ەلباسى جاريا ەتكەن بەس ينستيتۋتتىق رەفورمانى جۇزەگە اسىرۋعا بايلانىستى جاڭعىرتۋ جونىندەگى ۇلتتىق كوميسسيا قۇرىلىپ, زاڭنىڭ ۇستەمدىك قۇرۋى تۇرعىسىندا جۇمىس باستالعانى ءمالىم. وسىعان وراي كەشە ورتالىق كوممۋنيكاتسيالار قىزمەتىندە پارلامەنت ءماجىلىسىنىڭ دەپۋتاتتارى, «نۇر وتان» پارتياسى فراكتسياسىنىڭ مۇشەلەرى رامازان سارپەكوۆ پەن زاعيپا باليەۆا «سوت جۇيەسىن جەتىلدىرۋ جانە قۇقىق قورعاۋ ورگاندارىنىڭ قىزمەتىنە قوعام سەنىمىن ارتتىرۋ تۋرالى» ءباسپاسوز ءماسليحاتىن وتكىزدى.
الدىمەن ءسوز العان ر.سارپەكوۆ بەس ينستيتۋتتىق رەفورمانى ىسكە اسىرۋعا باعىتتالعان قىزۋ جۇمىستار جۇرگىزىلىپ جاتقانىنا توقتالدى. دەپۋتات بۇل رەتتە وسى اۋقىمدى تاپسىرماعا سايكەس جۇمىسشى توپتارى قۇرىلعان, ال ولاردىڭ جۇمىستارىنىڭ ناتيجەسى پرەزيدەنت جانىنان قۇرىلعان جاڭعىرتۋ جونىندەگى ۇلتتىق كوميسسيادا قارالارىن دا العا تارتتى. كوميسسيانىڭ نەگىزگى ماقساتى – وسى بەس باعىتتاعى رەفورمانى جۇرگىزۋ قارقىنىن باقىلاۋ, مەملەكەتتىك ورگانداردىڭ قىزمەتىن بيزنەس-سەكتور مەن ازاماتتىق قوعامدى ۇيلەستىرۋ ارقىلى جۇرگىزۋ. مەملەكەتتىڭ الدىندا تۇرعان بۇل رەفورمالىق ماسەلەلەردىڭ ماڭىزدىلىعىنا بايلانىستى قۇرىلعان جۇمىسشى توپتارىنا پارلامەنت دەپۋتاتتارى دا تارتىلعاندىعىن ايتا كەتكەن ءجون.
«بۇگىنگى سىزدەرمەن كەزدەسۋدەگى ءبىزدىڭ مىندەتىمىز وسى رەفورمانىڭ ءبىر باعىتى – ەلدەگى سوت تورەلىگىنىڭ بەدەلىن كوتەرۋ, سۋديالىققا ءۇمىتكەرلەرگە قاتىستى تالاپتاردى جەتىلدىرۋ, سوتتار شەشىمدەرىنىڭ ادىلەتتىلىگىن جوعارىلاتۋ ماسەلەلەرىنە جانە قوعامنىڭ ىشكى ىستەر ورگاندارىنىڭ قىزمەتىنە سەنىمىن ارتتىرۋ مەن ازاماتتارعا, قوعامعا جانە مەملەكەتكە قارسى جاسالعان زاڭسىز ارەكەتتەرگە قارسى قۇقىق قورعاۋ ورگاندارىنىڭ قابىلەتىن كۇشەيتۋ تاقىرىبىنا بايلانىستى ماسەلەلەرگە جان-جاقتى مالىمەت بەرۋ», – دەدى رامازان قۇماربەك ۇلى. ءسويتتى دە دەپۋتات وسى رەفورماعا جاۋاپتى مەملەكەتتىك ورگانداردا ۇيىمداستىرۋ ماسەلەسىنە جانە مۇددەلى ورگانداردان تۇسكەن ۇسىنىستاردى تالقىلاۋعا ارنالعان العاشقى وتىرىستار وتكىزىلگەندىگىن ورتاعا سالدى.
