تاقىرىپقا اينالعان بۇل ءسوزدى استاناداعى №1 اۋرۋحانانىڭ مەيىربيكەسى ساۋلە ابىلقاسىموۆا ايتتى. كەشە استانا, الماتى, پاۆلودار, قوستاناي جانە اقتوبە قالالارىندا ساۋلە سەكىلدى تاعى 360 وتباسى باسپانالى بولىپ, شادىمان قۋانىشتىڭ ايدىنىنا قۇلاش ۇرعانىن كوردىك.
ەلباسىنىڭ باستاماسىمەن حالىقتىڭ ارمان-مۇراتىن «بايتەرەك» حولدينگى «نۇرلى جول» باعدارلاماسىنىڭ اياسىندا جۇزەگە اسىرىپ جاتىر. وسىعان وراي كەشە جالعا بەرىلەتىن الەۋمەتتىك تۇرعىن ءۇي باعىتى بويىنشا پاتەرلەردىڭ كەزەكتى پۋلىن ۇلەستىرۋ ءۇشىن استانا تورىندە ارنايى ءىس-شارا ءوتتى. وندا 52 استانالىق ءۇي كىلتىن الدى. ايتا كەتەرلىگى, ءۇي ەلوردانىڭ تاڭداۋلى اۋدانىنا ورىن تەپكەن. يمانعا تولى يگى شارا مەرەكەلىك كوڭىل كۇيگە ورايلاستىرىلىپ ۇيىمداستىرىلىپتى. پاتەر يەلەرىنە كىلتتەر سالتاناتتى مۋزىكا اۋەنىمەن تابىس ەتىلدى. باسپانالى بولعانداردىڭ قۋانىشىن سوزبەن ايتىپ جەتكىزۋ مۇمكىن ەمەس. جالپى, جىل سوڭىنا دەيىن «نۇرلى جول» باعدارلاماسى اياسىندا الماتى قالاسى بويىنشا – 88,6 مىڭ شارشى مەتر (1 542 پاتەر), استانادا – 20 مىڭ شارشى مەتر (322 پاتەر), اقتوبەدە – 13,8 مىڭ شارشى مەتر (216 پاتەر), پاۆلوداردا – 25 مىڭ شارشى مەتر (485 پاتەر), قوستانايدا – 5,8 شارشى مەتر (91 پاتەر) باسپانا سالىنىپ, تاپسىرىلادى.
– اعىمداعى جىلعى شىلدەدە رەسپۋبليكا بويىنشا ۇلەستىرىلۋى جوسپارلانعان پاتەرلەردىڭ جالپى سانى – 360-تى قۇرايدى. پاتەرلەردىڭ 50 پايىزى 35 جاسقا دەيىنگى جاس وتباسىلارعا بەرىلەدى. قالعان بولىگى بيۋدجەتتىك ۇيىمدار مەن مەملەكەتتىك قىزمەتشىلەرگە, كوپبالالى جانە مۇگەدەك بالالارى بار وتباسىلارعا, جەتىمدەر مەن اتا-انا قامقورلىعىنسىز قالعان بالالارعا, سونداي-اق تولىق ەمەس وتباسىلار مەن اسكەري قىزمەتشىلەرگە ۇلەستىرىلدى. كەزەكتە تۇرعانداردىڭ ءتىزىمىن جەرگىلىكتى اتقارۋشى ورگاندار ىرىكتەپ, ءتولەم قابىلەتتىلىگىن راستاۋ ءۇشىن «بايتەرەك» حولدينگىنىڭ ەنشىلەس ۇيىمى «قازاقستان يپوتەكالىق كومپانياسى» اق-قا جولدادى. مۇندا ارنايى ماماندار بارلىق جاعدايدى سارالاي كەلىپ, باسپاناعا ەڭ مۇقتاج جانداردىڭ سۇرانىسىن قاناعاتتاندىرىپ وتىر, – دەدى حولدينگتىڭ ينفراقۇرىلىمداردى دامىتۋ دەپارتامەنتىنىڭ ديرەكتورى قانات ىبىراەۆ.
ىزگى شارانىڭ باسىندا جۇرگەن باسقارۋشى ديرەكتور سەرجان ماديەۆ «بايتەرەك» حولدينگى وسى جىلعى كوكتەمنىڭ ناۋرىز, ءساۋىر ايلارىندا استانا, الماتى, شىمكەنت, كوكشەتاۋ, سەمەي, قوستاناي قالالارىندا 2 437 پاتەر پايدالانۋعا ۇسىنىلعانىن ايتتى. ءسويتىپ, بۇگىنگى كۇندە وسى نىساندار بويىنشا «قازاقستان يپوتەكالىق كومپانياسى» اق باعدارلاما قاتىسۋشىلارىمەن شارتقا قول قويۋ ءراسىمىن اياقتاعالى وتىرعانىن دا جەتكىزدى. ونىڭ سوزىنە قاراعاندا, اعىمداعى جىلدىڭ باسىنان بەرى حولدينگ قازاقستان قالالارىندا 2 797 جاڭا پاتەردى پايدالانۋعا تاپسىرىپ, ەل ازاماتتارىن قۋانىشقا كەنەلتكەن.
