الماتىدا كسرو حالىق ءارتىسى, اكادەميك ب.تولەگەنوۆانىڭ ءىV حالىقارالىق ۆوكاليستەر بايقاۋى وتۋدە
جەكسەنبى كۇنى, 19 قىركۇيەكتە باستالعان بايقاۋ جاستاردى كلاسسيكالىق جانە حالىقتىق مۋزىكاعا باۋلۋدى مۇرات تۇتادى. جاس تالانتتاردى تابۋعا سەپتەسەتىن بۇل بايقاۋدىڭ باسقا دا اتقاراتىن مىندەتتەرى جەتكىلىكتى. ۇلتتىق كلاسسيكالىق ونەردى ۇلىقتايتىن شارا قازاق سازگەرلەرىنىڭ شىعارمالارىن دا ناسيحاتتاۋدى ماقسات ەتەدى.
سونىمەن, قىركۇيەكتىڭ 27-سىنە دەيىن جالعاساتىن, جامبىل اتىنداعى مەملەكەتتىك فيلارمونيادا ءوتىپ جاتقان بايقاۋعا ەلىمىزدىڭ تۇكپىر-ءتۇكپىرىنەن, جاقىن جانە الىس شەتەلدەردەن وپەرا ونەرى جاس ساڭلاقتارىنىڭ جولى ءتۇسىپ وتىر.
بايقاۋدىڭ وپەرالىق-كونتسەرتتىك بولىمىندە تۋعان كۇنى 1976 جىلدىڭ 1 قاڭتارىنان ەرتە ەمەس جانە 1990 جىلدىڭ 31 جەلتوقسانىنان كەش ەمەس ءانشىلەر قاتىسۋدا. اقتىق باي-قاۋعا 12 ورىنداۋشى جىبەرىلمەك.
بايقاۋعا قاتىسۋشىلاردىڭ قابىلەتىن مارتەبەلى, كاسىبي ءبىلىكتى قازىلار القاسى باعالايدى. حالىقارالىق قازىلار القاسىنىڭ ءتورايىمى – كسرو حالىق ءارتىسى, اكادەميك بيبىگۇل تولەگەنوۆا. قازىلار القاسىنىڭ قۇرامىندا وپەرالىق ونەردىڭ مايتالماندارى كسرو جانە قىرعىزستاننىڭ حالىق ءارتىسى ق.سارتباەۆا, قازاقستاننىڭ ەڭبەك سىڭىرگەن ءارتىسى, پروفەسسور ش.ءابىلوۆ, سانكت-پەتەربۋرگ كونسەرۆاتورياسىنىڭ پروفەسسورى د.نوۆيچەنكو, ەستونيانىڭ حالىق ءارتىسى, كسرو مەملەكەتتىك سىيلىعىنىڭ لاۋرەاتى م.پا-لم, حالىقارالىق كونكۋرستاردىڭ لاۋرەاتى, سوفيا جانە بۋرگاس وپەرا تەاترلارىنىڭ جەكە ورىنداۋشىسى و. گورانوۆتار بار.
وسىناۋ ونەر مەرەكەسى جاڭا جاس ورىنداۋشىلاردى تانىتىپ قانا قويماي, ەندى بىرەۋلەرىن الەمدىك ساحنا تورىنە باۋليدى.
ءىV حالىقارالىق ۆوكاليستەر بايقاۋىنا قازاقستان رەسپۋبليكاسىنىڭ مادەنيەت مينيسترلىگى مەن الماتى قالالىق اكىمدىگى قولداۋ تانىتىپ, ءتورت جىلدان بەرى “شەۆرون” كومپانياسى دەمەۋشىلىك كورسەتۋدە.
ايناش ەسالي. الماتى.