كەشە وتكەن مادەنيەت مينيسترلىگىنىڭ كەڭەيتىلگەن القا وتىرىسىندا مادەنيەت ءمينيسترى مۇحتار قۇل-مۇحاممەد سالانىڭ ستراتەگيالىق دامۋ جوسپارىنىڭ ىسكە اسىرىلۋ بارىسى جانە الداعى كەزەڭگە قويىلاتىن مىندەتتەرى جايىندا بايانداپ, ەلباسىنىڭ تاپسىرماسىمەن الداعى ءۇش جىلدىق مەرزىمگە ارنالعان جۇمىس جوسپارى بويىنشا جىل باسىنان بەرگى اتقارىلعان ءىس-شارالاردىڭ ءبىرسىپىراسىنا ەگجەي-تەگجەيلى توقتالىپ ءوتتى.
ءتورت مەملەكەتتىك باعدارلامانىڭ ءبىرى – تىلدەردى قولدانۋ مەن دامىتۋدىڭ 2011-2020 جىلدارعا ارنالعان مەملەكەتتىك باعدارلاماسىنىڭ جوباسى جاسالىپ, جان-جاقتى تالداۋدان وتكىزىلىپ جاتقانى, “مادەنيەت تۋرالى” زاڭنىڭ جاڭا نورمالارىن جۇزەگە اسىراتىن قۇجاتتار جيناعى ۇكىمەت قاراۋىنا ەنگىزىلگەنى ايتىلىپ, مادەنيەت پەن ونەردىڭ ءار سالاسىنداعى جەتىستىكتەر جەكە-جەكە ايشىقتى مىسالدار ارقىلى ناقتىلاندى. ماسەلەن, ءبىر عانا “مادەني مۇرا” ستراتەگيالىق ۇلتتىق جوباسى توڭىرەگىندە تەك كوڭىل كونشىتەر تولايىم تابىستاردى عانا ويعا ارقاۋ ەتۋگە بولادى. جوبانىڭ ەكىنشى كەزەڭىندە ەلىمىزدە – 5, ال شەتەلدەن داماسكىدەگى سۇلتان بەيبارىس كەسەنەسىن قالپىنا كەلتىرۋ جۇمىستارىنىڭ مۇلتىكسىز اياقتالۋى كۇللى قازاقتىڭ كەۋدەسىن شاتتىق سەزىمگە تولتىرعان قۋانىشتى حابار بولىپ جەتكەن ەدى. سول سەكىلدى بيىل 19 مادەني وشاقتا قالپىنا كەلتىرۋ جۇمىستارى جۇرگىزىلمەك. “قازاقتىڭ ءداستۇرلى 1000 كۇيى” مەن “قازاقتىڭ ءداستۇرلى 1000 ءانى” بىرەگەي جوبالارىنىڭ ىسكە اسىرىلۋى ءار كەزەڭدەگى مۋزىكالىق جاۋھارلاردى قالدىرماي قامتيتىن تولايىم تابىسقا كەنەلتۋدە. فولكلورلىق قازىنانىڭ قىتاي, موڭعوليا, رەسەي, وزبەكستان, قاراقالپاقستان, تۇركىمەنستان ەلدەرىنەن جينالۋى سالا قىزمەتكەرلەرىنىڭ بۇل باعىتتا قانشالىقتى تەر توككەنىن اڭعارتاتىن ەكسپەديتسيالىق ءىس ەكەنىن كورسەتەدى.
ۇلتتىق كينەماتوگرافيا سالاسى دا دامىپ كەلەدى. كينوپروكاتتاعى وتاندىق فيلمدەردىڭ ۇلەسى جوسپارلى تۇردە ارتىپ, بيىل ء“سىز كىمسىز, كا مىرزا؟”, “سەكىرىس”, “ماحاببات يىرىمدەرى”, “قىزعىلت قويان تۋرالى حيكايا” سىندى جاڭا كارتينالاردىڭ تانىستىرىلىمى جۇرتشىلىق تاراپىنان قولداۋ تاپتى. تەاتر ونەرىنە كەلسەك, جىل باسىنان بەرى 24 جاڭا قويىلىم تۇساۋ كەسسە, ال جاڭا تەاتر ماۋسىمىندا 27 قويىلىمنىڭ اراسىنان “تاۋەلسىزدىك تولعاۋى” بايقاۋىنىڭ جەڭىمپازى جازۋشى, دراماتۋرگ دۋلات يسابەكوۆتىڭ شىعارماسى م.اۋەزوۆ اتىنداعى مەملەكەتتىك اكادەميالىق قازاق دراما تەاترىندا ساحنالاناتىنى مالىمدەلدى.
سالا قىزمەتكەرلەرىنىڭ الدىندا تۇرعان ايتۋلى مىندەتتىڭ ءبىرى ەلوردادا وتەتىن ەقىۇ ءسامميتى شەڭبەرىندەگى كونتسەرتكە, سونداي-اق قاتىسۋشىلار مەن قوناقتارعا مادەني باعدارلامالار ۇيىمداستىرۋعا قاتىستى دەسەك, 2011 جىلى يسلام كونفەرەنتسياسى ۇيىمىنا قازاقستاننىڭ توراعالىق ەتۋىنە دايىندىق جۇمىستارىنا بايلانىستى “تمد ەلدەرىندەگى يسلامنىڭ ءرولى” اتتى حالىقارالىق كونفەرەنتسيا ۇيىمداستىرۋ مەن وتكىزۋ ماسەلەلەرى تۋرالى العاشقى جۇمىس كەڭەسى قازاننىڭ باسىندا وتەتىنى ءمالىم ەتىلدى.
قاراشاش توقسانباي.