باسقارۋشى ديرەكتور حولدينگ پەن ونىڭ ەنشىلەس ۇيىمدارىنىڭ باسىم مىندەتتەرىنىڭ ءبىرى – قازاقستاندىقتاردى باسپانامەن قامتاماسىز ەتۋ بويىنشا پرەزيدەنتتىڭ تاپسىرماسىن ورىنداۋ ەكەنىن اتاپ ءوتتى. وعان قوسا, وسى كەزدە «نۇرلى جول» باعدارلاماسىن مۇلتىكسىز ىسكە اسىرۋ اسا ماڭىزدى بولىپ تابىلاتىنىن جانە ونىڭ ورىندالۋ بارىسى ەرەكشە باقىلاۋعا الىنعانىنا نازار اۋداردى. «نۇرلى جول» باعدارلاماسىنىڭ ارقاسىندا تۇرعىن ءۇي قۇرىلىسى سالاسىندا مەملەكەت اسا ءتيىمدى تالاپتار نەگىزىندە حالىقتىڭ الەۋەمەتتىك ءالسىز توپتارىن قولجەتىمدى, ارزان باسپانامەن قامتاماسىز ەتۋدىڭ تەتىكتەرىن تابا ءبىلدى», دەدى اڭگىمە بارىسىندا ق.ىبىراەۆ.
حولدينگ باسشىلارى الداعى ۋاقىتقا جاسالىپ وتىرعان جوسپارلارىمەن دە ءبولىستى. بۇيىرتسا, جالپى اۋدانى 453,5 مىڭ شارشى مەترلىك 7805 پاتەردى تاياۋ بولاشاقتا اياقتاپ, سولار بويىنشا شارتقا قول قويىلىپتى. ونىڭ ىشىندە 2015 جىلى – 361 مىڭ شارشى مەتر بولاتىن 6185 پاتەر جانە 2016 جىلى – 92,6 مىڭ شارشى مەتردى قۇرايتىن 1620 پاتەر پايدالانۋعا بەرىلەدى ەكەن. ال ەندى بۇگىنگى شاراعا قايتا ورالساق, پاتەر ۇلەستىرىلىپ جاتقان بەس قالادا ساتىپ الىنعان جانە سالىنعان جالدامالى تۇرعىن ۇيلەر الماتىدا – 88,6 مىڭ, استانادا – 20 مىڭ, اقتوبەدە – 13,8 مىڭ, پاۆلوداردا – 25 مىڭ, قوستانايدا 5,8 مىڭ شارشى مەتردى قۇراپ وتىر.
جالپى, 2015 جىلى «ءبايتەرەك» حولدينگى جانە ونىڭ ەنشىلەس قۇرىلىمدارى – «قازاقستان يپوتەكالىق كومپانياسى» اق پەن «بايتەرەك دەۆەلوپمەنت» اق جەرگىلىكتى اتقارۋشى ورگانداردىڭ كەزەگىندە تۇرعاندار ءۇشىن 401 مىڭ شارشى مەتردى نەمەسە شامامەن 7 000 ءپاتەردى ساتىپ الۋ مەن سالۋدى جوسپارلار وتىرعان كورىنەدى. بۇلارمەن بىرگە, «وڭىرلەردى دامىتۋدىڭ 2020 جىلعا دەيىنگى باعدارلاماسىن» ىسكە اسىرۋ اياسىندا باعدارلامانى ىسكە اسىرۋدىڭ بۇكىل كەزەڭىندە جالعا بەرىلەتىن تۇرعىن ءۇيدىڭ 1483 مىڭ شارشى مەترىن نەمەسە شامامەن 29 مىڭ پاتەر بەرۋ جوسپارلانىپ قويىلىپتى.
قۋانىشتى شارا بارىسىندا ءۇيلى بولعان ساۋلە قۋانىشقىزىن اڭگىمەگە تارتتىق. «شىندىعىن ايتقاندا, قۋانىشىمدا شەك جوق. ونى قالاي بىلدىرەرىمدى دە بىلمەيمىن. «نۇرلى جول» باعدارلاماسى ءبىر مەنى عانا ەمەس, مىڭداعان ادامدى باسپانامەن قامتاماسىز ەتىپ, قۋانىشقا بولەپ جاتقانى بۇكىل ەلدى شاتتاندىرىپ وتىر دەسەم بولادى. وسى باعدارلامانى جاساپ, جۇزەگە اسىرۋعا تاپسىرما بەرگەن ەلباسى نۇرسۇلتان نازارباەۆقا ايتار العىسىمىز مول. تابانداتقان 12 جىلدان بەرى مەملەكەتتىك ءتۇرلى باعدارلامالار بويىنشا پاتەرلى بولۋعا تالاپتانىپ كەلەمىز. جۇلدىزدى ءساتىمىز بۇگىن تۋىپتى. اتام قازاق, «ىزدەگەن جەتەر مۇراتقا!», «سابىر ءتۇبى سارى التىن!» دەگەن تامسىلدەردى تەككە ايتپاعان ەكەن. ءار ىسكە سابىرمەن قاراپ, سونىڭ جەمىسىن جەپ وتىرمىز», دەدى ءبىر بولمەلى پاتەرگە يە بولعان س.ابىلقاسىموۆا.
نۇرباي ەلمۇراتوۆ,
«ەگەمەن قازاقستان».