پودوبەدوۆانىڭ الەمدىك ءۇش رەكوردى

قازاقستاندىق اۋىر اتلەتشى دۇنيە ءجۇزىنىڭ ەكى دۇركىن چەمپيونى اتاندى ءۇش-ءتورت جىل بۇرىن رە­سەي­دەن كەلگەن سۆەتلانا پودو­بەدوۆا ءوز وتانداستارى تارا­پىنان تالاي ءزابىر, كەمسىتۋ­شى­لىك كوردى. ەگەر ول بەيجىڭدەگى وليمپيا ويىندارىنا قاتىس­قاندا, ءسوز جوق, قازاقستان قور­جىنىنا ءۇشىنشى التىن القانى سىيلايتىن ەدى. امال بار ما, رەسەيدەگى اۋىر اتلەتي­كا­نىڭ تۇتقاسىن ۇستاپ وتىر­عان شەنەۋنىكتەر دە, باپكەرلەر دە تاستاي قاتىپ, قانشا رەت كە­لىسسوزگە شاقىرساق تا ءجى­بىمەي-اق قويعانى. ارادا ءبىر جىلدان كەيىن عانا سۆەتلانا ءىرى جارىستارعا قاتىسۋ ءمۇم­كىن­دىگىنە يە بولدى. 2009 جىلى وڭ­تۇستىك كورەيانىڭ گويانگ قالاسىندا وتكەن الەم چەم­پيو­ناتىندا س.پودو­بە­دو­ۆانىڭ قىتاي, رەسەي قىزدا­رىن دا شاڭ قاپتىرىپ, ءۇش بىردەي الەم رەكوردىن جاسا­عا­نى سپورت دەسە ىشكەن اسىن جەرگە قوياتىن جانكۇيەرلەرگە جاقسى تانىس. س.پودوبەدوۆا سارسەنبىنىڭ ساتىندە استانا ۋاقىتىمەن كەشكى 20.00-دە جارىسقا شى­عۋى ءتيىس. ەكىنشى قىزىمىز, ەلىمىزدەگى اۋىر اتلەتيكانىڭ دا­مۋىنا ون جىل بويى ۇلەس قوسىپ كەلە جاتقان تاتيانا حرو­موۆا دا سۆەتلانانىڭ نامىسىن جانىپ, بىرگە ونەر كورسەتپەك. قازاقستاندىق جان­كۇيەرلەر انتالياداعى “ەكس­پو” سپورت ارەناسىنا باردى. سۆەتا ءتىس جارمايدى, ءۇنسىز, مازاسىن الۋدى ءجون كورمەدىك. سول كۇنى قۋانىش راحاتوۆ ەر­لەر اراسىندا 77 كيلو سال­ماق­تا “ۆ” توبىندا جارىسقا قا­تىسقان. امال بار ما, ول جۇل­قي كوتەرۋدە 155 كيلونى با­سىنان اسىرعانىمەن, كەنەتتەن جاراقات الىپ, جارىستان شىعىپ قالدى. ال بۇل سالماقتا ارميان سپورتشىسى چەمپيون اتاندى. ەكىنشى ورىن قىتايلىق اتلەتتە. تۋريزم جانە سپورت مي­نيس­ترى تەمىرحان دوسمۇحام­بەتوۆتىڭ اۋىر اتلەتتەر سايى­سىنا ارنايى كەلىپ قاتىسۋى سپورتشىلاردىڭ عانا ەمەس, بارلىعىمىزدىڭ ەڭسەمىزدى كوتەرىپ تاستادى. مايا مانەزا العاشقى التىندى يەلەنگەندە قاسىنان تابىلىپ, التىن ال­قاسىمەن جانە الەم رەكوردى­مەن ءوزى قۇتتىقتاعان. اۋىر ات­لەتيكا فەدەراتسياسىنىڭ پرە­زيدەنتى, وسى سالانىڭ وركەن­دەۋىنە ولشەۋسىز ۇلەس قوسىپ كەلە جاتقان قايرات تۇرلى­حانوۆ سول ساتتە ەندىگى ءۇمىت س. پودوبەدوۆادا, ونىڭ دا ءوز رەكوردىن جاڭارتۋعا مۇمكىن­دىگى بار ەكەنىن تىلگە تيەك ەت­كەن. بىراق قايرات بولات ۇلى رەسەيلىك ەكى قىزدان دا قاۋىپ­تەنەتىنىن جاسىرماعان. جارىس باستالار الدىندا تۋريزم جانە سپورت ءمينيسترى تەمىرحان دوسمۇحامبەتوۆ پەن باسقا دا دەلەگاتسيا مۇشەلەرى سۆەت­لاناعا جىگەر بەرىپ, نا­مىسىن جانادى. جۇلقي كوتەرۋ. قىتايلىق لي-حيا ءۇشىنشى ارەكەتىندە 120 كيلونى كوتەرە المادى. بەلا­رۋس وكىلى يرينا كۋلەشينا 120 كيلونى باعىندىردى. يس­پان قىزى ليديا ۆالەنتيننىڭ جولى بولمادى. ول 117 كيلو­نى كوتەرە الماي, جارىس جو­لى­نان شىعىپ قالدى. ن. زابولوتنايا 127 كيلونى ەركىن كوتەردى. س.پودوبەدوۆا 130 كيلونى باعىندىرعان سوڭ 134 كيلونى دا ەركىن يگەرىپ, ءوز رەكوردىن بىردەن ەكى كيلوعا جاڭارتتى. سەرپە كوتەرۋ. فەدەراتسيا باسشىسى بوسقا قاۋىپتەنبەگەن ەكەن. سايىسقا قاتىسقان ون ارۋدىڭ ارمانى – رەتى كەلگەنشە ءوز ەلدەرىنە ليتسەنزيا ۇپايىن بارىنشا كوبىرەك الۋ. ونىڭ ءتارتىبى قاراپايىم. 