«قارتتارىم – اسىل قازىنام» دەپ قۇرمەتتەيتىن «قازحروم» تۇك» اق-تىڭ فيليالى – اقتوبە فەرروقورىتپا زاۋىتى ءاردايىم ءوز ارداگەرلەرىنە قول-ۇشىن بەرىپ, قامقورلىعىنا الىپ وتىرادى. جەڭىستىڭ 70 جىلدىق مەرەيتويىنا وراي كاسىپورىن ۇلى وتان سوعىسى ارداگەرلەرىنىڭ ۇيلەرىن جوندەۋگە 2 ميلليون 600 مىڭ تەڭگە كولەمىندە قاراجات ءبولىپ, كۇردەلى جوندەۋدەن وتكىزدى.
بۇگىنگى تاڭدا اقتوبە فەرروقورىتپا زاۋىتىنىڭ ارداگەرلەر كەڭەسىندە 687 قارت ەسەپتە تۇرادى. ونىڭ تورتەۋى ۇلى وتان سوعىسىنىڭ ارداگەرى, ءۇش ادام وسى مارتەبەگە تەڭەستىرىلگەندەر, 130-ى تىل ەڭبەككەرى, 7-ءۋى سوعىستا قازا تاپقانداردىڭ جەسىرلەرى بولىپ تابىلادى. ارداگەرلەر ءاردايىم زاۋىت اكىمشىلىگىنىڭ باستى نازارىندا. ولاردىڭ تالاپ-تىلەكتەرى, وتىنىشتەرى قاشاندا شەشىمىن تاپپاي قالعان ەمەس. بيىل ۇلى جەڭىستىڭ 70 جىلدىق مەرەيتويى قارساڭىندا زاۋىت اكىمشىلىگى سوعىس ارداگەرلەرىنىڭ پاتەرىن, ۇيلەرىن جوندەۋ جۇمىستارىن ويداعىداي اياقتاپ, مەرەكە الدىندا ۇلكەن قۋانىش سىيلادى.
– ارداگەرلەرگە قۇرمەت كورسەتۋ ءبىزدىڭ ازاماتتىق پارىزىمىز. ءبىز تەك 9 مامىر – ۇلى جەڭىس كۇنىندە عانا ەمەس, ولارعا ءاردايىم قامقور بولىپ, تالاپ-تىلەكتەرىن, ءوتىنىشتەرىن قاناعاتتاندىرىپ وتىرامىز. بيىل دا وسى يگى ءداستۇر ءوز جالعاسىن تاۋىپ, ۇلى جەڭىستىڭ 70 جىلدىق مەرەيتويى قارساڭىندا ارداگەرىمىز نيكولاي پاششەنكونىڭ ءوتىنىشى بويىنشا ونىڭ پاتەرىنە جوندەۋ جۇمىستارى جۇرگىزىلدى. سونداي-اق, وبلىس اكىمدىگىنىڭ تاپسىرماسى بويىنشا قالامىزدىڭ تۇرعىنى, سوعىس ارداگەرى وتەش جالماعامبەتتىڭ تۇرعىن ءۇيىنىڭ شاتىرى الماستىرىلىپ, ءىشى جوندەلىپ, سىرتى زامان تالابىنا ساي ماتەريالدارمەن قاپتالدى. جالپى, ارداگەرلەردىڭ ۇيلەرىن جوندەۋ جۇمىستارىنا 2 ميلليون 600 مىڭ تەڭگە كولەمىندە قاراجات جۇمسالدى. سونىمەن قاتار, ۇلى جەڭىستىڭ 70 جىلدىعىنا وراي زاۋىتتىڭ 4 سوعىس ارداگەرىنە 70 مىڭ تەڭگە كولەمىندە اقشالاي سىيلىق جانە ازىق-ت ۇلىك سالىنعان قالتالار, وسى مارتەبەگە تەڭەستىرىلگەن 3 ارداگەرگە 50 مىڭ تەڭگە, 130 تىل ەڭبەككەرىنە 26 مىڭ 600 تەڭگە, 7 سوعىستا قازا تاپقانداردىڭ جەسىرلەرىنە 20 مىڭ تەڭگە جانە 27 اۋعان سوعىسىنىڭ ينتەرناتسيونال جاۋىنگەرى مەن چەرنوبىل اپاتىنا قاتىسقاندارعا 17 مىڭ 800 تەڭگە كولەمىندە اقشالاي سىيلىق جاسالدى. سونداي-اق, 9 مامىر – جەڭىس كۇنى 30 ارداگەرگە داستارقان جايىلىپ, قۇرمەت كورسەتىلدى, «ەۆرازيا» مەديتسينالىق ورتالىعىندا تەگىن ەمدەلۋگە مۇمكىندىكتەر قاراستىرىلدى, – دەيدى كاسىپوداق ۇيىمىنىڭ توراعاسى باقىتكەرەي كاۆانوۆ.
– ۇلى جەڭىستىڭ 70 جىلدىق مەرەيتويى قارساڭىندا مەنىڭ ۇيىمە كۇردەلى جوندەۋ جۇمىستارىن جۇرگىزىپ, دەمەۋشىلىك جاساعان اقتوبە فەرروقورىتپا زاۋىتىنىڭ اكىمشىلىگىنە العىسىم شەكسىز. بۇل مەن ءۇشىن, مەنىڭ وتباسىم ءۇشىن توسىن سىي بولدى. مەرەكەنى جاڭارعان, ءىشى, سىرتى زامان تالابىنا ساي جوندەلگەن ۇيدە كوتەرىڭكى كوڭىل كۇيمەن قارسى الدىم, – دەيدى اقتوبە قالاسىنىڭ گاگارين كوشەسىندە تۇراتىن سوعىس ارداگەرى وتەش جالماعامبەت قۋانىشىن جاسىرا الماي.
وتەش جالماعامبەت 1942 جىلى اسكەر قاتارىنا شاقىرىلىپ بايلانىسشى ماماندىعى بويىنشا دايىندىقتان ءوتىپ, 1943 جىلى بەلگورود – حاركوۆ باعىتىنداعى كۋرسك شايقاسىنا قاتىسقان. 1947 جىلى ەلگە امان-ەسەن ورالدى. ارداگەردىڭ 1941-1945 جىلدارداعى سوعىستاعى ەرەن ەرلىگى ءۇشىن « ۇلى وتان سوعىسى», «قىزىل جۇلدىز», «ەرلىگى ءۇشىن», «ەڭبەك ارداگەرى», «كۋرسك شايقاسى ءۇشىن» ۋكراينانىڭ «قۇرمەت توسبەلگىسى» سياقتى وردەن, مەدالدارى كەۋدەسىندە جارقىرايدى.
مىنە, ءوڭىردىڭ ەكونوميكالىق دامۋىنا ەلەۋلى ۇلەس قوسىپ كەلە جاتقان كاسىپورىن باسشىلىعى الەۋمەتتىك جاۋاپكەرشىلىكتى دە جەتە سەزىنىپ, قارتتاردى قامقورلىعىنا الىپ, ولاردىڭ العىسىنا بولەنىپ كەلەدى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.
سۋرەتتە: ارداگەر نيكولاي پاششەنكو زايىبىمەن.