كەشە پرەمەر-مينيستر كارىم ءماسىموۆ قازاقستان رەسپۋبليكاسى تاۋەلسىزدىگىنىڭ 20 جىلدىعىن اتاپ وتۋگە دايىندالۋ جانە تويلاۋ جونىندەگى ۇيىمداستىرۋ كوميتەتىنىڭ وتىرىسىن وتكىزدى, دەپ حابارلادى پرەمەر-ءمينيستردىڭ ءباسپاسوز قىزمەتى.
بەينەسەلەكتورلىق كەڭەس ءتۇرىندە وتكەن وتىرىس جۇمىسىنا پرەزيدەنت اكىمشىلىگىنىڭ باسشىلىعى, سەنات پەن ءماجىلىس دەپۋتاتتارى, ورتالىق جانە جەرگىلىكتى اتقارۋ ورگاندارىنىڭ باسشىلارى, سول سياقتى ۇكىمەتتىك ەمەس ۇيىمدار مەن ساياسي پارتيالار وكىلدەرى قاتىستى.
ۇيىمداستىرۋ كوميتەتىنىڭ ءمۇشەلەرى ۇەۇ-لاردىڭ, جاستار ۇيىمدارىنىڭ, پارتيالاردىڭ, عىلىمي جانە شىعارماشىلىق ينتەلليگەنتسيا وكىلدەرىنىڭ قاتىسۋىمەن ازىرلەنگەن تاۋەلسىزدىكتىڭ 20 جىلدىعىن استانا قالاسى مەن ەلدىڭ بارلىق وڭىرلەرىندە اتاپ ءوتۋ تۇجىرىمداماسىنىڭ جوباسىن تالقىلادى. سول سياقتى رەسپۋبليكا تاۋەلسىزدىگىنىڭ 20 جىلدىعىن تويلاۋدىڭ جالپىۇلتتىق جوسپارىنىڭ جوباسىن دايىنداۋ ماسەلەلەرى بويىنشا پىكىر الماسىلدى.
تالقىلاۋعا سەنات دەپۋتاتى قۋانىش سۇلتانوۆ, ءماجىلىس دەپۋتاتتارى دينار نوكەتاەۆا مەن ايگۇل سولوۆەۆا, پاۆلودار وبلىسىنىڭ اكىمى باقىتجان ساعىنتاەۆ, باتىس قازاقستان وبلىسىنىڭ اكىمى باقتىقوجا ىزمۇحامبەتوۆ, ماڭعىستاۋ وبلىسىنىڭ اكىمى قىرىمبەك كوشەرباەۆ, سونداي-اق “قازاقستان جاستارى كونگرەسى” زاڭدى تۇلعالار بىرلەستىگىنىڭ اتقارۋشى ديرەكتورى نۇرلان سىدىقوۆ, قازاقستان زاڭ ۋنيۆەرسيتەتىنىڭ پرەزيدەنتى, ء“ادىلەت” پارتياسىنىڭ جەتەكشىسى ماقسۇت نارىكباەۆ, “اق جول” قدپ ءتوراعاسى ءاليحان بايمەنوۆ, ت.ب. قاتىستى.
تالقىلاۋ قورىتىندىسى بويىنشا پرەمەر-مينيستر ايتىلعان ەسكەرتۋلەر مەن ۇسىنىستاردى ەسكەرە وتىرىپ, ۇسىنىلعان جوبانى تولىقتىرا ءتۇسۋ جونىندە تاپسىرما بەردى.