتا بەرەتىنىنە سەنەمىز, – دەدى ءو. تەكەباەۆ.