بۇگىنگى تاڭداعى ەلىمىزدەگى ايەلدەردىڭ قوعامدا كەزدەسىپ جاتقان ءتۇرلى تۇيىتكىلدى ماسەلەلەردى, سونداي-اق جاس وتباسىلار مەن جەتىم بالالار جانە اتا-انانىڭ قامقورلىعىنسىز قالعان بالالارعا قاتىستى مەملەكەت تاراپىنان كورسەتىلەتىن الەۋمەتتىك قولداۋ شارالارىنىڭ بارىسىن تالقىلاۋعا ارنالعان قازاقستان رەسپۋبليكاسى پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ كەزەكتى وتىرىسى بولىپ ءوتتى.
مەملەكەت باسشىسىنىڭ 2009 جىلعى 5 ناۋرىزداعى قازاقستان ءايەلدەرىنىڭ V فورۋمىندا بەرگەن تاپسىرمالاردى ورىنداۋ بارىسى دا تالقىلاندى.
العاشقى ءسوزدى ءبىلىم جانە عىلىم ۆيتسە-ءمينيسترى ماحمەتعالي سارىبەكوۆ الىپ, ەلىمىز بويىنشا 90 مىڭعا جۋىق جاس وتباسىلار بارىن, الايدا ولار ءۇشىن ارنايى مەملەكەتتىك باعدارلامانىڭ قابىلدانباعاندىعىن تىلگە تيەك ەتتى. سوڭعى ۋاقىتتاردا نەكەسىز تۋىلعان بالالاردىڭ, جالعىز باستى انالاردىڭ, اجىراسۋ, ءتىپتى كامەلەتكە تولماعان جاس انالاردىڭ كوبەيىپ كەتكەندىگى جونىندە ءوز وكىنىشىن ءبىلدىردى. مۇنداي جايتتەردىڭ كوبەيۋىنە ءتۇرلى فاكتورلاردىڭ اسەر ەتكەنى ايتپاسا دا تۇسىنىكتى. ەڭ باستى سەبەپ, جاس وتباسىلاردىڭ الەۋمەتتىك جاعدايى كورىنەدى. سونىمەن قاتار, ۆيتسە-مينيستر اۋىل جاستارىن قولداۋ ماسەلەلەر دە قوزعادى.
وتىرىستىڭ قىزۋ تالقىسى جاس وتباسىلاردىڭ ستاتيستيكالىق كاتەگورياسى توڭىرەگىندە ءوربىدى. ءماسەلەن, “جاس وتباسى” دەگەن تەرميندى ستاتيستيكالىق ساناۋ دەڭگەيىنە كوتەرۋ ارقىلى عانا ولاردىڭ ءالەۋمەتتىك جاعدايلارىنا قاتىستى ءماسەلەلەردى تولىق شەشە الاتىندىعى بەلگىلى بولدى. جاس وتباسىلارمەن قوسا, جاس پەداگوگتاردىڭ جاعدايلارى, جالعىزباستى انالاردىڭ بالالاردى ءوسىرىپ-باعۋلارىنا قولداۋ كورسەتۋ, ستۋدەنتتەردىڭ تولىقتاي جاتاقحاناعا ورنالاسۋى تۋرالى ءماجىلىس دەپۋتاتى ەلەنا تاراسەنكو ارنايى الەۋمەتتىك جۇيە قۇرىلۋ كەرەكتىگىن العا تارتتى.
الەۋمەتتىك ماسەلەلەر اڭگىمە ارقاۋىنا اينالعان جيىندى پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ءتورايىمى گۇلشارا ءابدىقالىقوۆا قورىتىندىلادى.
اراي ۇيرەنىشبەكقىزى.