دەپۋتاتتىڭ ايتۋىنشا, نەگىزگى ۇسىنىستار ەلباسىنىڭ تاپسىرمالارىنا بايلانىستى زاڭنىڭ ۇستەمدىگى مەن مەنشىك قۇقىعىن قورعاۋعا, سۋديالار كورپۋسىن جەمقورلىقتان الاستاۋعا جانە بىلىكتىلىك تالاپتارىن كۇشەيتۋگە, سونىمەن قاتار قۇقىق قورعاۋ ورگاندارىنىڭ جۇمىسىن جۇرتشىلىق ءۇشىن اشىق تۇردە وتكىزۋگە, ونىڭ مارتەبەسىن جوعارىلاتىپ, ازاماتتار الدىنداعى جاۋاپكەرشىلىگىن ارتتىرۋعا, جەرگىلىكتى مۋنيتسيپالدى پوليتسيانى قۇرۋ ماسەلەلەرىنە ارنالعان. اتاپ ايتقاندا, پوليتسيا قىزمەتكەرلەرىنىڭ كاسىبيلىگىن ارتتىرۋ, ولاردىڭ ازاماتتار الدىنداعى ەسەپتىلىگىن قامتاماسىز ەتۋ جانە پوليتسيا قىزمەتىنە كانديداتتاردى تەستىلەۋدە ارنايى جۇيەنى پايدالانۋدىڭ كەشەندى شارالارى قارالاتىن بولادى. پوليتسيا قىزمەتىنىڭ اشىقتىعىن قامتاماسىز ەتۋ ماقساتىندا قوعامدىق كەڭەستەر قۇرۋ دا كوزدەلگەن.
مەملەكەتتىك ءتىلدى مىندەتتى تۇردە ءبىلۋ قاجەتتىگىن ايتقان ز.باليەۆا وسى ورايدا نورمالاردى ورىندى قولدانۋ جونىندەگى بىلىكتىلىك ەمتيحانىن قايتا قاراۋ كەرەكتىگىن دە العا تارتتى. ءتيىمدى قۇقىقتىق رەتتەۋ ماقساتىندا «سوت جۇيەسى تۋرالى» جانە «سۋديالاردىڭ مارتەبەسى تۋرالى» كونستيتۋتسيالىق زاڭداردى قابىلداۋ كوزدەلىپ وتىرعاندىعى بەلگىلى بولدى. دەپۋتات ءسوز رەتى كەلگەندە وبلىستىق سوت سۋديالىعىنا كانديداتتىڭ اۋداندىق سوتتا كەم دەگەندە ءۇش جىلدىق جۇمىس ءوتىلى بولۋى تۋرالى تالابى قويىلىپ وتىرعاندىعىن دا ايتا كەتتى. سۋديالىققا كانديداتتاردى تاعايىنداۋ ءۇشىن دە ولاردىڭ سوتتاردا مىندەتتى تۇردە ءبىر جىل تاجىريبەدەن ءوتۋى قاجەتتىگى دە كوزدەلىپ وتىرعاندىعى ەرەكشە اتالدى. سوت تورەلىگى ينستيتۋتىن جاڭعىرتۋ ماقساتىندا ونى جوعارعى سوت جانىنان جۇمىس ىستەيتىندەي ەتۋ كەرەكتىگى اتاپ كورسەتىلدى.
سونداي-اق, سوتتاردىڭ اشىقتىعىن قاداعالاۋ ماقساتىندا قوعامدىق باقىلاۋ ينستيتۋتىن ەنگىزۋ جايى دا العا تارتىلدى. ز.باليەۆا بۇل ورايدا سۋديالاردىڭ ءمىنسىز بەدەلگە يە بولۋى تيىستىگىن باسا ايتتى. سوت جۇيەسىندە مەريتوكراتيا ءپرينتسيپىن ەنگىزۋ ءۇشىن بىلىكتىلىك تالاپتارىن قايتا قاراۋ كەرەك, دەدى ول.
اسقار تۇراپباي ۇلى,
«ەگەمەن قازاقستان».