25-ءشى ورىنعا دەيىن ۇپاي بەرىلمەك. جۇلدەلى ورىنداردىڭ ۇپايلارى دا جوعارى. بەلارۋس اتلەتى يرينا كۋلەشوۆا 140 كيلو سالماقتى قينالماي باعىندىردى. رەسەيلىك نادەجدا ەۆستيۋحينا 155 كيلوعا تاپ­سىرىس بەرگەن. رەسەيلىك اۋىر اتلەتيكا مامان­دارى­نىڭ تاكتيكانى وزگەرتىپ جىبەرگەنى انىق بولدى. ءسىرا, ولار پودوبەدوۆانىڭ ەرەن كۇشى مەن وزدەرىنە دەگەن سالقىن قاباعىن اڭعارسا كەرەك. ەۆستيۋحينا 150 كيلونى باعىندىرعان سوڭ, ناتاليا زابولوتنايا 153 كيلونى باسىنان اسىردى. سۆەتانىڭ جۇيكەسى مىقتى ەكەنىنە تالاي كوز جەتكىزگەنبىز. قازىر دە بايسالدى. تورگە شىقتى دا قولىن بورعا مالىپ الىپ, 155 كيلو زىلتەمىردى ەركىن كوتەردى. ەكىنشىگە ەۆستيۋحينا 157 كيلوعا تاپسىرىس بەرگەنىمەن كوتەرە المادى. ناتاليا زابولوتنايا ايدى اسپانعا شىعارىپ, 160 كيلونى باعىندىردى. بۇل – الەم رەكوردىن قايتالاۋ. ەۆستيۋحينانىڭ ەكىنشى تىنىسى اشىلعانداي. ول دا 160 كيلونى كوتەرىپ, الەم رەكوردىن قايتالادى. رەسەيلىك جانكۇيەرلەر ءبىر-ءبىرىن قۇتتىقتاپ جاتىر. مىنە, سىن ساتتە س.پودوبەدوۆا سالقىنقان­دى­لىق تانىتا ءبىلدى. ول 161 كيلونى ەركىن كوتەرىپ, ءبارىمىزدى تاڭقالدىردى. ديكتور تۇرىك­شە, اعىلشىنشا “فانتاستيكا”, “فانتاستيكا” دەپ جاتىر. وزدەرى دە بايقاماسا كەرەك, جانى­مىزدا وتىرعان جەرگىلىكتى جانكۇيەرلەر قازاق­ستان دەلەگاتسياسىن قۇتتىقتادى. قانى ءبىر تۇرىك اعايىنداردىڭ بۇل قۋانىشىن جاقسى­لىققا جورىدىق. سونىمەن, س.پودوبەدوۆا ءۇش بىردەي الەم رەكوردىنا تۇزەتۋ ەنگىزدى. مۇنىڭ الدىن­داعى رەكوردى 134, قوسسايىستا 161, جال­پى كوتەرگەنى 295 كيلو بولاتىن. ال انتاليا­داعى چەمپيوناتتا رەكوردىن ول بىردەن ءۇش كيلوعا جاڭارتتى. ەلىمىزدىڭ كوك بايراعى انتاليا ءتو­رىن­دە شالقىدى. وسىدان كەيىن تەمىرحان دوس­مۇحامبەتوۆ اقپارات وكىلدەرىنە سۇحبات بەردى. “لوندوندا اۋىر اتلەتتەر كەم دەگەندە ەكى نەمە­سە ءۇش التىن الۋارى ءتيىس. جۇمىس وسى باعىتتا قۇرىلۋى كەرەك”, – دەگەندى ايتىپ قالدى مي­نيستر. ول وتكەن جولداعىداي ءۇش ارۋعا دا ەلى­مىزدىڭ اتىنان ەسكەرتكىش سىيلىقتار تاپسىردى. سۆەتلانا جارىس اياقتالعان سوڭ باق وكىل­دەرىنە سۇحبات بەردى. “ەكىنشى مارتە الەم چەم­پيونى اتانىپ قانا قويماي, ءۇش بىردەي رەكورد جاساعانىما قۋانىشتىمىن. فەدەراتسيا پرەزي­دەنتى قايرات تۇرلىحانوۆ, باس باپكەر الەكسەي ني, كەڭەسشى ەنۆەر تۇركەلەريگە, جەكە باپكەرىم ۆيكتور نيگە ەرەكشە العىسىمدى ايتقىم كەلە­دى. بۇگىنگى جارىس اۋىر بولدى. رەسەيلىك ەكى قار­سىلاسىم سىرالعى قۇربىلار. ناتاليا زا­بولوت­نايا جۇلقي كوتەرۋدە 133 كيلوعا تاپسىرىس بەر­گەن­دە, 134 كيلونى باعىندىرامىن دەپ وي­لادىم. ءبىر مۇمكىندىگىمدى بۇعىپ قالدىم, ونى لون­دوندا پايدالانارمىن”,– دەدى س.پودوبەدوۆا. كەشە ۆلاديمير كۋزنەتسوۆ 85 كيلو سالماقتا اس­تانا ۋاقىتى بويىنشا 23.00-دە ارەناعا شىق­تى. ال بۇگىن ا.وتەشوۆ, ا.ابورنەۆا, الەم چەم­پيونى ۆ.سەدوۆ باق سىناسا, ەرتەڭ جارىستىڭ سوڭ­عى كۇنى ي.ۆاششانوۆ, س.يستومين باسەكەگە تۇسەدى. وڭداسىن ەلۋباي, ەگەمەن قازاقستان” – انتاليادان.