اۋىل اتتارى وزگەرتىلدى. وبلىستىق ءماسليحاتتىڭ كەزەكتى سەسسياسىندا قارالعان كەلەلى ماسەلەلەردىڭ ءبىرى قىزىلجار وڭىرىندە 2009-2010 جىلدارعا ارنالعان تىلدەردى قولدانۋ مەن دامىتۋ باعدارلاماسىنىڭ جۇزەگە اسىرىلۋ جايى بولدى.
ول جونىندە تىلدەردى دامىتۋ جونىندەگى باسقارمانىڭ باستىعى كەمەل وسپانوۆ جان-جاقتى توقتالىپ ءوتتى. بايانداماشىنىڭ سوزىنە قاراعاندا, مەملەكەتتىك تىلدەگى شىعىس قۇجاتتارىنىڭ ۇلەسى—95, كىرىس قۇجاتتارى 67 پايىزعا جەتكەن. سەسسيادا دەپۋتاتتاردىڭ ءبىراۋىزدى قولداۋىمەن وسكەن اۋىلى—ۇكىلى ىبىراي, ەليتنوە – بايتەرەك, چاگلينسك – شاعالالى, چەحوۆ اۋىلدىق وكرۋگى مەن وسى اتتاس ورتالىعى اقبۇلاق بولىپ وزگەرتىلدى. جاقسىلىق ىسقاقوۆ, اناتولي سپيتسىن, مۇحامەدجان لۇقپانوۆ سەكىلدى قوعامىمىز بەن مەملەكەتىمىزدىڭ دامۋىنا زور ۇلەس قوسقان جەرلەستەرىمىزگە “سولتۇستىك قازاقستان وبلىسىنىڭ قۇرمەتتى ازاماتى” اتاعى بەرىلدى.
ءومىر ەسقالي. سولتۇستىك قازاقستان وبلىسى.
ۇزدىك تاۋارلار بايقاۋىنا قاتىسادى. قاراعاندىدا وسىمەن بەسىنشى رەت “ساپالى تاۋارلار” وبلىستىق بايقاۋى ءوتتى. وعان 58 كاسىپورىن قاتىستى. “وندىرىستىك باعىتتاعى” جانە “تۇرعىندارعا ارنالعان ۇزدىك تاۋارلار” نوميناتسيالارى بويىنشا ۇيىمداستىرىلعان كورمەدە 10 ءوندىرىس وشاعى الدىڭعى ساپتان كورىندى. بۇلاردىڭ ىشىندە “ماشينە جاساۋ زاۋىتى”, “قاراعاندى كونفەتتەرى”, “يمستالكوم” سياقتىلى بۇرىننان بەلگىلى كاسىپورىندار بار. وبلىستا ساپاسى جوعارى دەپ باعالانعان ونىمدەر تاياۋ ارادا استانادا وتەتىن “قازاقستاننىڭ ۇزدىك تاۋارلارى” بايقاۋىنا قاتىسادى.
ايقىن نەسىپباي. قاراعاندى.
جوبا شەتەلدىكتەر نازارىندا. سىر ەلىنە گۋمانيتارلىق جانە امەريكالىق باسىلىمداردىڭ تىلشىلەرى ارنايى ساپارمەن كەلىپ, “سىرداريا وزەنىنىڭ ارناسىن رەتتەۋ جانە ارالدىڭ سولتۇستىك بولىگىن ساقتاپ قالۋ” جوباسىمەن ەگجەي-تەگجەيلى تانىستى. مەديا-تۋر جەتەكشىسى يگور ەرمانچەنكوۆتىڭ ايتۋىنشا, جۋرناليستەردىڭ ماقساتى “ساراتس” جوباسىمەن شەتەلدىكتەردى تانىستىرۋ ەكەن. شەتەلدىك تىلشىلەرگە وبلىس اكىمدىگى ءوڭىردىڭ الەۋمەتتىك-ەكونوميكالىق دامۋى تۋرالى تولىققاندى مالىمەت بەردى. مۇنان سوڭ شەتەلدىك جۋرناليستەر توبىنىڭ ساپارى ارال اۋدانىندا جالعاسىپ, كوكارال بوگەتىنە, اقلاق سۋ توسپاسىنا, قوسجار ەلدى مەكەنىنە ايالداپ, تۇرعىنداردىڭ تىنىس-تىرشىلىگىمەن تانىسادى.
ەركىن ءابىل. قىزىلوردا.
كۇزدىك سەبۋ باستالدى. “قىركۇيەكتىڭ ەكىنشى جارتىسى – كۇزدىك سەبۋ ءۇشىن قولايلى ماۋسىم”, دەيدى جامبىلدىق ديقاندار. سوندىقتان بولار, تۇرار رىسقۇلوۆ اتىنداعى اۋداننىڭ ديقاندارى وتكەن اپتانىڭ 15 قىركۇيەگى كۇنى ءدان سەبۋدى باستاپ كەتتى. شارۋا قوجالىقتارىنىڭ سوقا-سايماندارى ساقاداي ساي دەسە دە بولادى. ولارعا جوسپارداعى القاپتى يگەرۋ ءۇشىن بارلىعى 8172 توننا تۇقىم كەرەك. بۇگىندە ول دا دايىن جانە عىلىمي ينستيتۋتتىڭ تەكسەرۋىنەن وتكىزىلگەن. ويتكەنى, شارۋاشىلىقتى عىلىممەن ساباقتاستىرا جۇرگىزۋدى قولعا العان اۋدان ديقاندارى ەگىس القاپتارىنا تەك قانا جوعارى سۇرىپتى تۇقىمداردى پايدالانۋدى ءجون ساناپ وتىر. اۋداندا, سونداي-اق, كوكتەمگى ەگىس جۇمىستارى ءۇشىن جەر جىرتۋعا دايىندىق قاتار جۇرگىزىلۋدە.
