قازاق حالقى تاۋەلسىزدىك جولىندا تالايلى تاعدىردى باستان كەشىرىپ, نەشە عاسىر وسى ءبىر تاۋەلسىزدىك ءۇشىن نەبىر قيىنشىلىقتارعا تاپ بولىپ, ەرەن ەرلىك, تاپجىلماس شىدامدىلىق كورسەتكەنى بەلگىلى. بۇل جولدا حالقىنا باس بولىپ, ورەلى ىستەرگە كوشباسشى بولا بىلگەن حاندار مەن باتىرلار بولعان. سولاردى حالقى ارداق تۇتىپ, تاۋەلسىزدىك ورناعان كۇننەن بەرى ولارعا تاعزىم ەتىپ كەلەدى.
جاقىندا استانا قالاسى ءتىلدەردى دامىتۋ باسقارماسىنىڭ ۇيىمداستىرۋىمەن قازاقستان حالقى ءتىلدەرىنىڭ ءحىى قالالىق فەستيۆالى اياسىندا جانىبەك پەن كەرەي جانە كەنەسارى ەسكەرتكىشتەرىنىڭ الدىندا “تاعزىم مەن تاعىلىم” اتتى مەرەكەلىك ءىس-شارا بولىپ ءوتتى.
تاريحي تۇلعالار ەسكەرتكىشتەرىنە گۇل شوقتارى قويىلىپ, تاعزىم ەتىلىپ, جينالعان كوپشىلىك الدىندا ءسوز العان تاريح عىلىمىنىڭ دوكتورى حانگەلدى ءابجان قازاق حالقىنىڭ العاشقى حاندارى جانىبەك پەن كەرەي جونىندە تولىمدى ماعلۇماتتار كەلتىرە وتىرىپ, ءتىلىمىزدىڭ مارتەبەسىن ارتتىرۋ اياسىندا ءوز وي-پىكىرىن ايتىپ وتسە, استانا قالاسىنىڭ تىلدەردى دامىتۋ باسقارماسىنىڭ باستىعى ورازكۇل اسانعازى قالاداعى اتقارىلىپ جاتقان ءىس-شارالارعا توقتالىپ, جينالعان كوپشىلىكتى, اسىرەسە جاستاردى الىپتار رۋحىنا تاعزىم ەتۋگە شاقىردى.
سونداي-اق حالقىمىزدىڭ سوڭعى حانى كەنەسارى ەسكەرتكىشى الدىندا دا وسىنداي مەرەكەلىك ءىس-شارا بولىپ, فيلولوگيا عىلىمىنىڭ دوكتورى قۇنىپيا الپىسباەۆ پەن مەديتسينا عىلىمىنىڭ دوكتورى مۇحاممەديا احمەتوۆ كەنەسارى قاسىم ۇلىنىڭ ەرلىك شەجىرەسىن بايانداپ, ۇرپاققا ۇلگى بولار ۇلاعاتتى ءومىر جولىن جاس ۇرپاققا تانىستىرىپ ءوتتى. ق.قۋانىشباەۆ اتىنداعى قازاق مۋزىكالى دراما تەاترى ءارتىستەرىنىڭ جازۋشى دۋمان رامازاننىڭ “كەنەسارى-كۇنىمجان” پەساسىنان كورسەتىلگەن قويىلىم مەن قالاداعى №58 قازاق مەكتەبى وقۋشىلارى حان كەنە ءومىر سۇرگەن ورتا كەزەڭىندەگى شىتىرمان وقيعا جەلىسىنە قۇرىلعان درامالىق شىعارمادان ۇزىندىلەر كەشتىڭ ءسانى مەن ءمانىن اجارلاندىرا ءتۇستى.
بەرىك سادىر.