تالدىقورعان قالاسىندا ورنالاسقان ەلەكتر قۋاتتارىن تاراتۋشى “تاتەك” اكتسيونەرلىك قوعامى وسى وڭىردەگى تۇرعىنداردى ەلەكتر قۋاتىمەن قامتاماسىز ەتۋدەگى تابىستارىن سارالاعان جيىندا تولىق تۇسىندىك. اتالعان كومپانيا ماماندارى مەن جۇمىسشىلارى سالاعا ساي ارنايى جانە جوعارى بىلىمدەرىنىڭ بولۋى جانە جىل سايىن بىلىمدەرىن جەتىلدىرىپ, كاسىبي داعدىلارىن دامىتۋعا كوڭىل بولەتىندىكتەرىنە كۋا بولىپ, ونىڭ ورنى سالماقتى ەكەنىنە ماڭىز بەرىلەتىنىنە كوز جەتتى.
ەنەرگەتيكتەردىڭ حالىقارالىق تالاپتارعا ساي وقۋ-جاتتىعۋ الاڭى ەسكەلدى اۋدانى باقتىباي اۋىلىنىڭ ماڭىنان جاسالىپ, جابدىقتالعانىنا دا ءبىراز جىل بولعان-دى. ماماندار اتالعان الاڭدا بىلىكتىلىكتەرىن جەتىلدىرىپ, شەبەرلىكتەرىن شىڭداۋ مۇمكىندىگىنە وراي وتەتىن مارتەبەلى جارىستاردا جاقسى جەتىستىكتەرگە جەتىپ جۇرگەنى دە سوندىقتان بولار.
كاسىبي تۇرعىداعى دايىندىقتىڭ ۇنەمى نازاردا بولۋى ناتيجەسىندە وسىدان ءبىراز بۇرىن قاراعاندىدا وتكەن قازاقستان رەسپۋبليكاسى ەلەكتر جۇيەلەرى كومپانيالارى اراسىنداعى جارىستا جەتىسۋلىقتار جۇلدەلى ءۇشىنشى ورىننان كورىنسە, وتكەن جىلى باقتىبايداعى وقۋ-جاتتىعۋ الاڭىنداعى وسىنداي سايىستا جەڭىمپاز اتانعانى دا بار. سونىمەن بىرگە, ماسكەۋ قالاسىندا وتكەن تمد ەلدەرىنىڭ ۇلتتىق ەلەكتر جۇيەلەرى وكىلدەرىنىڭ مارتەبەلى سىناعىندا قۇرامىندا جەتىسۋلىق ەنەرگەتيكتەر بار قازاقستان قۇراما كومانداسى ءبىرىنشى ورىندى جەڭىپ السا, قورىتىندىسىندا بيىلعى قىركۇيەك ايىنا جوسپارلانعان 10/04 كيلوۆولتتى جۇيەلەردى تاراتاتىن بريگادالار اراسىنداعى جەتىنشى حالىقارالىق جارىس “تاتەك” اق وقۋ-جاتتىعۋ الاڭىندا وتكىزىلدى.
جالاۋ كوتەرگەن جارىسقا توعىز مەملەكەتتەن كوماندالار تىلەك ءبىلدىرىپ, جەتىسۋعا كەلدى. ناقتىراق ايتساق گرۋزيا, ارمەنيا, وزبەكستان, بەلورۋسسيا, قىرعىزستان, رەسەي, تاجىكستان, ۋكراينا جانە قازاقستان كوماندالارى حالىقارالىق باسەكەنىڭ كورىگىن قىزدىردى. ولار جەتى كەزەڭ بويىنشا سىنعا ءتۇستى.
حالىقارالىق جارىستىڭ اشىلۋ سالتاناتىندا وبلىس اكىمىنىڭ ءبىرىنشى ورىنباسارى اماندىق باتالوۆ سويلەپ, جارىسقا كەلگەن ەنەرگەتيكتەرگە ساتتىلىك تىلەدى. سونىمەن قاتار, اپات بولعان قىزىلاعاش اۋىلىن قالپىنا كەلتىرۋدە تاتەك مەكەمەسىنىڭ ۇيىمشىلدىقپەن ەڭبەك ەتكەنىن ايرىقشا اتاپ ءوتىپ, العىسىن جەتكىزدى. بۇدان كەيىن “KEGOC” اق پرەزيدەنتى الماسادام ساتقاليەۆ جانە “تاتەك” اق پرەزيدەنتى باقىتجان جازىقباەۆ جەتىنشى حالىقارالىق جارىسقا كەلگەن ارىپتەستەرى مەن كوماندا مۇشەلەرىن قۇتتىقتاپ تابىس تىلەدى.
قازاقستاننىڭ كوك بايراعى كوتەرىلىپ, باسەكە قىزدى. جارىس شارتى بويىنشا سىنعا تۇسكەن كوماندالار ىنتالارىن سالىپ, نامىستى جىبەرمەۋگە تىرىستى. باسەكەگە جيناقتاعان ۇپايلارىن ەسەپتەگەندە قارسىلاستارىنان وزعان قازاقستان كومانداسى مەن رەسەي كومانداسى ءبىرىنشى ورىننان كورىندى. ەكىنشى ورىنعا تاجىكستان, ءۇشىنشى ورىنعا بەلارۋس مەملەكەتىنىڭ كوماندالارى شىقتى.
كۇمىسجان بايجان.
الماتى وبلىسى.