وتاندىق جوعارى وقۋ ورىندارىنىڭ تاجىريبەسىندە تۇڭعىش رەت قامقورشىلار كەڭەسى جۇزەگە استى. قامقورشىلار كەڭەسى – الەمدەگى دامىعان ەلدەردە نەگىزىنەن ءبىلىم وردالارىنىڭ جۇمىسىن جەتىلدىرۋ ءارى ءتيىمدى ەتۋ ماقساتىندا قۇرىلعان ورگان.
اتالمىش كەڭەستى قورعانىس ءمينيسترى ادىلبەك جاقسىبەكوۆ باسقارادى. سونىمەن بىرگە, ەلىمىزدىڭ ءىرى جوعارى وقۋ ورنى قامقورشىلار كەڭەسى مۇشەلەرىنىڭ قاتارىندا قر پرەزيدەنتى اكىمشىلىگى باسشىسىنىڭ ورىنباسارى ءماۋلەن اشىمباەۆ, پرەمەر-ءمينيستردىڭ ورىنباسارى — يندۋستريا جانە جاڭا تەحنولوگيالار ءمينيسترى اسەت يسەكەشەۆ, مادەنيەت ءمينيسترى مۇحتار قۇل-مۇحاممەد, پارلامەنت سەناتىنىڭ دەپۋتاتى, حالىقارالىق قاتىناستار, قورعانىس جانە قاۋىپسىزدىك جونىندەگى كوميتەتتىڭ توراعاسى قۋانىش سۇلتانوۆ, قازۇۋ رەكتورى, اكادەميك باقىتجان جۇماعۇلوۆ, ەلىمىزدىڭ يۋنەسكو جانىنداعى تۇراقتى وكىلى, اقىن ولجاس سۇلەيمەنوۆ, ء“Capىtal Partners” كومپانياسى ديرەكتورلار كەڭەسىنىڭ توراعاسى سەرجان جۇماشەۆ, ۇلتتىق عارىش اگەنتتىگىنىڭ توراعاسى, ۇشقىش-عارىشكەر تالعات مۇساباەۆ, تاعى دا باسقا مەملەكەتتىك ورگاندار مەن بيزنەس-قوعامداستىق جەتەكشىلەرى بار.
كەڭەستىڭ ءبىرىنشى وتىرىسىندا نەگىزگى ەكى ماسەلە قاراستىرىلدى. ءبىرى قازۇۋ-ءدىڭ بولاشاعى مەن دامۋى بولسا, ەندى ءبىرى قامقورشىلار كەڭەسىنىڭ جۇمىس جوسپارى. قورعانىس ءمينيسترى ادىلبەك جاقسىبەكوۆ قاتىسۋشىلاردى كۇن تارتىبىمەن تانىستىرىپ وتكەننەن كەيىن, قازۇۋ رەكتورى باقىتجان جۇماعۇلوۆتىڭ ءبىرىنشى ماسەلە بويىنشا ەسەبى تىڭدالدى.
“قازاقستاندىق جوعارى وقۋ ورىندارى اراسىندا قامقورشىلار كەڭەسى ينستيتۋتىن قازۇۋ ءبىرىنشى بولىپ ۇيىمداستىرىپ وتىر. مۇنداي كەڭەس الەمدىك ۋنيۆەرسيتەتتەر تاجىريبەسىندە بۇرىننان بار. كەڭەستە ۋنيۆەرسيتەتتىڭ كەلەشەكتە دامۋى مەن عىلىم جانە ءبىلىم سالالارىنداعى كوپ ماسەلەلەر قارالاتىن بولادى”, دەگەن ول. ۋنيۆەرسيتەتتىڭ وقۋ ۇدەرىسى, الەۋەتى, تىنىس-تىرشىلىگى, جوسپارلارىمەن تانىستىرا كەلىپ, باستى ماقسات: ءبىلىم ورداسىن زاماناۋي-يننوۆاتسيالىق زەرتتەۋ ورتالىعىنا اينالدىرۋ ەكەندىگىن العا تارتتى. ال تالعات مۇساباەۆ: “قامقورشىلار كەڭەسى الەمدىك ۋنيۆەرسيتەتتەردە ەلۋ جىلدان اسا ۋاقىتتان بەرى جۇمىس جاساپ كەلەدى, اتالمىش يگى ءىستىڭ وتاندىق وقۋ ورداسىندا كورىنىس تابۋى مەنى قۋانتىپ وتىر. سەبەبى, ءبىز كەڭەس جۇمىسىن جاقسارتا وتىرىپ, الەمدىك دەڭگەيدەگى ءمىندەتتەردى اتقارۋدى قولعا الامىز”, دەسە, “مەملەكەتتىڭ ءباسەكەگە قابىلەتتىلىگى عىلىم, بىلىممەن تىعىز بايلانىستى. سول سەبەپتى, الەمدىك تاجىريبەنى قولدانا وتىرىپ, بۇل يگى ءىستى جۇزەگە اسىرۋىمىز ۋنيۆەرسيتەتتىڭ دامىعان ەلدەر قاتارىندا باسەكەگە توتەپ بەرۋىن ارتتىرا تۇسەدى”, دەدى سەناتور قۋانىش سۇلتانوۆ.
پرەزيدەنت اكىمشىلىگى باسشىسىنىڭ ورىنباسارى ماۋلەن اشىمباەۆ بۇل باستاما قازاقستان ءبىلىمىنىڭ دامۋىنا زور ۇلەس قوساتىنىن, اكىمشىلىك تاراپىنان قامقورشىلار كەڭەسىنە قولداۋ كورسەتىلەتىنىن اتاپ ءوتتى.
ساياگۇل الىمبەكوۆا.