كوسەمالى ساتتىباي ۇلى. جامبىل وبلىسى.
كەلەشەككە كەمەل بىلىممەن. وسىنداي ۇرانى بار سۇلتانماحمۇت تورايعىروۆ اتىنداعى مەملەكەتتىك ۋنيۆەرسيتەت وتكەن اپتانى 50 جىلدىق مەرەيتويىنا ارنادى. رۋحاني-مادەني باعىتتاعى ءارتۇرلى شارالار وتكىزىلدى. ەلۋ جىلدا ەل جاڭا. رەكتور ەرلان ارىن باسقاراتىن وقۋ ورنى بۇل كۇندەرى جوعارى ءبىلىم بەرۋدە الەمدىك دەڭگەيگە جەتىپ, “ەۋروپا ساپا بەلگىسى” سىيلىعىن الدى. ال, ەلىمىز بويىنشا جوعارى وقۋ ورىندارى اراسىندا 5-ءشى ورىندا تۇر. وڭىرلىك جوعارى وقۋ ورىندارىنىڭ رەكتورلارى, دەپۋتاتتار, ۋنيۆەرسيتەتتىڭ وقىتۋشى-عالىمدارى, ستۋدەنتتەرى قاتىسقان جيىندا وبلىس اكىمى باقىتجان ساعىنتاەۆ ۇكىمەت باسشىسى كارىم ءماسىموۆتىڭ قۇتتىقتاۋ حاتىن وقىپ بەردى. وسى كۇنى وقۋ ورنىنىڭ تەحنولوگيالىق پاركىندە “دامۋ” كاسىپكەرلىك قولداۋ قورىنىڭ بولىمشەسى اشىلدى. مەرەيتوي سوڭى ستۋدەنتتىك فيلارمونيانىڭ كونتسەرتىنە ۇلاستى.
فاريدا بىقاي. پاۆلودار.
مەملەكەتتىك تەاتر ورالعا كەلدى. ورالدا م.لەرمونتوۆ اتىنداعى مەملەكەتتىك اكادەميالىق ورىس دراما تەاترىنىڭ (كوركەمدىك جەتەكشىسى – قر حالىق ءارتىسى, مەملەكەتتىك سىيلىقتىڭ لاۋرەاتى رۋبەن اندرياسيان) گاسترولى وتكىزىلۋدە. ا.وستروۆسكي اتىنداعى وبلىستىق ورىس دراما تەاترىندا ءوتىپ جاتقان گاسترول شىمىلدىعى س.لوبوزەروۆتىڭ “وتباسىلىق پورترەت بوگدە اداممەن” اتتى ەكى ءبولىمدى كومەدياسىمەن اشىلدى. سودان كەيىن ورالدىق ونەرسۇيەر قاۋىم ك.مانەنىڭ “ايەلدى ىزدەڭدەر” اتتى ءۇش اكتىلى كومەدياسىن, ج.-ج.بريكەر مەن م.لاسەگتىڭ “مۋجسكوي رود, ەدينستۆەننوە چيسلو” اتتى ەكى ءبولىمدى كومەدياسىن, ر.يبراگيمبەكوۆتىڭ “يششۋ پارتنەرا دليا نەچاستىح ۆسترەچ” اتتى قوس ءبولىمدى تراگيكومەدياسىن تاماشالادى. بالالار ءۇشىن “القىزىل گۇل” اتتى ءبىر ءبولىمدى ەرتەگى دە كورسەتىلدى.
تەمىر قۇسايىن. ورال.
جىل بۇرىن ستۋدەنت اتاندى. جۋىردا اقىندار مەككەسى اتانعان قاسيەتتى جيدەبايدا مەكتەپ وقۋشىلارىنىڭ رەسپۋبليكالىق ءداستۇرلى اباي-شاكارىم وقۋلارى وتكىزىلدى. وعان ەلىمىزدىڭ تۇكپىر-تۇكپىرىنەن جۇزدەن استام تالاپكەر كەلدى. مۇنىڭ بۇرىنعى وقۋلاردان ءبىر-ەكى وزگەشەلىگى بولدى. ياعني, بيىل وعان رەسەيلىك قانداستارىمىز دا قاتىستى. ەكىنشى وزگەشەلىك سول, پوەزيا كۇندەرىنىڭ “جۇيرىكتەن جۇيرىك وزار جارىسقاندا” دەپ اتالاتىن ءۇشىنشى ءبولىمى بويىنشا جەڭىمپاز اتانعان قاراۋىل مەكتەپ-گيمنازياسىنىڭ 11-سىنىپ وقۋشىسى ج.جاقسىلىقوۆتى سەمەي پەداگوگيكا ينستيتۋتىنىڭ رەكتورى, پروفەسسور مەيىر ەسكەندىروۆ ءبىلىم گرانتىمەن ماراپاتتادى. ول, سونىمەن بىرگە جاس تالانتتاردى قولداۋ ماقساتىنداعى جاسالعان بۇل شارا داستۇرگە اينالىپ, ءوز جالعاسىن تاباتىندىعىنا سەندىردى.
داۋلەت سەيسەن ۇلى. شىعىس قازاقستان وبلىسى.