مەملەكەت باسشىسىنىڭ جارلىعىمەن ءبىلىم جانە عىلىم مينيسترى بولعان جانسەيىت تۇيمەباەۆتىڭ ورنىنا بۇعان دەيىن ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى قىزمەتىن اتقارىپ كەلگەن باقىتجان جۇماعۇلوۆ تاعايىندالدى.
سارسەنبىنىڭ ساتىندە پرەمەر-مينيستر كارىم ءماسىموۆ مينيسترلىكتىڭ ۇجىمىنا ونىڭ جاڭا باسشىسىن تانىستىرىپ, ج.تۇيمەباەۆقا جۇمىسىن لايىقتى اتقارعانى ءۇشىن العىس ءبىلدىردى.
كەزدەسۋدە الدىمەن ءسوز العان جانسەيىت تۇيمەباەۆ وسى قىزمەتتە ەلباسىنىڭ سەنىمىنەن شىعىپ, بەرىلگەن تاپسىرمالار مەن جۇكتەلگەن مىندەتتەردى ورىنداۋدا بارلىق كۇش-جىگەرىن سالعانىن ايتىپ, مەملەكەت باسشىسىنا مينيسترلىك قىزمەتىن سەنىپ تاپسىرعانى ءۇشىن العىسىن جەتكىزدى. سودان كەيىن باقىتجان جۇماعۇلوۆ ءسوز الىپ, جاڭا جۇمىستا الدىنا قويىلعان ماقساتتار مەن مىندەتتەردى ورىنداۋدا ەلباسىنىڭ سەنىمىنەن شىعۋعا تىرىساتىنىن ايتتى.
كەزدەسۋ سوڭىندا ۇكىمەت باسشىسى جاڭا مينيسترگە جۇمىسىنا ساتتىلىك تىلەپ, الداعى كەزدە ءبىلىم جانە عىلىم مينيسترلىگىنە تىكەلەي قاتىسى بار ەكى ماڭىزدى جيىن وتەتىنىن, ونىڭ ءبىرىنشىسى مەملەكەتتىك ءتىلدى دامىتۋعا ارنالسا, ەكىنشىسى, جاستار ساياساتىنا قاتىستى بولاتىنىن جەتكىزدى.
داستان كەنجالين.