جاقىندا قازاقستان جازۋشىلار وداعىنىڭ مۇشەسى, اقىن, سىنشى جۇما-نازار سومجۇرەكتىڭ «سارىارقا سازى» اتتى قوس تومدىعىنىڭ تۇساۋكەسەرى استانا قالاسىنداعى «تىلەپ-قوبىز» سارايىندا ءوتكىزىلدى. تۇساۋكەسەر جىر مەرەكەسىنە ۇلاستى. اقىننىڭ ولەڭدەرىنە جازىلعان اندەر شىرقالىپ, جىر وقىلىپ, اراسىندا كۇي كۇمبىرلەپ جينالعان قاۋىمنىڭ قۇلاق قۇرىشىن قاندىردى. جىر مەرەكەسىنە «تىلەپ-قوبىز» سارايىندا قۇرىلعان «كوك تۇرىكتەر» حالىق اسپاپتارى وركەسترى قىزمەت كورسەتتى. تورعايلىق تالانتتى سازگەرلەر قاليبەك دەرىپسالدين, ايتباي مۇزداحانوۆ, بالقاش ناقانوۆ جانە قايىرجان ماقانوۆتىڭ تاماشا اندەرىنىڭ تۇساۋى كەسىلدى. ول اندەردى استانا وپەرا-بالەت تەاترىنىڭ جەتەكشى ءسوليسى, بىرنەشە حالىقارالىق كونكۋرستاردىڭ لاۋرەاتى ءسۇندەت بايعوجين, استانا فيلارمونياسىنىڭ ساندۋعاش ءۇندى ءانشىسى سىمبات تاسبەرگەنوۆا جانە نۇربولات ارزاماس ۇلى سىندى جاستار ورىندادى. جىر مەرەكەسىنىڭ ەكىنشى بولىمىندە ادەبيەت سىنشىلارى مەن اقىندار جانە ولەڭ ءتۇسىنىپ وقيتىن ەلگە بەلگىلى ازاماتتار ءسوز الىپ, سومجۇرەك ولەڭدەرىنىڭ ماندىلىگى مەن ماڭىزدىلىعىن, كوركەمدىگىن, سەزىمدى قوزعاپ جۇرەككە جەتىپ جاتاتىن ەرەكشەلىكتەرىن ايتىپ, جوعارى باعالادى. اتاپ ايتقاندا, پروفەسسور سەرىك نەگيموۆ, پارلامەنت ءماجىلىسىنىڭ دەپۋتاتتارى الدان سمايىل, اباي تاسبولاتوۆ, رامازان ءسارپەكوۆ جانە عالىم, مەملەكەت قايراتكەرى ءادىل احمەتوۆ, بۇرىنعى دەپۋتات ءابىلماجىن باكىر, اقىندار اينۇر ابدىراسىلقىزى مەن ءابجان ابىلتاەۆتار ءوز سوزدەرىندە سومجۇرەكتىڭ قوس تومدىعى پوەزياعا قوسىلعان ولجا ەكەنىن شەگەلەپ ايتتى.
وسىناۋ جىر كەشىندە ەرەكشە ەستە قالاتىن كورىنىس بولدى. پارلامەنت ءماجىلىسىنىڭ دەپۋتاتى, گەنەرال-لەيتەنانت اباي تاسبولاتوۆ: « جۇكە, مەن ءسىزدىڭ «سارىارقا سازى» قوس تومدىعىڭىز قولىما تيگەلى ونى باس الا الماي سۇيسىنە وقىپ, اقىندىعىڭىزعا ابدەن ريزا بولدىم. ولەڭدەرىڭىز شەتىنەن تاماشا! اسىرەسە,قىزدار مەن ارۋلارعا ارناعان جىرلارىڭىز بەن پوەمالارىڭىزدى وقي بەرگىڭ كەلەدى.تابيعات قۇبىلىستارى مەن تاماشالارىن سۋرەتتەگەن ولەڭدەرىڭىز دە ولەڭ تۇسىنەتىن وقىرماندارىڭىزدى ەرىكسىز سۇيسىنتەرى ءسوزسىز!..» دەدى.
سويلەۋشىلەردىڭ قاي-قايسىسى دا جۇما-نازار جىرلارىنىڭ شىنايىلىعىن, ال ءوزىنىڭ قاراپايىم كورىنگەنىمەن ومىردە كوسەمسوزدەرىمەن ۇنەمى پروبلەمالار كوتەرىپ جۇرەتىن كۇرەسكەر ەكەنىن ايتىپ, اقىننىڭ مەرەيىن ءوسىرىپ, كوڭىلىن تاسىتتى. ءسويتىپ, پوەزيا-جىر كەشى مەرەكەسىنە جينالعاندار مول رۋحاني ازىق ارقالاپ قايتتى.
نارىق زامانىندا ءار تومى 35 باسپا تاباق جيناق شىعارۋ قاي اقىنعا دا قيىن تيەرى انىق. مىنا رۋحاني قۇندىلىق شىمكەنتتىك ەلگە بەلگىلى مەتسەنات كاسىپكەرلەر اعايىندى سەرىكجان مەن ءالىمجان سەيتجانوۆتاردىڭ دەمەۋشىلىگىمەن استاناداعى «سارىارقا» باسپاسىنان ەرەكشە كوركەمدەلىپ, جاڭاشا ديزاينمەن بەزەندىرىلىپ جارىق كورىپتى. جىگىتتەردىڭ مۇنداي جاقسى ىسىنە اۆتور دا, جىر كەشىنە جينالعاندار دا العىستارىن جاۋدىردى. ءسويتىپ, سومجۇرەكتىڭ «سارىارقا سازى» اتتى قوس تومدىق جىر جيناعى وقىرماندارعا جول تارتتى.
تولەمىرزا تەمىربەك ۇلى, جۋرناليست.
استانا.